މަސްވެރި އުފެއްދުންތަކަށް މާކެޓް ހޯދާ ކުންފުންޏަށް ވެރީން ލައިފި

މަސްވެރި އުފެއްދުންތަކަށް މާކެޓް ހޯދަން އުފެއްދި "މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ލިމިޓެޑް" ގެ ބޯޑަށް މެންބަރުން އައްޔަނު ކޮށްފި އެވެ.  

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން މިއަދު ވަނީ "މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ލިމިޓެޑް" ގެ ޑިރެކްޓަރުންގެ ބޯޑަށް މެންބަރުން އައްޔަނު ކޮށް އެކަން ހާމަކޮށްފަ އެވެ.

އެ ކުންފުނީގެ އެމްޑީއަކަށް ހަމަޖެއްސެވީ ދ. މާއެނބުދޫ، ދިލްކުސާގެ އަހްމަދު ޒަރީރެވެ. އޭނާ އަކީ އެ ދާއިރާގެ ތަޖުރިބާކާރެކެވެ. އެންމެ ފަހުން ހުންނެވީ ބެންކު އޮފް މޯލްޑިވްސްގެ ބޯޑް މެންބަރަކަށެވެ. ޒަރީރުގެ އިތުރުން ދެން ބޯޑްގައި ހިމެނެނީ؛

ދަރަންޏަށް ޒިންމާވާންޖެހޭ މިންވަރު ކަނޑައެޅިފައިވާ ސަރުކާރުގެ ސައްތައިން ސައްތަ ހިއްސާ އެކުލެވިގެންވާ "މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ލިމިޓެޑް" އުފެއްދީ ފެބްރުއަރީ 5، 2024 ގަ އެވެ.

މި ކުންފުނި އުފެއްދުމުގެ މަގްސަދުތަކުގެ ތެރޭގައި ރާއްޖޭގެ މަސްވެރިކަމުގެ ސިނާއަތް އިތުރަށް ފުޅާކޮށް މުޖުތަމައަށް އެ ސިނާއަތުން ލިބިދޭ މަންފާ އިތުރުކުރުމަށްޓަކައި އެކުއާކަލްޗާ އާއި މެރިކަލްޗާ ފަދަ ކަނޑުފަޅުގެ އެންމެހާ ވަސީލަތްތަކުން އުފައްދާ އުފެއްދުންތައް ހިމެނޭ ގޮތުން ރާއްޖޭގައި ކުރާ މަސްވެރިކަމުން އުފައްދާ އުފެއްދުންތައް ބައިނަލްއަގްވާމީ ބާޒާރުގައި އިޝްތިހާރުކޮށް ޕްރޮމޯޓްކުރުން ހިމެނެ އެވެ. އަދި އޭގެ ވިޔަފާރިން ލިބޭ މަންފާ އިތުރު ކުރުމަށްޓަކައި ރާއްޖޭގެ މަސްވެރިކަމަށް ހާއްސަ ބްރޭންޑެއް ތައާރަފުކޮށް ގައުމީ ބާޒާރާއި ބައިނަލްއަގްވާމީ ބާޒާރަށް ނެރުމާއި ފެންވަރު ރަނގަޅު އަދި މަތީ އަގު ލިބޭ ތަފާތު ބާޒާރުތަކުގައި ރާއްޖޭގެ މަސްވެރިކަމުގެ އުފެއްދުންތަކަށް ހިއްސާ ހޯދުން ވެެސް ހިމެނެ އެވެ.

"މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން" އުފައްދަން ނިންމީ ޑިސެންބަރު 17، 2023 ގައި ބޭއްވި ކެބިނެޓް ބައްދަލްވުމުގަ އެވެ.