ނިޝާނާއި ފަޒްލޫނަށް ދީނީ ނަސޭހަތުގެ ހުއްދަ އަނބުރާ ދީފި

ޖޫން 21، 2022 ގައި ގަލޮޅު ދަނޑުގައި ބޭއްވި ޔޯގާ އިވެންޓް ހުއްޓުވުމުގައި އުފެދުނު ހަމަނުޖެހުންތަކާއި ގުޅިގެން ދައުވާ އުފުލާފައިވާ ދެ އިލްމުވެރީން ކަމަށްވާ ޝައިހު އާދަމް ނިޝާނާއި ޝައިހު ފަޒްލޫން މުހައްމަދަށް ދީނީ ނަސޭހަތް ދިނުމުގެ ހުއްދަ އަނބުރާ ދީފި އެވެ.

ދެ އިލްމުވެރިންގެ ދީނީ ނަސޭހަތް ދިނުމުގެ ހުއްދަ ވަގުތީ ގޮތުން ހިފަހައްޓާފައި ވަނީ ކުރީ ސަރުކާރުންނެވެ. އިސްލާމިކް މިނިސްޓްރީން އިއްޔެ ވަނީ ދެ ބޭފުޅުންނަށް ވެސް އެ ހުއްދަ އަނބުރާ ދީފަ އެވެ.

ޝެއިހް ނިޝާން އެކްސްގައި ކުރެއްވި ޕޯސްޓެއްގައި މިނިސްޓްރީން އަލުން ހުއްދަ ދީފައިވާކަން ވަނީ ފާހަގަކުރައްވާފަ އެވެ. އަދި މިނިސްޓްރީއަށާއި މިނިސްޓަރު ޑރ. މުހައްމަދު ޝަހީމް އަލީ ސައީދުއަށް ޝުކުރު އަދާކުރައްވާފައިވެ އެވެ.

ދެ އިލްމުވެރިންނަށް ދީނީ ނަސޭހަތްދޭން ހުއްދަ ދީފައި ވަނީ އެ މިނިސްޓްރީން ކަނޑައަޅާފައިވާ ދީނީ ނަސޭހަތް ދިނުމުގެ އުސޫލުތަކާއި ގަވާއިދުތަކަށް އިހުތިރާމު ކުރުމަށް އެއްބަސްވުމުންނެވެ.

ޔޯގާ ދުވަހު ހިންގި ހަމަނުޖެހުމުގައި ދެ އިލްމުވެރިން ހިމެނޭހެން 18 މީހަކަށް ވަނީ ދައުވާކޮށްފަ އެވެ. މި ދެ އިލްމުވެރިންގެ މައްޗަށް ދައުލަތުން އުފުލާފައި ވަނީ ޓެރަރިޒަމް އަމަލެއް ހިންގަން ހިތްވަރު ދިނުމުގެ ކުށުގެ ދައުވާ އެވެ. އެ ކުށުގެ އަދަބަކީ 10 އަހަރާއި 15 އަހަރާ ދެމެދުގެ މުއްދަތަށް ޖަލަށްލުމެވެ.

އެ މައްސަލައިގެ ޝަރީއަތްތައް ފެށި ނަމަވެސް މިހާރު މައްސަލަ މަޑުޖެހިފައިވާތާ ދުވަސްކޮޅެއް ވެއްޖެ އެވެ. އަދިވެސް ކުރިއަށް ދަނީ ޝަރީއަތުގެ ކުރީގެ މަރުހަލާ އެވެ.