އެތެރޭގެ ބާޒާރަށް، ހަތަރު ބިލިއަން ރުފިޔާގެ ޓީބިލް ވިއްކަނީ

ބޮޑު ކުރި މުސާރަ ދިނުމާއި ދައުލަތުގެ ހަރަދުތައް ފޫބައްދަށް ބޭނުންވާ ފައިސާ ހޯދަން، އެތެރޭގެ ބާޒާރުން ފައިސާ ހޯދަން ސިލްސިލާކޮށް ހިންގާ ހަރަކާތުގެ ތެރެއިން، ހަތަރު ބިލިއަން ރުފިޔާގެ ޓީ-ބިލް ވިއްކަން ހުޅުވާލައިފި އެވެ. 

ފައިސާ ޗާޕު ކުރުން ހުއްޓާލުމަށް ފަހު ފިނޭންސް މިނިސްޓްރީން ވަނީ މިދިޔަ ހަފުތާގައި ހަތަރު ބިލިއަން ރުފިޔާގެ ޓީބިލް ވިއްކަން ވަނީ ހުޅުވާލާފަ އެވެ. ސަރުކާރުން އެތެރޭގައި ޓީބިލް ވިއްކަމުން ގެންދަނީ ދުރާލާ ދައުލަތަށް ދަރަންޏަށް ފައިސާ ދޭނެ ބަޔަކު ހޯދަން އިއުލާނު ކުރުމަށް ފަހު އެވެ. މިއީ ރާއްޖޭގެ ތާރީހުގައި މިހާ ފާޅުކަން ބޮޑު ގޮތެއްގައި އިއުލާނު ކުރި ފުރަތަމަ ފަހަރެވެ. 

ސަރުކާރުން ވަނީ ބަޖެޓު ޑެފިސިޓަށް ބޭނުންވާ ފައިސާ ޓީބިލް / ބޮންޑު މެދުވެރިކޮށް ފޯރު ކޮށްދޭނެ ފަރާތްތަކެއް ހޯދަން އިއުލާނު ކޮށްފަ އެވެ. އެގޮތުން މި އަހަރަށް 550 މިލިއަން ޑޮލަރު (8.5 ބިލިއަން ރުފިޔާ) ބޭނުންވާނެ ކަމަށް އެ އިއުލާނުގައި ބުނެފައިވެ އެވެ. 

ޓީބިލްގެ މި އަދަދުގެ ތެރޭން އެންމެ ބޮޑު އަދަދެއް ވިއްކަނީ އަންނަ އަހަރުގެ އޭޕްރީލް ހަތް ވަނަ ދުވަހަށް މުއްދަތު ހަމަވާ ދެ ބިލިއަން ރުފިޔާގެ ޓީބިލެވެ. މިއީ އެންމެ ދިގު މުއްދަތުގެ ޓީބިލެވެ. 

މި އަހަރު ބަޖެޓުގެ ހަރަދުތައް ހަމަޖައްސަން ސަރުކާރަށް 16.3 ބިލިއަން ރުފިޔާ ބޭނުންވެ އެވެ. މި ފައިސާގެ ތެރޭން އެތެރޭގެ ބާޒާރަށް ޓީބިލާއި އިސްލާމިކް އިންސްޓްރޫމަންޓް ވިއްކައިގެން ހޯދަން ކަނޑައަޅާފައި ވަނީ 3.1 ބިލިއަން ރުފިޔާ އެވެ. އެތެރޭގެ ބާޒާރަށް ޓްރެޝަރީ ބޮންޑް ވިއްކައިގެން 800 މިލިއަން ރުފިޔާ ލިބޭނެ ކަމަށް އަންދާޒާކޮށްފައިވެ އެވެ. އަދި ބޭރުގެ ފަރާތްތަކުން ލޯނު ނަގައިގެން 4.7 ބިލިއަން ރުފިޔާ ހޯދާއިރު، ބޭރުގެ ބަޖެޓް ސަޕޯޓް ލޯން ބޮންޑް އަދި ސްކޫކް 6.9 ބިލިއަން ރުފިޔާ ހޯދާނެ އެވެ. އަދި ގްރީން ނުވަތަ ބްލޫ ބޮންޑް ވިއްކައިގެން 771 މިލިއަން ރުފިޔާ ހޯދަން ކަނޑައަޅާފައިވެ އެވެ.