ބޮޑުތިލަދުންމައްޗަށް އާރުޓީއެލް ފެރީ ރަސްމީ ކޮށްދެއްވައިފި

ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ހިދުމަތުން ބޮޑު ތިލަދުންމަތީގެ 41 ރަށް ގުޅާލާ އެ ހިދުމަތް މިރޭ ރަސްމީކޮށް އިފްތިތާހުކޮށްފި އެވެ. "ބޮޑުތިލަދުންމަތި ގުޅުން" މި ނަމުގައި މިރޭ ތިލަދުންމަތީ އުތުރުބުރީގެ ވެރިރަށުގައި އޮތް ހާއްސަ ޖަލްސާއެއްގައި މި ހިދުމަތް ރަސްމީކޮށް ދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ.

ކުލަގަދަ ކޮށް މިރޭ އޮތް މި ރަސްމިއްޔާތުގެ ކުރީން "ބޮޑުތިލަދުންމަތި ގުާޅުން" އިފްތިތާހުކޮށް ދެއްވުމުގެ ގޮތުން ރަައީސް އިބްރާހިމް މުހައްމަދު ސޯލިހް މިއަދު ވަނީ މި އަތޮޅު އުތީމުން ދިއްދޫއަށް އާރުޓީއެލް ފެރީގައި ދަތުރު ކުރައްވާ އެ ހިދުމަތް ތަޖުރިބާ ކުރައްވާފަ އެވެ.

މުޅި ރާއްޖެ ކަނޑުމަގުން ގުޅާލެވޭ ރާއްޖެ ޓްރާންސްޕޯޓް ލިންކް ހައި ސްޕީޑް ފެރީ ހިދުމަތަކީ ރައީސް ސޯލިހުގެ ވައުދެކެވެ. "އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކް" މަޝްރޫއުގެ ފުރަތަމަ ފިޔަވަހި ސަރުކާރުން އެމްޓީސީސީ އާއި ހަވާލު ކުރީ ޖެނުއަރީ 17، 2021 ގައެވެ. މި މަޝްރޫއުގެ ފޭސް 1 ގެ ދަށުން، ޒޯން 1 ގެ ހއ، ހދ އަދި ށ. އަތޮޅަށް މިހާރު ވަނީ ރާއްޖެ އާރްޓީއެލް ފެރީގެ ހިދުމަތް ދޭން ފަށާފަ އެވެ. އަދި މި މަޝްރޫއުގެ ފޭސް ދޭއެއް އަދި ފޭސް ތިނެއްގެ ދަށުން ބާކީ 17 އަތޮޅަށް ހިދުމަތް ދޭން ފަށާ މުޅި ރާއްޖެ ކަނޑު ދަތުރުފަތުރުގެ ވިއުގައަކުން ގުޅާލަން ސަރުކާރުން ވަނީ ނިންމާފަ އެވެ.

ފުރަތަމަ ޒޯނުގާ ހިދުމަތް ފަށާފައި ވަނީ ޒަމާނީ ދުވެލި ހަލުއި އުޅަނދު ތަކެއްގަ އެވެ. މިގޮތުން ކުރިއަށްވުރެ އެތައް ގުނައެއް އަވަސްކޮށް ބާރު ދުވެލީގައި މިހާރު ދަތުރުތައް ކުރެވޭނެ އެވެ. އެއާކޯން ކޮށްފައިވާ މި އުޅަނދުތައް ހުންނާނީ ހާއްސަ އެހީއަށް ބޭނުންވާ މީހުންނަށް ވެސް ފަސޭހައިން އަރައި ފޭބޭ ގޮތަށް އަދި ބަލިމީހުން އުފުލުމަށް ވެސް ފަސޭހަ ވާނެ ގޮތަށެވެ. މި ފެރީ ލޯންޗުތަކުގައި ފާހާނާ އާއި ލަގެޖް ބެހެއްޓޭ ޖާގަ ވެއެވެ. މިއީ ރާއްޖޭގެ މޫސުމާ އޮއިވަރާއި ބާންޏާއި ރާޅަށް ބަލައި ދެ މޫސުމަށް ވެސް، ފަހިވާނޭހެން ބަނދެފައިވާ ކަނޑަށްވެސް ގަދަ އުޅަނދު ތަކެއް ކަމަށް އެމްޓީސީސީން ބުނެ އެވެ.

އާރްޓީއެލް ފްލީޓްގައި ޒަމާނީ 13 ފެރީ މި ވަގުތު އެބައޮތެވެ.އެއީ މި ޒޯނުގެ 41 ރަށަށް ހަފުތާގެ ކޮންމެ ދުވަހަކުވެސް ހިދުމަތްދޭ އުޅަނދުތަކެކެވެ.

އާރްޓީއެލްގެ ހިދުމަތް ރައްޔިތުންނަށް ފޯރުކޮށް ދެނީ ޓެކްނޮލޮޖީއާ ވަރަށް ރަށްޓެހި ހިދުމަތެއްގެ ގޮތުގައެވެ. ކޮންމެ ތަނެއްގަ ހުރެގެން ކޮންމެ ވަގުތަކުވެސް ފޯނު މެދުވެރިކޮށް ދަތުރު ޝެޑިއުލް ބަލައިލެވެ އެވެ. ޓިކެޓު ބުކް ކޮށްލެވެ އެވެ. އަދި ޓިކެޓަށް ފައިސާ ވެސް ދެއްކެ އެވެ. ފޯނު ނެތަސް ޓިކެޓުގެ ނަންބަރު ދައްކާލައިގެން ދަތުރު ކުރެވޭނެ އެވެ. ޓިކެޓް ނެގުމަށް އާރްޓީއެލް ވެބްސައިޓް އަދި އެޕްލިކޭޝަން ބޭނުން ކުރެވެ އެވެ.

ރާއްޖެ ޓްރާންސްޕޯޓް ލިންކް (އާރްޓީއެލް) ސްޕީޑް ފެރީގެ ހިދުމަތް ހަ ޒޯނުގައި ފެށޭއިރު ޒަމާނީ ފެރީގެ ހިދުމަތް ދޭ 82 އުޅަނދެއް އޮންނާނެ އެވެ. އަދި 188 ފެރީ ޓާމިނަލް ހުންނާނެ އެވެ. އަދި މި އުޅަނދުތަކަށް ހިދުމަތް ދޭނެ ބޯޓުޔާޑު ރާއްޖޭގެ ތިން ސަރަހައްދެއްގައި ގާއިމު ކުރެވޭނެ އެވެ.

އެމްޓީސީސީން ބުނީ އެ ކުންފުނީގެ އަމާޒަމީ ކުރިއަށް އޮތް 24 މަސް ދުވަސްތެރޭ މުޅި ރާއްޖެ ކަނޑުދަތުރުފަތުރުގެ ވިއުގައަކުން ގުޅާލުމެވެ. އެގޮތުން ކުރިއަށް އޮތް ނުވަ މަސް ދުވަސްތެރޭ ނުވަ އަތޮޅެއްގައި މި ހިދުމަތް ތައާރަފު ކުރަން ކުރަންޖެހޭ މަސައްކަތްތައް މިހާރު ދަނީ ކުރަމުންނެވެ. މުޅި ރާއްޖެއަށް މި ހިދުމަތް ފުޅާވެގެން ދާއިރު 800 އެއްހާ ވަޒީފާ އަލަށް އުފެދިގެން ދާނެ އެވެ.