ހުޅުމާލޭގައި ދެ މިސްކިތެއް އަޅަން ބިން ހަވާލު ކޮށްފި

ހުޅުމާލޭގައި ދެ މިސްކިތެއް ތަރައްގީ ކުރަން އެޗްޑީސީން މިއަދު އިސްލާމިކް މިނިސްޓްރީއާ ބިން ހަވާލު ކޮށްފި އެވެ. 

ދެ މިސްކިތް އަޅަން ބިން ހަވާލުކޮށް އެއްބަސްވުމެއްގައި ސޮއި ކުރި ރަސްމިއްޔާތުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ބައިވެރިވެ ވަޑައިގަތެވެ. 

މިއީ ހުޅުމާލޭގެ ހިޔާ އަވަށް / ފޭސް ދޭއްގައި ބިނާކުރާ މިސްކަތަކާއި، ހުޅުމާލޭ ފޭސް ތިނެއްގައި ބިނާ ކުރާ މިސްކިތެކެވެ.

މިސްކިތް ބިނާ ކުރުމަށް ހުޅުމާލޭ ދެވަނަ ފިޔަވަހިން ދޫކޮށްފައި ވަނީ 27،920 އަކަފޫޓުގެ ބިމެކެވެ. އަދި ހުޅުމާލޭ ތިން ވަނަ ފިޔަވަހިން ދޫކޮށްފައި ވަނީ 21،952 އަކަފޫޓޫގެ ބިމެކެވެ.

ދާދި ފަހުން ވަނީ ހުޅުމާލެ ހިޔާ އަވަށުގައި މިސްކިތެެއް ބިނާ ކުރަން އަމިއްލަ ފަރާތަކަށް ވެސް ދީފަ އެވެ. އަދި އޭގެ ކުރީން ހިޔާ އަވަށް / ފޭސް ދޭއްގައި ބިނާ ކުރާ ދާއިމީ މިސްކިތްތަކުގެ ފުރަތަމަ މިސްކިތް ވަނީ ހުޅުވާފަ އެވެ. އެއީ 1500 މީހުންގެ ޖާގައިގެ މިސްކިތެކެވެ. 

ހުޅުމާލޭގައި ދިރިއުޅޭ އާބާދީއަށް ބޭނުންވާ ހިދުމަތްތަކާއި ވަސީލަތްތައް ފުރިހަމަ ކޮށްދިނުމަށް އެޗްޑީސީން  މަސައްކަތް ކުރެ އެވެ.