އޭދަފުށީގައި 1000 ހައުސިން ޔުނިޓު އަޅަން ޗައިނާ ކުންފުންޏަށް

އޭދަފުށީގައި 1000 ހައުސިން ޔުނިޓު އަޅަން ޓެކްނިކަލް އަދި ފައިނޭޝިއަލް ޕްރޮޕޯސަލް ތައްޔާރު ކުރަން ހަވާލުކޮށްފި އެވެ.

އެ މަަސައްކަތް ހަވާލުކޮށްފައި ވަނީ ސައިނޯހައިޑްރޯ ކޯޕަރޭޝަން ލިމިޑެޓަށެވެ. އެއީ ޗައިނާގެ ކުންފުންޏެކެވެ.

އިމާރާތްކުރުމާއި ބިނާރާ ބެހޭ  ވުޒާރާ އިން މިއަދު ވަނީ އެ ކުންފުންޏާ އެކު އެއްބަސްވުމުގައި ސޮއި ކޮށްފައެވެ. އެއްބަސް ވުމުގައި ސޮއި ކުރެއްވީ މިނިސްޓަރު އަބްދުﷲ މުއްތަލިބާއި ޗައިނާ ކުންފުނީގެ ކަންޓްރީ މެނޭޖާ ޕޭން ގުއާންޒޫ އެވެ.

އެ ވުޒާރާ އިން ބުނީ މި އެއްބަސްވުމުގެ ދަށުން އޭދަފުށީގައި 1000 ހައުސިން ޔުނިޓު އަޅަން ޓެކްނިކަލް އަދި ފައިނޭޝިއަލް ޕްރޮޕޯސަލް ތައްޔާރު ކުރާނެ ކަމަށެވެ.

އޭދަފުށީ ގައި 1،000 ހައުސިން ޔުނިޓް އެޅުމުގެ މަޝްރޫއުއެއް ހިންގަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރެއްވީ މިދިޔަ މަހުގެ ފަސް ވަނަ ދުވަހުގެ ރެ އެވެ. ރައީސް އެ ރޭ ވިދާޅުވީ އެއީ މެންބަރު ސަލީމްގެ އިހްލާސްތެރި މަސައްކަތް ވަރަށް ބޮޑަށް އޮވެ ފެށޭ މަޝްރޫއުއެއް ކަމަށެވެ.

"1000 ހައުސިން ޔުނިޓް މިއީ ރަށަށް އަދި ދާއިރާއަށް އަދި އަތޮޅަށް ވެސް އޭގެ ފައިދާ ވާނެ ކަމެއް. މި މަޝްރޫއުގެ ސަބަބުން ގެދޮރުގެ މައްސަލައަށް ބޮޑު ހައްލެއް އަންނާނެ،" ރައީސް ވިދާޅުވި އެވެ.