ޗަމްޕާ ބްރަދާސްގެ ރޯދަ ހަދިޔާ އިތުރު ކޮށްދީފި

މަޝްހޫރު ޗަމްޕާ މުހައްމަދު މޫސާ (އުއްޗު) އާއި ޗަމްޕާ ހުސައިން އަފީފްގެ ޗަމްޕާ ބްރަދާސްގެ ފަރާތުން ރޯދަ މަހާ ގުޅުވައި ދިވެހި ރައްޔިތުންނަށް ދޭ ރޯދަ ހަދިޔާ އިތުރުކޮށްދީފި އެވެ.

ޗަމްޕާ ބްރަދާސްގެ ފަރާތުން، މި އަހަރުގެ ރޯދަމަހު ދިވެހި ރައްޔިތުންނަށް ދޭ ރޯދަ ހަދިޔާގެ ގޮތުގައި މީގެ ކުރީން ވަނީ، 50 ޓަނު ކަރާ، 50 ހާސް ކާށި، އަދި 10 ޓަނު ފިޔާ، ލޯކަލް ގަވަމެންޓް މިނިސްޓްރީއާ ހަވާލު ކޮށްފަ އެވެ. 

މި އަހަރު ދޭ ރޯދަ ހަދިޔާ އިތުރުކޮށް މި ހަފުތާ ތެރޭގައި، އިތުރު 25 ޓަނު ކަރަލާއި 25،000 ކާށި، އަދި 10 ޓަނު އަލުވި ލޯކަލް ގަވަމެންޓް މިނިސްޓްރީއާ ހަވާލު ކުރާނެ އެވެ. ރޯދަ ހަދިޔާއަށް އިތުރު ކުރި ކަރަލާއި ކާށި މިހާރު ހުރީ ރާއްޖޭގަ އެވެ. އަނެއް 10 ޓަނު އަލުވި ދެ ދުވަސް ތެރޭގައި ރާއްޖެ އަންނާނެ އެވެ.

ޗަމްޕާ ބްރަދާސް އިން ރޯދަ ހަދިޔާއަށް އިތުރުކުރި ބަޔާއެކު، ޖުމްލަ 75 ޓަނު ކަރަލާއި 75،000 ކާއްޓާއި  10 ޓަނު ފިޔާ އާއި 10 ޓަނު އަލުވި މި ރޯދަ މަހު ރައްޔިތުންނަށް ވަނީ ހަދިޔާ ކޮށްފަ އެވެ.

ލޯކަލް ގަވަރުމަންޓް މިނިސްޓްރީން ވަނީ ކައުންސިލް އިދާރާތައް މެދުވެރިކޮށް ޗަމްޕާ ބްރަދާސްގެ ރޯދަ ހަދިޔާ ރައްޔިތުންނަށް ބެހުމުގެ އިންތިޒާމެއް ހަމަޖައްސާފަ އެވެ.

ޗަމްޕާ ބްރަދާސްއަކީ، ދިވެހި ރައްޔިތުންގެ ލާބަޔާ މަންފާއަށް އަދި ޖަމާއަތުގެ ތަރައްގީއަށްޓަކައި ދީލަތި އެހީތަކެއް ވާ ކުންފުންޏެކެވެ. އުމްރާނީ ތަރައްގީގެ މަޝްރޫއުތަކާ، ތަޢުލީމީ އަދި ސިއްހީ ކަންކަމާއި ކުޅިވަރާ އިޖްތިމާއީ ކަންކަމުގައިވެސް ފަރުދުންނަށާ ޖަމާއަތްތަކަށް ޗަމްޕާ ބްރަދާސް އިން އަބަދުވެސް އެހީވެ އެވެ.