އެއް ދިހައިގެ ތެރޭ 70 މީހުން ދިވެހިރާއްޖޭން ގެއްލިފައި

ދިވެހި ރާއްޖެއިން މީހުން ގެއްލޭ ހާދިސާތައް މަދެއް ނޫނެވެ؛ ގެއްލޭ މީހުން ހޯދަން ފަށައި މަސައްކަތްތަކެއް ކުރި ނަމަވެސް އެފަދަ ހާދިސާތަކުގައި މީހުން ހޯދުމުގެ މަސައްކަތް ކުރާ ގޮތާމެދު އާންމު ސުވާލުތައް ވަރަށް ބޮޑަށް އޮވެއެވެ. ގިނަ އާންމުން ބުނާ ގޮތުން ނަމަ މީހުން ގެއްލުމުން އަބަދުވެސް އޮންނަނީ ގެއްލުނު މީހާ ހޯދަން ފަށާކޮޅު ފަލަކޮށް އެކަމަކު ނިމޭކޮޅު ހިމަކޮށެވެ. ހޯދަން ފެށުމާއެކު އެކަން ހިނދިގެން ގޮސް މާޒީގެ ތެރެއަށް ދޫވެ އެވެ. ފަހުން އެއްވެސް ތަފުސީލެއް ނޯވެ އެވެ. ގެއްލޭ މީހުން ހޯދަން މަސައްކަތް ކުރާ ގޮތާ މެދު ވަރަށް ބޮޑަށް މީހުން ސުވާލު ކުރަނީ އެހެން ވެގެނެވެ.

އާންމު ގޮތެއްގައު މީހުން ގެއްލުމުން އެ މީހަކު ހޯދާން ފަށަ އެވެ. ލައިގެން ހުރި ހެދުމާއި އިސްކޮޅާއި ހިމެނޭ ގޮތަށް ފޮޓޯގަނޑަކާއެކު އިއުލާނެއްކޮށް ގުޅާނެ ނަމްބަރެއް ދެ އެވެ. އެކަމަކު އަބަދުވެސް އޭގެ ދެ ދުވަހަކަށް ފަހު ދެން މާ ބޮޑު މައުލޫމާތެއް ނޯވެ ގެއްލުމުގެ ހާދިސާ އޮބިގެން ހިނގައި ދެއެވެ. އެ ދެމެދުގައި ސިފައިންނާއި ފުލުހާ ހަވާލާދީ މީޑިއާއަށް ބައެއް ސުރުހީ އަރަ އެވެ. "އަދިވެސް ހޯދަނީ" އާއި "އަދިވެސް ނުފެނޭ" އާއި "ކަނޑާއިގެ ވައިގެ މަގުން ބޮޑު ސަރަހައްދެއް ބަލައިފި" ކަމަށް ބުނެދޭ ސުރުހީތަކެއް އާދެ އެވެ. ހަފުތާ ދުވަސްތެރޭގައި ގިނަ މައްސަލަކުގެ "ސާޗް" އޮބިގެން ދެ އެވެ. ދެން އެ ވާހަކަ ދައްކާނެ މީހަކު ނޫޅެ އެވެ. އެހެން ވެގެން އާންމުކޮށް ގެއްލޭ މީހުން ހޯދުން އޮންނަ ގޮތުގެ ސިފައަކީ އެއީ އެވެ.

ވީނުވީއެެއް ނޭނގި ހުޅުމާލޭގެ ހިޔާ އަވަށުން ޒުވާނަކު ގެއްލުނީ މީގެ ހަ ދުވަސް ކުރީންނެވެ. އުމުރުން 27 އަހަރު މުހައްމަދު އަޒުހާން އަދިވެސް ނުފެނެ އެވެ. އޭނާ އަޒްހާން ގެއްލިގެން ހޯދާ ކަމަށް ފުލުސް އިދާރާއިން ބުނެފައި ވަނީ މިދިޔަ އަންގާރަ ދުވަހުގެ ރޭގަ އެވެ. ގެއްލިގެން ފުލުހަށް ރިޕޯޓް ކުރީ ހޯމަ ދުވަހު އެވެ. އޭގެ ފަހުން ފުލުހުން އިއްޔެ ބުނެފައިވާ ގޮތުގައި އަޒުހާނުގެ އެއްވެސް މައުލޫމާތެއްނެތެވެ. އެކަމަކު އޭނާ ހޯދުމުގެ މަސައްކަތް ކުރެ އެވެ. ހަފުތާއެއްވާއިރު އޭނާ ހޯދަން ސަރުކާރުން ކުރާ މަސައްކަތުގެ ތަފުސީލެއް ނެތެވެ. ދެން މާދަމާ އޭނާގެ ވާހަކަ އޮބިގެން ހިނގައިދާނެ އެވެ. އޭނާ ގެއްލުނީ ކަމެއް، ގެއްލުވާލީ ކަމެއް، މަރުވީ ކަމެއް މަރާލީ ކަމެއް ސާފެއް ނުވާނެ އެވެ.

މިދިއަ ޖުލައި މަހުގެ ކުރީކޮޅު ނ. އަތޮޅުގައި 800 މީހުން ހަމަ ނުވާ ކުޑަކުޑަ އާބާދީއަކާއެކު އޮންނަ ހެނބަނދޫން ޒުވާނަކު ގެއްލިގެން ހޯދަން ފެށި އެވެ. އެ ޒުވާނާ / ހެނބަދޫ ކުންނާރުގޭ، އިބްރާހިމް ރާމިޒް ދަތުރެއް ކުރާން ބޭނުން ކުރި ކަމަށް ބެލެވިފައިވާ ކެނޯއެއް އަތޮޅުގެ ކެނދިކޮޅުދޫ ކައިރިން ފެނުނެވެ. ކެނދިކުޅުދޫ އަކީ ހެނބަދޫ ކައިރިން ބަނޑުދޮށުގައި ޖެހިގެން ކަހަލަ ގޮތަކަށް އޮންނަ ރަށެކެވެ. އޭނާއެއް ނުފެނެ އެވެ. އޭގެ ހަބަރެއް ހޯދުމުގެ ކަންކަން ހިނގައި ދިޔަ ގޮތެއް ދެނެހުރި މީހަކު ނެތެވެ. މިހެން ގޮސް ވޭތުވެ ދިޔަ 10 ވަރަކަށް އަހަރު ދުވަހުގެ ތެރޭގައި ރާއްޖޭގެ ނިސްބަތުން ގިނަ އަދަދެއްގެ މީހުން ގެއްލި އޮބާލާފައި ވެއެވެ.

ގެއްލޭ މީހުންނާ ބެހޭ ގޮތުން ދިވެހި ފުލުހުންގެ ހިދުމަތުގެ ރިކޯޑްތަކެއް "މި" ނޫހާ ވަނީ ހިއްސާކޮށްފަ އެވެ. އެ ރެކޯޑްތައް ދައްކާ ގޮތުން މިދިއަ 10 އަހަރު ދުވަހުގެ ތެރޭ ވީނުވީއެއް ނޭނގި، ހަބަރެއް ނުވެ 30 ދިވެހިންނާއި 40 ބިދޭސީއަކު ހިމެނޭ ގޮތަށް ޖުމްލަ 70 މީހަކު ދިވެހި ރާއްޖެއިން ގެއްލިފައި ވެއެވެ. އެއީ އަހުމަދު ރިލްވާން ގެއްލުވައިލި ހާދިސާ ވެސް ހިމެނޭ ގޮތަށެވެ. ތަހުގީގުތަކުން، ރިލްވާން ވަގަށް ނަގައި މަރާލީކަން މިހާރު ސާފުވެ އެވެ. ނަމަވެސް އަނެއް 69 މީހުންގެ ތެރެއިން ގިނަ މީހުނަށްވީ ކިހިނެއް ހެޔެއްވެ؟ މަރާލީ ހެއްޔެވެ؟ މަރުވީ ހެއްޔެވެ؟ ގެއްލުނީ ހެއްޔެވެ؟ ގެއްލުވާލީ ހެއްޔެވެ؟ ސާފެއް ނުވެއެވެ. އަދި އެމީހުން ހޯދަން ކުރި މަސައްކަތެއް ފެންނާކަށް ނެތެވެ.

މިދިއަ 10 އަހަރު ތެރޭގައި ރާއްޖޭން ގެއްލިފައިވާ މީހުންގެ ވަނަވަރު ވަކިން ބެލޭނެ ގޮތަށް ރެކޯޑް ހިސާބުތައް ފުލުހުން ތަރުތީބު ކޮށްފައެއް ނުވެއެވެ. އެކަމަކު މިދިއަ އެއްދިހައިގެ ތެރޭގައި 70 މީހުންގެ ގެއްލުނު ކަމަށް ފުލުހުންގެ ހިސާބު ފޮތް ބުނެދެ އެވެ. މި 70 މީހުންގެ ތެރޭގައި ހިމެނޭ 40 ބިދޭސީން ނިސްބަތްވާ ގައުމުތައް ފުލުސް ފޮތުން ސާފުވެ އެވެ. ފުލުހުންގެ ހިސާބުތައް ދައްކާ ގޮތުން މިދިއަ އެއްދިހައިގެ ތެރޭގައި ބަންގާލާދޭޝްގެ 16 މީހަކާއި ބެލްޖިއަމްގެ މީހަކާއި ފްރާންސްގެ ދެ މީހަކާއި ރަޝިޔާގެ މީހަކާއި އިނގިރޭސި ވިލާތުގެ ދެ މީހަކާއި ޗައިނާގެ ހަ މީހަކާއި އިންޑިއާގެ ހަ މީހަކާއި އެމެރިކާގެ މީހަކާއި ކެނެޑާ މީހަކާއި ޔުކްރޭނުގެ ދެ މީހަކާއި ޕާކިސްތާނު މީހަކާއި އޮސްޓްރޭލިއާގެ މީހަކު ހިމެނެ އެވެ.