ހުކުރު ހުތުބާ އަކީ އިންޖިނިއަރިން މެނުއަލް އަކަށް!
ޤައުމުގެ ދުވަސް ދަނީ އެވެ. ގައުމުގެ މިނިވަންކަން ގެއްލި، ރައްޔިތުންގެ ތެރޭގައި ލާދީނީ ފިކުރު އާއްމު ވެއްޖެ އެވެ. ހުކުރު ހުތުބާ އަކީ އިންޖިނިއަރިން މެނުއަލް އަކަށް ވެއްޖެ އެވެ. އަންނަ ހުކުރު ދުވަހުގެ ހުތުބާގައި އަޑު އިވޭނީ މަގުމައްޗަށް ނުކުންނަ އިރު ބަބުރު ދަނޑި އުނގުޅުމުގެ ވާހަކަ ކަމަށް ވެދާނެއެވެ.
މިދިއަ ހުކުރުގެ ހުތުބާ ވަރަށް ތަފާތެވެ. އެ ހުތުބާ ގައި މުސްލިމް އަހުންނަށް ގޮވާލީ ކަނޑު ދަތުރު ކުރާ އުޅަނދުތަކުގައި ސަމުގާ އަދި ޖީޕީއެސް ފަދަ ތަކެތި ހުރިތޯ ބެލުމަށެވެ. އަދި ދަތުރު ކުރާ އިރު ފަރުތަކާއި ތިލަތަކަށް ފަރުވާތެރި ވުމަށް ވެސް ގޮވާލިއެވެ.
"މުސްލިމް އަޙުންނޭވެ! އެއްގަމު އުޅަނދުގައި ދަތުރު ކުރާ މީހުން އެތަކެތީގެ ބުރަކި ރަނގަޅުތޯ، ތެޔޮ ހުރިތޯ، އަޑީ ތެޔޮ ބަދަލު ކުރަން ޖެހޭތޯ، އަދި ފުރޮޅުގެ ޓަޔަރުތައް ހުރީ ސަލާމަތުންތޯ ދަތުރު ފެށުމުގެ ކުރިން ބަލައި ކަށަވަރު ކުރަން ޖެހެއެވެ." ހުކުރު ހުތުބާ ގައި ކިއެވެ.
ހުތުބާ އަޑުއަހަން އިން އިރު އަނެއްކާ މި އިނދެވުނީ މިސްކިތެއްގައި ބާވައޭ ހިތަށް އެރި އެވެ. ހުތުބާ ގައި ކިޔާނެ ނުކިޔާނެ އެއްޗެއް ނޭގިގެން މިހާރު މި ދައްކަނީ ކާރުގައި އަޑީ ތެޔޮ ހުރިތޯ ބަލަން ޖެހޭ ވާހަކަ އާއި ކާރުގެ އެއާކޯންގައި ގޭސް ހުރިތޯ ބަލަން ޖެހޭ ވާހަކައެވެ. އަންނަ ހުކުރު ދުވަހުގެ ހުތުބާ ގައި މުސްލިމް އަހުންނަށް ގޮވާލާނީ ދެ ދަތް ދޭތެރެއަށް ހިކިމަސް ވަދެ ދަތަށް ތަދުވެދާނެތީ ހިކިމަސް ކެއުމުގައި ފަރުވާތެރި ވުމަށް ކަމަށް ވެސް ވެދާނެ އެވެ. ނުވަތަ ފަޓުލޫނު ގަންނައިރު ކައްގަނޑަށް ބާރު ފަޓުލޫނު ނުގަތުމަށާއި އެފަދަ ފަޓުލޫނު ލުމުން ކައްގަނޑު ފަޅައިގެން ހިނގައިދާނެ ކަމުގެ އިންޒާރު ކަމަށް ވެސް ވެދާނެ އެވެ. މުސްލިމް އަހުންނޭވެ! ގަޔަށް ބާރު ފަޓުލޫނު ނުގަންނާށެވެ. އަދި އެއާކޯން ގަންނައިރު އިންވާޓަރު އެއާކޯން ގަތުމަށް ސަމާލުވުމަށް ވެސް ހުކުރު ޙުތުބާގައި ގޮވާލާފާނެ އެވެ. ކަރަންޓު ހަރަދު ކުޑަ ކުރުމަށެވެ.
ދިވެހި ޖުމްހޫރިއްޔާގެ ޕްރޮސެކިއުޓާ ޖެނެރަލަކަށް ހުންނެވީ ދެކޮނޑުގައި ތިއްބަވާ ދެމަލާއިކަތުންނަށް ނިސްބަތް ކޮށް "ދެގޮލައޭ" ވިދާޅުވި ކަމަށް ބުނާ ބޭފުޅެކެވެ. އެބޭފުޅާ މިހާރު ބިޒީ ވެގެން އުޅުއްވަނީ އެއްޖިންސުން ގުޅުން ހިންގި ކަމަށް ސާބިތުވި ދިވެހި ފުލުހަކަށް އެއް އަހަރު ދުވަހުގެ ޖަލު ހުކުމެއް އައުމުން އެއީ މަ ބޮޑު ހުކުމެއް ކަމަށް ވިދާޅުވެ އެ އަދަބު ކުޑަ ކުރުމަށް ކޯޓުގައި އިސްތިއުނާފް ކުރެއްވުމުގަ އެވެ.
ޕްރޮސެކިއުޓާ ޖެނެރަލްގެ މަގާމްގައި ހުންވި ހުސެން ޝަމީމް އެ މަގާމަށް އެކަށީގެން ނުވާ ކަމަށް ޝެއިހު އަލީ ޒައިދު ވިދާޅުވި ކަމަށް މީޑިއާ ތަކުން ރިޕޯރޓް ކޮށްފައި ވެއެވެ. ޝެއިހަކު ވިދާޅު ނުވިއަސް ޝަމީމަކީ އެ މަގާމަށް އެކަށީގެން ނުވާ ފަރާތެއްކަން ދިވެހި ރައްޔިތުންނަށް އެނގެއެވެ. މައްސަލައަކީ ރައީސުލް ޖުމްހޫރިއްޔާ އަކަށް ހުންނެވީ ރައްޔިތުންގެ މިފަދަ ކަންބޮޑުވުން ތަކަށް ބީރު ކަންފަތެއް ދެއްވައިގެން ހުންނެވި "ހިކުމަތްތެރި" ބޭފުޅަކަށް ވާތީ އެވެ. ޓޫރިޒަމް މިނިސްޓަރަކަށް އަލީ ވަހީދު ހުންނެވި އިރު ޖިންސީ ގޯނާގެ ތުހުމަތުތަކެއްގެ ސަބަބުން އަލީ ވަހީދު މަގާމުން ވަކި ކުރުމަށް ރައްޔިތުން ގޮވި އިރު ރައީސް ދެއްވީ ބީރު ކަންފަތެކެވެ. އެމްޑީއެން އާއި އުތެމަ ޖަމިއްޔާ އިން ދީނަށް ފުރައްސާރަ ކުރި މައްސަލާގައި ވެސް ރައީސް ދެއްވީ ބީރު ކަންފަތެކެވެ. ފިޔަވަޅަކަށްވާ ފިޔަވަޅެއް ނާޅުއްވައެވެ.
ޕީޖީ ޝަމީމް، އެއްޖިންސުން ގުޅުން ހިންގާ މީހުންގެ ކުޑަ ކުޑަ ހުކުމް، އެއަށްވުރެ ވެސް ކުޑަ ކުރައްވަން އިސްތިއުނާފް ކުރެއްވިއަސް ރައީސަށް އޯކޭ އެވެ. ޝަމީމް އެ މަގާމަށް ކުފޫ ހަމަނުވިއަސް އޯކޭ އެވެ. އެހެންކަމުން ފުރަތަމަ ބަލަން ޖެހެނީ ރައީސުލް ޖުމްހޫރިއްޔާ އެ މަގާމަށް ކުފޫ ހަމަވޭތޯ އެވެ.
މުޅި ގައުމުގައި ލިވާތާއި ޒިނޭ އާއްމު ވެއްޖެއެވެ. ޑްރަގުގެ ވަބާ އާއްމުވެ، އުމުރުން ދިހަ އަހަރުގެ ކުދިންނާއި ހަމަ އަށް ވެސް މި ވަބާ ފޯރައި، ޕާޓީ ޑްރަގް އާއްމު ވެއްޖެ އެވެ. ރިބާ އާއްމުވެ، ރަލުގެ ވިޔަފާރި އާއްމުވެ، މިއުޒިކާއި ޑިސްކޯ އާއްމު ވެއްޖެ އެވެ. ދީނަށް ފުރައްސާރަ ކުރާ ދިވެހިން އިންތިހާ އަށް ގިނަ ވެއްޖެ އެވެ. މިސްކިތް ތަކަށް ބޮޑުކަމު ދިއުމާއި، ގުރުއާން މުސްހަފު ވީދައި އެއަށް ކުޑަކަމު ދަނީ އެވެ. އިހަކަށް ދުވަހު އިސްލާމީ މަރުކަޒަށް ވަދެ އިންޑިއާ މިހަކު މިސްކިތު ތެރެއަށް ބޮޑުކަމު ގޮސްފި އެވެ. އެކަމަކު ހުކުރު ހުތުބާ އިން ހަނދާން މިކޮށްދެނީ ކާރުގެ އަޑީ ތެޔޮ ބަދަލު ކުރަންށާއި، ދެ ސިމް ލެއްވޭ ފޯނުގެ ދެ ސިމް ހަމައަށް އިންތޯ ބެލުމަށާއި، ފަޓުލޫނު ލާއިރު ޒިޕް ރަނގަޅަށް އެޅުވޭތޯ ބެލުމަށާއި، ސައިކަލަށް އަރާއިރު މަޑީގެ އިސްޕަންޖު ފޯވެފައި ހުރިތޯ ބެލުމަށެވެ. ސަރުކާރުގެ އިސް މަގާމްތަކުގައި މިހާރު ތިއްބެވި ބައެއް ބޭފުޅުން މީގެ ކުރިން ހުކުރު ހުތުބާ އަށް "ހޮޓް ބާ" އޭ ކިޔައި ހަޖޫ ޖެހުމެކޭ މިއެކޭ ތަފާތެއް ނެތެވެ. ހުކުރު ހުތުބާގެ ހުރުމަތް ކަނޑައިފި އެވެ.
ހުކުރު ދުވަހު ދިވެހި އޮންލައިން ނޫހެއްގައި ރިޕޯޓް ކޮށްފައިވާ ގޮތުގައި އައްޑޫ ސިޓީގެ އަންހެނަކު ތިން ފަހަރަށް ނަހަލާލަށް ވިހައި، އެއިން އެއްފަހަރު ވެސް އަދަބެއް ނުލިބި، ރަށުތެރޭގައި ސައިކަލް ދުއްވަ ދުއްވާ އެބަ އުޅެއެވެ. ޕްރޮސެކިޓާ ޖެނެރަލަށް އޯކޭ އެވެ. ފުލުހަށް އޯކޭ އެވެ. އިސްލާމިކް މިނިސްޓްރީ އަށް އޯކޭ އެވެ.
ގައުމުގެ އިޖްތިމާއީ ފޭރާން ވީދި، ކުށް ކުރުން ހައްދުން ނެއްޓި، ކޮރަޕްޝަނާއި ފަސާދަ އާއްމުވެ، ފާހިޝް އަމަލުތައް ހައްދުން ނެއްޓިއްޖެ އެވެ. ރައީސުލް ޖުމްހޫރިއްޔާ އުޅުއްވަނީ ހަރުކަށި ފިކުރުން ހެޑްލައިން ހެއްދެވުމުގައި ބިޒީ ކޮށެވެ. ޕްރޮސެކިއުޓާ ޖެނެރަލްވެސް ހަމަ އެފަދަ އެވެ.
ޤައުމުގެ ދުވަސް ދަނީ އެވެ. ގައުމުގެ މިނިވަންކަން ގެއްލި، ރައްޔިތުންގެ ތެރޭގައި ލާދީނީ ފިކުރު އާއްމު ވެއްޖެ އެވެ. ހުކުރު ހުތުބާ އަކީ އިންޖިނިއަރިން މެނުއަލް އަކަށް ވެއްޖެ އެވެ. އަންނަ ހުކުރު ދުވަހުގެ ހުތުބާގައި އަޑު އިވޭނީ މަގުމައްޗަށް ނުކުންނަ އިރު ބަބުރު ދަނޑި އުނގުޅުމުގެ ވާހަކަ ކަމަށް ވެދާނެއެވެ. ހުކުރު ހުތުބާ ހަމަ ރަނގަޅަށް ވެސް "ހޮޓް ބާ" އަކަށް ހަދައިފި އެވެ. މިވަރު ދެން ތަންފުކެއް ބޮޑުވަރެވެ. ނަންވާނީ ލާދީނީ ސަރުކާރޭ ކިޔާ މީހުނެވެ.
ކޮމެންޓް
ހުތުބާގައި ވަކި ކަމަކަށް ވާހަކަ ދައްކަން އޮވޭތޯ އެވެ. މުޖުތަމައުގެ އިސްލާހާ ގުޅޭ ކޮންމެ ވާހަކައެއް ވެސް ކޮންމެ ނަސޭހަތެއް ވެސް ހުކުރު ހުތުބާގައި ދެވިދާނެ ނޫންތޯ އެވެ.
Republic of Maldives