ނަޝީދަށް ހަމަލާ ދިން މައްސަލައިގެ އިތުރު މައުލޫމާތު ހޯދަން އެދިއްޖެ

ކުރީގެ ރައީސް މުހައްމަދު ނަޝީދު އަވަހާރަ ކޮށްލަން ދިން ބޮމުގެ ހަމަލާއާ ގުޅޭ އިތުރު މައުލޫމާތު ލިބިފައިވާ ކަމަށް ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވުމުން އެ މައުލޫމާތު ހޯދުމަށް މަޖިލީހުގެ އިދާރާ އިން ރަސްމީކޮށް ހުށަހެޅުމަށް މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ އެދިވަޑައިގެންފި އެވެ.

މޭ 6، 2021 ވަނަ ދުވަހުގެ ރޭ ރައީސް ނަޝީދު އަވަހާރަކޮށްލަން ހަމަލާ ދީފައި ވަނީ ސައިކަލެއްގައި އައިއީޑީއެއް ހަރުކޮށްގެންނެވެ. އައިއީޑީ ގޮއްވާލާފައި ވަނީ އެމަނިކުފާނު ގެއިން ނުކުމެވަޑައިގެން ކާރުކޮޅަށް އަރުއްވަން ވަޑައިގަންނަވަނިކޮށް ރިމޯޓެއް ބޭނުންކޮށްގެންނެވެ.

އެމަނިކުފާނަށް ހަމަލާ ދީފައި ވަނީ ވަރަށް ބޮޑަށް ފާރަލައި އޭގެ ކުރިން ދެ ފަހަރަކު އައިއީޑީ ގޮއްވާލަން މަސައްކަތް ވެސް ކުރުމަށްފަހު އެވެ. އެކަމުގެ ފަހަތުގައި ތިބީ ހަރުކަށިފިކުރުގެ މީހުން ކަމަށް ބުނެ 10 މީހަކަށް ވަނީ ދައުވާ ވެސް ކޮށްފަ އެވެ.

މި މައްސަލައިގައި ރައީސް ނަޝީދަށް އިންސާފު ލިބޭނީ ކޮންއިރަކުންތޯ ސުވާލު ކުރެއްވީ ވެސް މިއަދު މަޖިލީހަށް ޑިފެންސް މިނިސްޓަރު ގައްސާން މައުމޫން ހާޒިރުކުރުމުން މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ އެވެ. އޭނާ ވިދާޅުވެފައި ވަނީ މި ހާސިދާ ނުވާ ކަމެއްގެ ގޮތުގައި މިހާރު ހަދާފައިވާ ކަމަށެވެ.

އެ ސުވާލަށް ޖަވާބު ދެއްވަމުން ގައްސާން ވިދާޅުވީ އެ މައްސަލަ ވަރަށް ގާތުން ބައްލަވަމުން ގެންދަވާނެ ކަމަށެވެ. އަދި، އެ މައްސަލައާ ގުޅޭ ގޮތުން ލިބިފައި ހުރި ބައެއް އިތުރު މައުލޫމާތު ހިއްސާ ކުރަން އެބަހުރި ކަމަށެވެ.

"އެހެން ނަމަވެސް އެ މައުލޫމާތު އަޅުގަނޑުމެންނަށް ހިއްސާ ކުރެވޭނީ ތިބޭފުޅުން އެ މައުލޫމާތު ހޯއްދަވަން މަސައްކަތް ކުރެއްވީމަ،" ވަރަށް ކުރުކޮށް ދެއްވި ޖަވާބުގައި ގައްސާން ވިދާޅުވި އެވެ.

މި މައްސަލައާ ގުޅޭ އިތުރު ތަފްސީލު ގައްސާން ނުދެއްވަ އެވެ. އިތުރަށް ދެއްވީ ދިފާއީ ބާރުން ރައްކާތެރިކަން ފޯރުކޮށްދޭން ޖެހޭ އެއްވެސް ބޭފުޅެއްގެ ރައްކާތެރިކަން ކަށަވަރުކުރުމުގެ ގޮތުން އެ ވާޖިބު ފުރިހަމައަށް އަދާކުރާނެ ކަމުގެ ޔަގީން ކަމެވެ.

ޣައްސާން ވަނީ އެ މައުލޫމާތު މަޖިލީހުން ހޯދުމަށް ރަސްމީކޮށް އެދިވަޑައިގަތުމަށާއި އެ މައުލޫމާތުތަކުގެ އަލީގައި ކަމާ ގުޅޭ ކޮމިޓީން އެ މައްސަލަ އިތުރަށް ބައްލަވައިދެއްވުމަށް އެދިވަޑައިގެން މަޖިލީހުގެ ރައީސް މުހައްމަދު އަސްލަމަށް ސިޓީއެއް ފޮނުއްވާފައެވެ.

ރައީސް ނަޝީދަށް ހަމަލާ ދިން މައްސަލައިގައި ދައުލަތުން ދައުވާކޮށްފައިވާ މީހުންނަކީ މއ. ފޭރުގެ މުޖާޒް އަހްމަދާއި، އ. ކޮނޑޭ، ފޮޅޭމާ، ތަހުމީން އަހްމަދާއި، ނ. މަނަދޫ ނޫރީގެ އަލީ ހައިޝަމްގެ އިތުރުން ގއ. ވިލިނގިލި ހުދުރުވާގެ، ފަހުމީ އަލީ އާއި، އއ. މާޅޮސް އަސަރީގެ، މުހައްމަދު ނާޒިމް އަދި މ. ކުދެހިގެ އިސްހާގެވެ.

މި މައްސަލައިގެ ޝަރީއަތް ކްރިމިނަލް ކޯޓުގައި ކުރިއަށް ދާއިރު، މިހާރު ނަގަމުން ދަނީ ދައުލަތުން ހުށަހަޅާފައިވާ ހެކިންގެ ހެކިބަހެވެ. މައްސަލަ މާބާރަކަށް ކުރިއަކަށް ނުދެ އެވެ.