ކުޅިވަރު ކުޅޭނެ ތަންތަން އެޅުމަށް މި އަހަރު ބޮޑު މަޝްރޫއުއެއް
ސްޕޯޓްސް ކޮމްޕްލެކްސްތަކާއި ފުޓްސަލް ދަނޑުތަކާއި ފުޓްބޯޅަށް ދަނޑުތަކާއި ވޮލީ ކޯޓާއި ހޭންޑްބޯލް ކޯޓްތައް އެޅުމަށް މި އަހަރު ގިނަ މަސައްކަތްތަކެއް ހިނގާނެ ކަމަށެވެ.
ކުޅިވަރު ކުޅޭނެ ތަންތަން އެޅުމަށް މި އަހަރަށް ގިނަ މަސައްކަތްތަކެއް ރާއްވާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިހެން ވިދާޅުވީ ރިޔާސީ އިންތިހާބުގައި ވެވަޑައިގެންފައިވާ ވައުދާއި އެއްގޮތަށް ސްޕޯޓްސް ކޮމްޕްލެކްސްތައް އެޅުމުގެ މަސައްކަތް ކުރިއަށް ރޭވިފައި އޮތީ ކިހިނެތްތޯ ޒުވާނަަކު ކުރި ސުވާލަކަށް ޖަވާބު ދެއްވަމުންނެވެ. "ރައީސްގެ ޖަވާބު" ގައި އެ ޒުވާނާ ކުރި ސުވާލަށް ޖަވާބު ދެއްވަމުން ރައީސް ވިދާޅުވީ އެމަނިކުފާނުގެ ސިޔާސަތަކީ ކުޅިވަރުގެ ދާއިރާއަށް ވަރަށް އިސްކަން އޮތް ސިޔާސަތެއް ކަމަށެވެ.
ކުޅިވަރަށް ހާއްސަ ވުޒާރާއެއް އުފެއްދެވީ ވެސް އެ ސިޔާސަތު ތަންފީޒު ކުރުމަށް ކަމަށް ވިދާޅުވި އެވެ. އެ ގޮތުން ކުޅިވަރު ކުޅޭނެ ވަސީލަތްތަކާއި ކުޅުންތެރީންނަށް ތަމްރީނާއި ފަރުވާ ފަހިކޮށް ދިނުމަށް ހާއްސަ އިސްކަމެއް ދެއްވާ މަސައްކަތް ކުރައްވާނެ ކަމަށާ މިހާތަނަށް އެ ދާއިރާ އިން ގިނަ މަސައްކަތްތަކެއް ފެށިފައިވާ ކަމަށެވެ.
ރައީސް ވިދާޅުވީ ސްޕޯޓްސް ކޮމްޕްލެކްސްތަކާއި ކުޅިވަރު ކުޅޭނެ ތަންތަން ބިނާ ކުރުމަކީ ވެވަޑައިގެންފައިވާ ވައުދެއް ކަމަށާ އެ ވައުދާއި އެއްގޮތަށް ސްޕޯޓްސް ކޮމްޕްލެކްސްތަކާއި ފުޓްސަލް ދަނޑުތަކާއި ފުޓްބޯޅަށް ދަނޑުތަކާއި ވޮލީ ކޯޓާއި ހޭންޑްބޯލް ކޯޓްތައް އެޅުމަށް މި އަހަރު ގިނަ މަސައްކަތްތަކެއް ހިނގާނެ ކަމަށެވެ.
ރައީސް ރޭ ވިދާޅުވި ގޮތުގައި އެމަނިކުފާނު ވެރިކަމަށް ވަޑައިގެންނެވިއިރު ފުޓްބޯޅަ ދަނޑުތަކާއި ވޮލީ ކޯޓްތައް ހެދުމުގެ 84 މަޝްރޫއު އޮތީ ހުއްޓިފައެވެ. އޭގެ ގިނަ މަޝްރޫއުތައް އަލުން ފަައްޓަވާފައިވާ ކަމަށް ވިދާޅުވި އެވެ.
ކޮމެންޓް
Republic of Maldives