ސައުދީ ޕްރައިމް މިނިސްޓަރު ކަމަށް ޕްރިންސް މުހައްމަދު

ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒް ރަސްކަމުގެ އަމުރެއް ނެރުއްވައި ރަސްކަމުގެ ހިންގުމަށް ބޮޑު ބަދަލެއް ގެންނަވައިފި އެވެ، ރަސްކަމުގެ ގަރާރަކުން ގެންނެވި އެންމެ ބޮޑު ބަދަލަކީ އެ ގައުމުގެ ވަޒީރުންގެ މަޖިލީހަށް ބަދަލު ގެންނެވުމެވެ.

ސަލްމާން ރަސްގެފާނުގެ އެ ގަރާރުގައިވާ ގޮތުން ދަރިކަލުން އަދި ވަލީއަހުދު މުހައްމަދު ބިން ސަލްމާން ވެގެންދާނީ އެ ރަސްކަމުގެ ބޮޑުވަޒީރެށެވެ. އަދި ދަރިކަލުން ޕްރިންސް ޚާލިދު ބިން ސަލްމާނަކީ ޑިފެންސް މިނިސްޓަރެވެ، އޭނާ އަކީ ކުރިން ޑެޕިއުޓީ ޑިފެންސް މިިނިސްޓަރެވެ.

އެމްބީއެސް ގެ ނަމުން މަޝްހޫރުވެ ވަޑައިގެންފައިވާ އާ ބޮޑު ވަޒީރު ޕްރިންސް މުހައްމަދު ކުރީން ޑިފެންސް މިނިސްޓަރުކަން ކުރައްވާފައިވާއިރު، ދުނިޔޭގެ ތެޔޮ އެކްސްޕޯޓްކުރާ އެންމެ ބޮޑު ގައުމު އަދި މެދުއިރުމަތީގައި އެމެރިކާގެ ބޮޑު އެކުވެރިޔާގެ ގޮތުގައި އޮތް ސައުދީ އަރަބިއްޔާގެ ޑިފެކްޓޯ ވެރިއެއްގެ ގޮތުގައި ހުންނެވި އެވެ.

ރަސްގެފާނުގެ އެ ގަރާރާއެކު މިނިސްޓަ އޮފް ސްޓޭޓްގެ މަގާމަށް އައްޔަން ކުރެއްވީ ޕްރިންސް ތުރުކީ ބިން މުހައްމަދު ބިން ފަހުދު ބިން އަބްދުލް އަޒީޒެވެ. ކުޅިވަރާ ބެހޭ ވަޒީރު ކަމަށް ޕްރިންސް އަބްދުލް އަޒީޒް ބިން ތުރުކީ ބިން ފައިސަލެވެ. އެޑިއުކޭޝަން މިނިސްޓަރު ކަމަށް ޔޫސުފް އަލް ބެންޔާން އައްޔަން ކުރެއްވި އެވެ.

ކެބިނެޓްގައި މަގާމުތައް ހިފަހައްޓަވާ ވަޒީރުންނަކީ މިނިސްޓާ އޮފް އެނާޖީގެ ޕްރިންސް އަބްދުލްއަޒީޒް ބިން ސަލްމާނާއި މިނިސްޓާ އޮފް ފޮރިން އެފެއާޒްގެ ޕްރިންސް ފައިސަލް ބިން ފަރުހާނާއި މިނިސްޓާ އޮފް އިންވެސްޓްމަންޓްގެ މަގާމުގައި ހުންނެވި ޚާލިދު ބިން އަބްދުލް އަޒީޒް އަލް ފާލިހާއި މިނިސްޓަރ އޮފް އިންޓީރިއާ ޕްރިންސް އަބްދުލްއަޒީޒް ބިން ސައުދު ބިން ނާއީފް ބިން އަބްދުލްއަޒީޒާއި މިނިސްޓާ އޮފް ފިނޭންސް މުހައްމަދު ބިން އެވެ އަބްދުﷲ އަލް ޖާދާން އެވެ.

މިދިޔަ ދެ އަހަރެއްހާ ދުވަހުގެ ތެރޭގައި އެތައް ފަހަރެއްގެ މަތިން ހޮސްޕިޓަލުގައި އެޑްމިޓް ކުރައްވަން ޖެހި ވަޑައިގެންނެވި، ސަލްމާން ރަސްގެފާނު ކެބިނެޓަށް މި ބަދަލުތައް ގެންނެވި ނަމަވެސް އެ ރަސްގެފާނު ބައިވެރިވެވަޑައިގަންނަވާ ކެބިނެޓް ބައްދަލުވުންތަކުގައި އަދިވެސް ރިޔާސަތު ބަލަހައްޓަވާނެ އެވެ.

ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒް ރަސްކަމުގެ ހިންގުމަށް ބޮޑު ބަދަލެއް ގެންނެވި ނަމަވެސް މީގެ މައިގަނޑު ސަބަބު އަދި އިއުލާން ކުރައްވާފައެއް ނުވެ އެވެ. އެހެން ނަމަވެސް މީ ޕްރިންސް މުހައްމަދު ގައުމަށް ގެންނަ ބޮޑު ބަދަލަށް ޖާގަ ދިނުމުގެ ގޮތުން ގެންނަ ބަދަލެއް ކަމަށް މީޑިއާ ރިޕޯޓްތައް ބުނެ އެވެ.

ސައުދީ އިގްތިސޯދުގައި ތެލަށް ބަރޯސާވެފައި އޮންނަ އޮތުމުގެ ތަފާތު ކުޑަ ކުރުމަށް ޕްރިންސް މުހައްމަދު މަސައްކަތް ކުރައްވަ އެވެ. އަންހެނުންނަށް އެއްގަމު ދުއްވުމުގެ ހުއްދަ ދެއްވުމާއިެކު ސައުދީ އާންމު ސޮސައިޓީއަށް ވަނީ ވަރަށް ބޮޑަށް ބަދަލު ގެންނަވާފަ އެވެ. އޭނާގެ އިސްލާހުތަކާ ހިޔާލު ތަފާތުވެ ދެކޮޅަށް އަޑު އުފުލާނަމަ ބޮޑު ފިޔަވަޅުތަކެއް އަޅައި، އެކްޓިވިސްޓުންނާއި ޝާހީ ފަރާތްތަކާއި އަންހެނުންގެ ހައްގުތަކަށް މަސައްކަތްކުރާ މީހުންނާއި ވިޔަފާރިވެރިން ޖަލަށްލާ ކަމަށް ތުހުމަތު އޮވެއެވެ.

ތުރުކީގެ ވެރިރަށް އިސްތަންބޫލްގައި ހުންނަ ސައުދީ ކޮންސިއުލޭޓުގައި 2018 ވަނަ އަހަރު ސައުދީގެ އަޑު ގަދަ އަދި އެމެރިކާއިން ފަންޑު ކުރާ ކަމަށް ބުނާ ނޫސްވެރިޔާ ޖަމާލް ޚާޝުގީ މަރާލުމާ ގުޅިގެން ޕްރިންސް މުހައްމަދަށް ތުހުމަތުތައް ކުރެވި އޭނާގެ އަބުރު ގެއްލި، އެމެރިކާ އާއި ހުޅަނގާ ގުޅިފައިވާ ގައުމުތަކުން ސައުދީ ރަސްކަމާ ދެމެދު އޮންނަ ގުޅުމަށް ހީނަރުކަން އައިސްފައި ވެއެވެ.