ކުރެންދޫ ދާއިރާގެ އިންތިހާބީ މެންބަރު ކޮންގްރެސްއާ ގުޅިއްޖެ

ރައްޔިތުންގެ މަޖިލީހުގެ ކުރެންދޫ ދާއިރާގެ އިންތިޚާބީ މެމްބަރު ޝާމިން ޙަބީބު މިއަދު ކޮންގްރެސް ޕާޓީއާ ގުޅިވަޑައިގެންފި އެވެ.

ޝާމިން، ކޮންގްރެސްއާ ގުޅިވަޑައިގަތީ ރިޔާސީ ގެކޮޅު -- މުލިއާގޭގައި އޮތް ރަސްމިއްޔާތެއް ގައެވެ. އޭނާ ވަނީ ކޮންގްރެސްގެ މެންބާޝިޕް ފޯމް، އެ ޕާޓީގެ ރައީސް، ރައީސް ޑރ. މުހައްމަދު މުއިއްޒުއާ ހަވާލު ކުރައްވާފަ އެވެ.

ޝާމިން މަޖިލީސް އިންތިހާބު ގައި ވާދަކުރެއްވީ އަމިއްލަ ގޮތުންނެވެ. އެ ދާއިރާއަށް ކޮންގްރެސްގެ ކެންޑިޑޭޓަކު ވެސް ވާދަ ކުރި އެވެ. ކޮންގްރެސްގެ ޓިކެޓް ގައި ވާދަ ކުރީ އާދަމް ތައުފީގެވެ. އިންތިހާބު ގައި ޝާމިން ވަނީ 741 ވޯޓް ހޯދާފަ އެވެ. އާދަމް ތައުފީގަށް ލިބުނީ 547 ވޯޓެވެ.

އެ ދާއިރާއަށް އެމްޑީޕީގެ ޓިކެޓް ގައި ވާދަކުރީ ރައީސް ސޯލިހްގެ ކޮއްކޯފުޅު އަލީ ނިޔާޒެވެ. އޭނާއަށް ލިބުނީ 250 ވޯޓެވެ. ނިމުނު މަޖިލީހުގައި ކުރެންދޫ ދާއިރާގެ ގޮނޑި ފުރި އަބްދުލްޣަނީ އަބްދުލް ހަކީމަށް ލިބުނީ 317 ވޯޓެވެ. އޭނާ އިންތިހާބު ވީ އެމްޑީޕީގެ ޓިކެޓް ގަ އެވެ. ނަމަވެސް ދައުރުގެ ފަހު ބައި ހޭދަ ކުރީ ކޮންގްރެސްގެ މެންބަރެއްގެ ގޮތު އެވެ.

ނިމިގެންދިޔަ މަޖިލީސް އިންތިހާބު ގައި ކޮންގްރެސް އިން ވަނީ ސާފު މެޖޯރިޓީ ހޯދާ ފަ އެވެ. ކޮންގްރެސްގެ ޓިކެޓް ގައި ވާދަކުރި 89 ކެންޑިޑޭޓުންގެ ތެރެއިން 66 ކެންޑިޑޭޓުން އިންތިހާބު ކާމިޔާބު ކުރި އެވެ.

ރައީސް މުއިއްޒުގެ ތާއީދާ އެކު އަމިއްލަ ގޮތުން ވާދަކުރި ގިނަ ކެންޑިޑޭޓުން ވެސް ވަނީ އިންތިހާބު ކާމިޔާބު ކޮށްފަ އެވެ. އަމިއްލަ ގޮތުން އިންތިހާބު ވި ހަތް މެންބަރަކު ވަނީ މީގެ ކުރީން ކޮންގްރެސްއާ ގުޅިވަޑައިގެންފަ އެވެ. އެއީ؛

މި މެންބަރުންނާއެކު ކޮންގްރެސްގެ މެންބަރުންގެ އަދަދު 74 އަށް އެރީ އެވެ. ސަރުކާރަށް އެއްބާރުލުން ދޭނެ މެންބަރުންގެ އަދަދު 75 ވުރެ އިތުރުވާނެ އެވެ. މާމިގިލީ ދާއިރާގެ މެންބަރު ގާސިމް އިބްރާހިމާއި މީދޫ ދާއިރާގެ މެންބަރު އަހްމަދު ސިޔާމް އާއި މާފަންނު އުތުރު ދާއިރާގެ މެންބަރު މުހައްމަދު ނާޒިމް ވެސް އިންތިހާބުވެވަޑައިގެންނެވީ ރައީސްގެ ތާއީދާ އެކު ކަމަށް ވާތީ އެ ބޭފުޅުންގެ ވެސް އެއްބާރުލުން ސަރުކާރަށް ދޭނެ ކަމަށް ބެލެވެ އެވެ.

ސިޔާމްގެ އެމްޑީއޭ އާއި ނާޒިމްގެ އެމްއެންޕީ އަކީ ސަރުކާރުގެ ބައިވެރީންނެވެ.