ރައީސްގެ ދެކަނބަލުން އީދު ސަލާމް ކުރެއްވުން މުލިއާގޭގައި

މި އަހަރުގެ ފިތުރު އީދު ދުވަހު ރައީސް ޑރ. މުހައްމަދު މުއިއްޒު އަދި އެމަނިކުފާނުގެ އަނބިކަނބަލުން އީދު ސަލާމް ކުރެއްވުން އޮންނާނީ ރައީސުލްޖުމްހޫރިއްޔާގެ ރަސްމީ ގެކޮޅު، މުލިއާގޭގައި ކަމަށް ރައީސް އޮފީހުން ބުނެފި އެވެ.

ރައީސް އޮފީހުން މިއަދު ބުނީ އީދު ސަލާމް ކުރެއްވުން އޮންނާނީ އީދު ދުވަހުގެ 9:30 އިން 10:30 އަށް ކަމަށެވެ. 

އީދު ސަލާމް ކުރުމަށް ވީހާވެސް ގިނަ ރައްޔިތުންނަށާއި ދައުލަތުގެ އެކި މަގާމުތަކުގައި ތިއްބެވި ބޭފުޅުންނަށާއި، ބޭރުގެ އިއްޒަތްތެރިންނަށާއި، ރާއްޖޭގެ އެކި ކުންފުނިތަކާއި، އަމިއްލަ އެކިއެކި ޖަމިއްޔާތަކުގެ މަންދޫބުންނަށް ރައީސްގެ ދެކަނބަލުން ދައުވަތު އަރުއްވާ ކަމަށް ރައީސް އޮފީހުން ބުންޏެވެ.

އަދި، އާއިލާތަކާއެކު ވީހާވެސް ގިނަ އަދަދެއްގެ ކުޑަކުދިންނާއި، ވީހާވެސް ގިނަ އަދަދެއްގެ ޒުވާނުން އީދު ސަލާމުގައި ބައިވެރިވެދެއްވުމަށް ވެސް ދައުވަތު އަރުއްވާފައިވެ އެވެ.

ރައީސް އޮފީހުން ބުނީ އީދު ސަލާން ކުރުމަށް އަންނަ މީހުން މުލީއާގެއަށް ވަނުމަށް ހަމަޖެހިފައި ވަނީ މެދުޒިޔާރަތް މަގަށް ހުންނަ މުލީއާގޭ ބޮޑު ދޮރޯށިން ކަމަށެވެ. މުލީއާގެއަށް ވަދެވޭނީ ޝަހީދު އަބްދުﷲ ޒުހައިރު ހިނގުމުން މެދުޒިޔާރަތް މަގުން އައިސްގެނެވެ.

ހުރިހާ އީދެއްގައިވެސް އެ އިރެއްގައި ހުންނަ ރައީސުން ރައްޔިތުންނާ އީދު ސަލާމް ކުރައްވަ އެވެ. މިއީ ރައީސް މުއިއްޒު ވެރިކަމާ ހަވާލުވެވަޑައިގެންނެވުމަށްފަހު އަންނަ ފުރަތަމަ އީދެވެ. ފިތުރު އީދަށް ވާނީ އަންނަ ބުދަ ދުވަހެވެ.