އަމީނީ މަގު ހަދަން ގަސް ނަގާނަމަ ޝަރީއަތަށް ދާނަން: ނަޝީދު
ރައީސް ނަޝީދު ވިދާޅުވަނީ ގަސްތައް ނުކަނޑައި މަގު ހެދޭނެ ގޮތެއް ހޯދަން ޖެހޭނެ ކަމަށެވެ. އަމީނީ މަގު ހަދައި ތާރު އަޅަނީ ކަމަށް ބުނެ އެ މަގުގައި ހުރި ގަސްތައް ކަނޑައި ނަގަމުން ގެންދާ ކަމަށެވެ. އަދި އެ މައުލޫމާތު ލިބި ވަޑައިގެންފައިވާ ކަމަށެވެ.
އަމީނީ މަގުނަ ހަދަން ގަސްތައް ނެގުމާއި ކެނޑުމާއި ކޮށުން ހުއްޓާލައި އެކަމުގައި ދެވަނަ ވިސްނުމަކަށް ސަރުކާރާއި އެ މަސައްކަތް ކުރާ އާރްޑީސީން ނުދާނަމަ އަމިއްލަފުޅު ހައިސިއްޔަތުން ޝަރީއަތަށް ވަޑައި ވަޑައިގަންނަވާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިއަދު އިންޒާރު ދެއްވައިފި އެވެ.
އެ މަނިކުފާނު މިއަދު މަޖިލީހުގެ ޖަލްސާ ފައްޓަވައި ދެއްވަމުން ވިދާޅުވީ އަމީނީ މަގު ހެދުމުގެ ނަމުގައި އެ މަގުގެ ގަސްތައް ނަގާ ވާހަކައިގެ ކަންބޮޑުވުން މީގެ ކުރީން ވެސް އެ މަނިކުފާނު އިސްވެ މެންބަރުންނާއި އާންމުން ރައްޔިތުންގެ ސަމާލު ކަމަށް މަޖިލީޖުގެ ރިޔާސަތުގައި އިންނަވައިގެން ގެނެސް ދެއްވާފައި ވާނެ ކަމަށެވެ. އުންމީދު ކުރައްވަނީ އާރްޑީސީ އާއި ޕްލޭނިން މިނިސްޓްރީން އެކަމުގައި ދެވަނަ ވިސްނެވުމަކަށް ދާނެ ކަމަށެވެ.
އަދި ވިދާޅުވީ އެހެން ނުވެއްޖެ ނަމަ އެ މައްސަލާގައި ފަރުދެއްގެ ހައިސިއްޔަތުގައި އެ މަނިކުފާނު ނުކުންނަވައި ދައުލަތާ ދެކޮޅަށް ޝަރީއަތަކަށް ވަޑައިގެން ދައުވާ ކުރައްވާނެ ކަމަށެވެ.
ތިމާވެށީގެ މައްސަލަތަކަށް އިސްކަން ދެއްވާ އެފަދަ ކަންކަން ސަމާލު ކަމަށް ގެނެސް ދެއްވާ ކުރީގެ ރައީސް ތަފުސީލުކޮށް ވިދާޅުވި އެވެ:
"އަޅުގަނޑު މީގެ ކުރީ ދުވަހެއްގައި އަމީނީ މަގުގައި ގަސްތައް ނަގަން ނަގަމުންދާ ވާހަކަ ދެންނެވިން އަޅުގަނޑު ހިތުން އެ ކަންބޮޑުވުން އޮތީ މާލޭގައި ދިރިއުޅޭ ވަރަށް ގިނަ ބައެއްގެ ކަންބޮޑުވުމެއްގެ ގޮތުގައި... އަޅުގަނޑު އުންމީދު ކުރަން އާރްޑީސިންނާއި ސަރުކާރުގެ ޕްލޭނިން މިނިސްޓްރީން މިކަމާ އިތުރު ވިސްނުމަކަށް ވަޑައިގަންނަވާނެ ކަމަށް. އެހެން ނޫން ނަމަ އަމިއްލަ ފަރުދެއްގެ ހައިސިއްޔަތުން ޝަރީއަތަށް ދިއުން ނޫން ގޮތެއް މިކަމުގައި ހަގީގަތުގައި އަޅުގަނޑަކަށް ނެތް"
މި މަހުގެ 20 ވަނަ ދުވަހު މަޖިލީހުގެ ޖަލްސާގައި ރައީސް ނަޝީދު ވަނީ އަމީނީ މަގުގެ ގަސްތަކުގެ ވާހަކަ ފާހަގަކޮށް ދެއްވާފަ އެވެ. އެ ދުވަހު ވިދާޅުވީ ގަސްތައް ނުކަނޑައި މަގު ހެދޭނެ ގޮތެއް ހޯދަން ޖެހޭނެ ކަމަށާއި އަމީނީ މަގު ހަދައި ތާރު އަޅަނީ ކަމަށް ބުނެ އެ މަގުގައި ހުރި ގަސްތައް ކަނޑައި ނަގަމުން ގެންދާ ކަމަށާއި އެ މައުލޫމާތު ލިބި ވަޑައިގެންފައިވާ ކަމަށެވެ.
އެނގިވަޑައިގަންނަވާނެ ގަހެއް ހެދި ބޮޑުވުމަށް 20 އަހަރު ނަގާ، އެކަމަކު މަގެއް ހަދަން ދެ ތިން މަހެއް ނުނަގާ... އެހެންވީމާ ގަސްތައް ބަހައްޓައިގެން މަގުތައް ހެދޭނެ ގޮތެއްވޭތޯ އަޅުގަނޑުމެން ބަލަން ޖެހޭނީ،
ރައީސް މުހައްމަދު ނަޝީދު
"އެނގިވަޑައިގަންނަވާނެ ގަހެއް ހެދި ބޮޑުވުމަށް 20 އަހަރު ނަގާ، އެކަމަކު މަގެއް ހަދަން ދެ ތިން މަހެއް ނުނަގާ... އެހެންވީމާ ގަސްތައް ބަހައްޓައިގެން މަގުތައް ހެދޭނެ ގޮތެއްވޭތޯ އަޅުގަނޑުމެން ބަލަން ޖެހޭނީ،" ރައީސް ނަޝީދު މިއަދު ވިދާޅުވި އެވެ.
ފާޑު ކިޔާތީ އާރްޑީސީން ބުނަނީ ކީކޭ؟
އަމީނީމަގު ޒަމާނީ ފެންވަރަށް ހެދުމުގެ މަސައްކަތް ފަށާފައި ވާއިރު ދަރުބާރުގެ ކައިރީގައި ހުރި ބިޔަ ގަސްތައް ދަނީ ނަގަމުންނެވެ. އެ މަސައްކަތުގައި ގަސްތަކުގެ މަތި ކޮށާލަން ފެށުމުން ވަރަށް ގިނަ ބައެއްގެ ފާޑުކިޔުން އެކަމަށް އަމާޒުވެފައި ވެއެވެ. އެކަމާ ގުޅިގެން އާރްޑީސީން ބުނީ އެ ގަސްތައް ނުކަނޑާނެ ކަމަށެވެ. އެކަމަކު އެ ގަސްތައް ނެގުމަށް ފަހު އަލަށް ހަދާ ޕިކްނިކް އައިލެންޑް ކުޑަގިރި އަށް ގެންދަން ނިންމާފައިވާ ކަމަށެވެ. އާރުޑީސީން ބުނަނީ އަމީނީ މަގުން އެއްވެސް ގަހަކަށް ގެއްލުން ނުދޭނެ ކަމަށާއި މަގު ހަދައި ނިމޭއިރު އެ މަގުން ނަގާ ގަސްތަކުގެ ބަދަލުގައި ގަސް އިންދެން ހުރި ތަންތަނުގައި ގަސް އިންދައި މަގު ފެހި ކުރަން "ޓްރީޕޮޓް" ބަހައްޓާނެ ކަމަށެވެ.
ކޮމެންޓް
ސާބަހޭ ރައީސް ތީ ހަމަ ތިމާވެށީގެ ޗެމްޕިއަން، ސަރުކަރަށް ވާނެ ޖެއްސުން ކޮށްލަން އެ މީހުން ވެސް ތިމާވެއްޓާ ކުޅެންޏާ ދެއްތޯ
Republic of Maldives