ކޮލަމެއް: ހަދިޔާ ރާފުޅި އިންސްޓަގްރާމަށް ލާކަށް ނުޖެހޭ!
ޝަމީމްގެ މިއަމަލާއި ގުޅިގެން ޝަމީމް މަޤާމުން ވަކި ކުރެއްވުމަށް ސަރުކާރަށް ގޮވާލައި ޝެއިހް އަލީ ޒައިދު ޓްވީޓް ކުރެއްވުމުން ޒައިދުމެންގެ އިހްލާސްތެރިކަމާއި މެދު ސުވާލު ކުރާނެ ޖާގަ އެބައޮތެވެ. ޝެއިހް އަލީ ޒައިދާއި ޑރ. އިޔާޒަކީ ސަރުކާރަށް، ވަކިން ޙާއްސަކޮށް ރައީސް ސޯލިހަށް ވަރަށް ބޮޑަށް ތާއީދު ކުރައްވާ ދެ ބޭފުޅުންނެވެ. ސަރުކާރުގެ އިސްބޭފުޅުންގެ މިފަދަ އެތައް އަމަލަކާއި ގޯސް އެތައް ސިޔާސަތުތަކެއް ފެންނަން ހުރި އިރު ވެސް ޓްވީޓެއް ކޮށްލައްވާފައި، އެއާއި ވިދިގެން ރައީސް ސޯލިހަށް ސަނާ ކިއުއްވަ އެވެ.
ދުނިޔޭގެ އެކި ޤަމުތަކުގެ ޕްރޮސެކިއުޓާ ޖެނެރަލުންގެ 27 ވަނަ ބައިނަލްއަގުވާމީ ބައްދަލުވުން ޖޯޖިޔާގައި އޮތްކަމާއި، އެބައްދަލުވުމަށް ރާއްޖޭގެ ޕްރޮސެކިއުޓަރު ޖެނެރަލް ވަޑައިގެންނެވިކަން ދިވެހީންނަށް ރޭކާވެސް ނުލަ އެވެ. ރޭކާލީ ޕްރޮސެކިއުޓަރު ޖެނެރަލް ހުސައިން ޝަމީމް ޖޯޖިޔާއަށް ވަޑައިގެން ބަނގުރާފުޅިއެއް ހިއްޕަވައިގެން ހުންނެވި ފޮޓޯއެއް ޝަމީމްގެ އިންސްޓަގްރާމަށް ލެއްވުމުންނެވެ. ދިވެހި ދައުލަތުގެ އެންމެ އިސް ގާނޫނީ ވަކީލް، ނުވަތަ ހުރިހާ ކުށްވެރީންގެ މައްޗަށް ދައުވާ ކުރައްވަން ހުންނަވާ އިސްފަރާތް ކަމުގައިވާ ޝަމީމް ބަނގުރާ ފުޅިއަކާއެކު ހުންނެވި ފޮޓޯއެއް އިންސްޓަގްރާމަށް ލެއްވުމުން އެކަމާ އެތައް ބަޔަކު ރުޅި އައިސްގެން ސޯޝަލް މީޑިއާ އަށް އުދާސްތައް އޮއްސައިލިއެވެ.
ޝަމީމްގެ ރައްދަކީ އެއީ ޖޯޖިޔާ އަށް ދިޔަ ހުރިހާ ޕްރޮސެކިއުޓަރު ޖެެނެރަލުންނަށް އެ ގައުމުން ދިން ހަދިޔާ އެއް ކަމެވެ. ކޮންމެ މީހަކަށް އަގުބޮޑު ރާފުޅިއެކެވެ. ބޭރު ގައުމަކަށް ދިއުމުން އިސްލާމީ ގައުމެއްގެ އިސް ބޭފުޅަކަށް ބަނގުރާފުޅިއެއް ހަދިޔާ އަކަށް ދިނުމުން ކުރަން އެންމެ ރަނގަޅު ކަމަކީ އެފުޅި ހިފައިގެން ހުރެ ފޮޓޯއެއް ނަގައި، އެފޮޓޯ އިންސްޓަގްރާމަށް ލުމެއް ނޫނެވެ. ޝަމީމް ވިދާޅުވަނީ އޭނާގެ އިންސްޓަގްރާމް އެކައުންޓަކީ "ޕްރައިވެޓް" (ނުރަސްމީ، އަމިއްލަ) އެކައުންޓެއް ކަމަށާއި އެއީ އެހެން ބަޔަކު ކަންބޮޑުވާން ޖެހޭ ކަމެއް ނޫން ކަމަށެވެ. ޝަމީމަކީ ދިވެހީންގެ ތެރެއިން ކުށް ކުރާ މީހުންގެ މައްޗަށް ދައުވާ ކުރައްވަން ހުންނަވާ ފަރާތެވެ. ޝަމީމްގެ އިންސްޓަގްރާމް އެކައުންޓު ފޮލޯ ކުރައްވާ ފަރާތްތަކުގެ ތެރޭގައި ޕޮލިސް ކޮމިޝަނާ އާއި ސުޕްރީމް ކޯޓުގެ ފަނޑިޔާރުންވެސް ހިމެނެއެވެ. އެފަދަ އަކައުންޓަކުން ޝަމީމް ރާފުޅިއެއް ޕޯސްޓް ކުރައްވާފައި މާދަމާ ޝަމީމްގެ ލޯޔަރުން ކޯޓަށް ވަޑައިގެން ކޮންމެވެސް ދިވެއްސަކު ރާފުޅިއެއް ގެންގުޅެގެން އޭނާއާއި ދެކޮޅަށް ދައުވާ އުފުލުމުން އެކަން ވާނީ މުނާފިޤް ކަމަށެވެ.
ޝަމީމްގެ އެކައުންޓަކީ ޕްރައިވެޓް އެކައުންޓަކަށް ވުމުން ﷲ ހަރާމް ކުރެއްވި ބުއިމެއް ހިފައިގެން ހުންނެވި ފޮޓޯ އެއް އެއެކައުންޓަށް ލެވޭ ކަމުގައި ވަނީ ނަމަ، މި އުސޫލްގެ ދަށުން، އެހެން އަމިއްލަ އިންސްޓަގްރާމް އެކައުންޓަކަށް އޮރިޔާން ކާޑުގެ ފޮޓޯއެއް ވެސް ލެވިދާނެތާ އެވެ. އެއީ އަމިއްލަ އެކައުންޓެއް ކަމަށާއި އެއީ އެހެން ބަޔަކު ކަންބޮޑުވާން ޖެހޭ ކަމެއް ނޫން ކަމަސް ބުނެފައި ކޮންމެފަދަ ފޮޓޯއެއް ވެސް ލެވިދާނެތާ އެވެ. ލިވާތު ކުރުމުގެ ކުށް ސާބިތުވި ދިވެހި ފުލުހަކަށް އެއް އަހަރު ދުވަހުގެ ޖަލު ހުކުމެއް އައުމުން އެހުކުމުގެ އަދަބު ބޮޑު ވެގެން އެކަން އިސްތިއުނާފް ކުރެއްވީ ވެސް ހުސެއިން ޝަމީމެވެ. އެހެން ކަމުން ޝަމީމް ރާފުޅިއަކާއެކު ފޮޓޯއެއް ލެއްވުމުން ހައިރާން ވާކަށް ނުޖެހެއެވެ. ހައިރާން ވަނީ އިސްލާމީ މި ގައުމުގެ ސަރުކާރަށް އެކަން މައްސަލައަކަށް ވެެގެން ނޫޅޭތީ އެވެ. ކޮނޑުގަ ތިއްބަވާ ދެމަލާއިކަތުންނަށް "ދެގޮލާ" އޭ ވިދާޅުވެ ޝަމީމް ޓްވީޓް ކުރެއްވި ކަމަށް ވެސް މީޑިއާގައި ކުރިން ރިޕޯޓް ކޮށްފައި ވެއެވެ. ޔޯގާގެ ޝިރުކު ހުއްޓުވަން ނުކުތް މީހުންނާ ދެކޮޅަށް ޝަމީމްގެ ޕްރޮސެކިއުޓަރ އޮފީހުން ދައުވާ ކޮށް، ލިވާތު ކުރި މީހުންނާ ދެކޮޅަށް އެންމެ ކުޑަ ހުކުމް ކަނޑައެޅޭ ދައުވާ ވެސް ކުރެއްވި އެވެ. މިވަރުން ދެން ޝަމީމް އަކީ ކޮން ބޭފުޅެއްކަން ވިސްނޭ މީހަކަށް ވިސްނެން ޖެހެއެވެ. ރައިސް ސޯލިހަކަށް މިއިން އެއްވެސް ކަމެއް ބޮޑު ކަމަކަށް ވެވަޑައިގެން އުޅުއްވާ ތަނެއް ނުފެނެއެވެ.
ރާއްޖޭގެ ގާނޫނުތައް ބުނާ ގޮތުން ޖިނާއީ ކުށެއް ކަމަށް ދިވެހި ރާއްޖޭގައި ބަލާ ކަމެއް ރާއްޖެ އިން ބޭރުގައި ކުރި ނަމަވެސް އެއީ ކުށެކެވެ. ބަނގުރާ ބުއިމާއި ބަނގުރާ ގެންގުޅުމަކީ ރާއްޖޭގެ ގާނޫނުތަކުގައި އަދަބު ކަނޑައެޅިފައިވާ ކުށެކެވެ. ޝަމީމް ރާފުޅިއަކާއި އެކު ނެެންގެވި ފޮޓޯ އަށް ފަހު ފުލުހުން އެކަން ބަލައި ތަހްޤީގް ކުރަން ޖެހެއެވެ. ޤާނޫނަކީ ހުރިހާ ދިވެހީންގެ މައްޗަށް އެއް ހަމައެއްގައި ހިންގަން ޖެހޭ އެއްޗެކެވެ. ޝަމީމަށް ރާފުޅިއެއް ހިއްޕަވައިގެން ހުންނަަވާ ފޮޓޯ އިންސްޓަގްރާމަށް ލެއްވެންޏާ އެހެން މީހުންވެސް އެކަން ކޮށްފާނެ އެވެ. މިކަމުގައި ޝަމީމް ކުށްވެރި ނުވުމުން އެހެން މީހުންނަށް ވެސް އެކަން ހުއްދަ ކުރަންވީތޯ އެވެ؟ ގަސްތުގައި، ރާވައިގެން ފަސާދަ އާއްމު ކުރަނީ މިގޮތަށެވެ.
ޝަމީމްގެ މިއަމަލާއި ގުޅިގެން ޝަމީމް މަޤާމުން ވަކި ކުރެއްވުމަށް ސަރުކާރަށް ގޮވާލައި ޝެއިހް އަލީ ޒައިދު ޓްވީޓް ކުރެއްވުމުން ޒައިދުމެންގެ އިހްލާސްތެރިކަމާއި މެދު ސުވާލު ކުރާނެ ޖާގަ އެބައޮތެވެ. ޝެއިހް އަލީ ޒައިދާއި ޑރ. އިޔާޒަކީ ސަރުކާރަށް، ވަކިން ޙާއްސަކޮށް ރައީސް ސޯލިހަށް ވަރަށް ބޮޑަށް ތާއީދު ކުރައްވާ ދެ ބޭފުޅުންނެވެ. ސަރުކާރުގެ އިސްބޭފުޅުންގެ މިފަދަ އެތައް އަމަލަކާއި ގޯސް އެތައް ސިޔާސަތުތަކެއް ފެންނަން ހުރި އިރު ވެސް ޓްވީޓެއް ކޮށްލައްވާފައި، އެއާއި ވިދިގެން ރައީސް ސޯލިހަށް ސަނާ ކިއުއްވަ އެވެ. މި ސަރުކާރަކީ ދީނަށް ފުރައްސާރަ ކުރާ، އަދި ދީން ދިފާއު ކުރަން އެކަށީގެންވާ މަސައްކަތެއް ނުކުރާ ސަރުކާރެއްކަން ކަނޑައެޅިގެން ސާބިތުވާ ވަރަށް އެތައް ކަމެއް ހިނގާފައި ވާއިރުވެސް ޝެއިޙް އަލީ ޒައިދު އާއި ޑރ. އިޔާޒު ފަދަ މަދު އިލްމުވެރިއަކު އަދިވެސް ސަރުކާރާއި ރައީސް ސޯލިހުގެ ފަހަތްފުޅުގައި ތާއިދުގެ އަތްތިލަބަޑި ޖައްސަވަ ޖައްސަވާ އެތިއްބެވީ އެވެ. ޝަމީމްމެެނަށް މިކަމުން ލިބޭނީ ހިއްވަރެވެ. އަދިވެސް މިފަދަ އެތައް ކަމެއް ކުރައްވަފާނެ އެވެ. ކުށްވެރިން "ޕްރޮސެކިއުޓް" ކުރައްވަން ހުންނެވި އިސްބޭފުޅާގެ އަމަލު ހުރީ މިފަދަ ދަށު ދަރަަޖައެއްގަ އެވެ. ފުރަތަމަ ޕްރޮސެކިއުޓް ކުރަން ޖެހެނީ ޕްރޮސެކިއުޓާ ޖެނެރަލެވެ. ފުރަތަމަ ދައުވާ އުފުލަންވީ ޕްރޮސެކިއުޓާ ޖެނެރަލް ހުސެއިން ޝަމީމް އާއި ދެކޮޅަށެވެ.
"ބަނގުރާ ޕްރޮމޯޓްކުރާ ކަމަށް ތުހުމަތުކުރެވޭ ޕީޖީ މަގާމުން ވަކިކުރަންޖެހޭ! އިސްލާމީ ގައުމެއްގެ ޕީޖީގެ މަގާމަށް އެތައްގޮތަކުން ކުފޫހަމަނުވާ ބޭފުޅެއް! ސަރުކާރުއަތުގައި މަޖިލިސް އޮތްއިރު މިކަމާ އަޅާ ނުލާތިބުމަކީ އެއްގޮތްކަށް ވެސް ބަލައިގަނެވޭނެ ކަމެއްނޫން!" ޝެއިހް އަލީ ޒައިދުގެ ޓްވީޓް ގައި ވެއެވެ. މިފަދައިން ޓްވީޓް ކުރެއްވުމުގެ މާނައެއް ނެތެވެ. މިސަރުކާރުގެ މިފަދަ އެތައް އަމަލެއް ފެންނަން ހުރިއިރުވެސް ޝެއިހް ޒައިދާއި، ޑރ.އިޔާޒާއި، ޝެއިހް އިލްޔާސާއި، ޝެއިހް އިމްރާން އެތިއްބެވީ ސަރުކާރާއި ރައީސް ސޯލިހު ދިފާއު ކުރައްވަވައިގެނެވެ. ޝަމީމް ކުރެއްވިފަދަ ކޮންމެ ނުބައި ކަމެއްވެސް ކާޕެޓް ދަށަށް ކަހާ ލެވެއެވެ. އެކަމަކު ޝިރުކާ ދެކޮޅަށް ތެދުވި ޝެއިހުން އެތިބީ އަދިވެސް ދައުވާތަކުގެ ހިޔަނީގެ ދަށުގައެވެ. ކޮންމެ އިރަކުވެސް ގެއަށް ގޮސް އަނބިދަރީންގެ ކުރިމަތީގައި، މޫނުނިވާ ކުރި ފުލުހުން އެމީހުން ހައްޔަރު ކޮށްފާނެ ކަމުގެ ބިރުވެރިކަމުގެ ތެރޭގައެވެ.
"މިބައި މީހުން މިކުރަނީ ޤުރުއާނުގައި ސިފަކުރައްވާފައިވާ ފަދަ ވެރިކަމެކޭ ބުނެވޭނީ ކޮން ހައިސިއްޔަތަކުންތޯ" ސުވާލު ކުރައްވައި ޝެއިޙް ޝަފީއު އަބްދުﷲ ޓްވީޓް ކުރައްވާފައި ވެއެވެ. ދީނީ ކަންކަމުގައި ހަރަކާތްރެރިވާ މަޝަހޫރު ބޭފުޅެއް ކަމުގައިވާ އަލީ ރަމީޒް ޓްވީޓް ކުރައްވާފައި ވަނީ: "އެބައިމީހުންގެ ބޭނުމަކީ ﷲ ޙަރާމް ކުރެއްވިކަންތައްތައް މުސްލިމުންގެ ތެރޭގައި ފަތުރައި، މީސްތަކުން އެކަންކަމަށް ހޭނުން. ހިތާމައަކީ އިލްމަށް ނިސްބަތްވާ ދެތިން މީހަކު އެބައިމީހުންނަށް ސަނާ ކިއަމުންދާ ކަން".
އަލީ ރަމީޒުގެ ޓްވީޓް ގައި އެވަނީ ހަޤީގަތެވެ. ޝަމީމަށް ޖޯޖިޔާ އިން ރާފުޅިއެއް ހަދިޔާ ކުރިއަސް އެފުޅި ހިއްޕަވަވައިގެން ހުންނަވާ ފޮޓޯއެއް އިންސްޓަގްރާމަށް ލައްވާކަށް ނުޖެހެއެވެ. މިއީ ހަމަ ޔަޤީނުުންވެސް ރައްޔިތުންނާއި ދީނަށް ލޯބިކުރާ މީހުން ރުޅިއަރުވަން، އަދި މިފަދަ ނުބައިކަަންކަމަކީ އާދައިގެ ޖޯކަކަށް ހައްދަވަން ކުރެއްވި ނުބައި އަމަލެކެވެ. އަލީ ރަމީޒުގެ ޓްވީޓްގައިވާ ފަދައިން، ދެރަކަމަކީ އަދި ހިތާމައަކީ، މިބައި މީހުންގެ މި ހީލަތްތެރި ނުބައި އަމަލުތައް ފާޅުގައި ފެންނާން ހުރިއިރު ވެސް އިލްމަށް ނިސްބަތްވާ މަދު ބަޔަކު އެބައި މީހުންގެ ދިފާއުގައި ތިބި ކަމެވެ. އަދި އެބައި މީހުންނަށް ސަނާ ކިޔަމުންދާ ކަމެވެ. ދީނާއި ޤައުމަށް ދިމާވެފައިމިވާ ނިކަމެތިކަމުގެ ޒިއްމާ ނަގަންޖެހޭނީ އެފަދަ ފަރާތްތަކުންނެވެ.
ކޮމެންޓް
Republic of Maldives