ދައުރުކުރަނީ ފޭކް ފޮޓޯއެއް، ރައީސް އޮފީހުން އެކަން ދޮގުކޮށްފި
"ފޭކް ފޮޓޯތައް މީޑިއާއަށް ނެރެ، މިފަދަ ދޮގު ތުހުމަތުތައް އަނެކުންގެ މައްޗަށް ކުރުމުގެ ބޭނުމަކީ މާޒީގައި އެ ފަރާތްތަކުން ކޮށްފައިވާ ނޭދެވޭ ކަންކަން ރައްޔިތުންގެ ހަނދާނަށް އަޔަނުދީ އެހެން ކަންކަމަށް ރައްޔިތުންގެ ފޯކަސް އަނބުރުވައިލުން،"
ރައީސުލްޖުމްހޫރިއްޔާގެ ރަސްމީ ގެކޮޅު، މުލިއާގޭގައި އަގުބޮޑު ކަރޯކޭ ސިސްޓަމެއް ބަހައްޓާފައިވާ ކަމަށް ފަތުރަމުންދާ ވާހަކަތައް ރައީސް އޮފީހުން ދޮގުކޮށްފި އެވެ.
އިއްޔެ ސޯޝަލް މީޑިއާގައި ވަނީ މުލިއާގޭގެ ކޮޓަރިއެއް ކަމަށް ބުނާ ފޮޓޯއެއް ދައުރުކުރަމުންނެވެ. އެ ފޮޓޯއިން ފެންނަނީ މީހެއްގެ އިސްކޮޅު ވަރުގެ ބޮޑު ދެ ސްޕީކަރާއެކު ކަރޯކޭ ސިސްޓަމެއް ބަހައްޓާފައި ހުއްޓަ އެވެ. ސްޕީކަރުތައް ހުރި ކޮޓަރީގައި ރަގަޅު ފެންވަރެއްގެ ކާޕެޓެއް އަޅާފައިވެ އެވެ.
ރައީސުލްޖުމްހޫރިއްޔާގެ ރަސްމީ ގެކޮޅުގައި އަގުބޮޑު ކަރޯކޭ ސިސްޓަމެއް ބެހެއްޓިކަމަށް ސިޔާސީ ބައެއް ފަރާތްތަކުން ދައްކާ ވާހަކައަކީ ކަނޑައެޅިގެން ބޮޑު ދޮގެއް. މިއީ އެއްވެސް ދުވަސްވަރެއްގައި ރައީސް ޑރ. މުހައްމަދު މުއިއްޒުގެ ޢާއިލާއިން ގޭތެރޭގައި ކުރައްވާކަމެއް ވެސް ނޫން،" ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލް ވިދާޅުވި އެވެ.
އެކަން ދޮގު ކުރައްވަމުން ހަލީލް ވިދާޅުވީ، އެފަދަ ދޮގުވާހަކަތައް ފަތުރަން މަސައްކަތްކުރަމުން ދަނީ، ލިބުނު ފުރުސަތުގައި ދައުލަތުގެ ވަސީލަތްތަކާ ފައިސާ ނަހަމަ ގޮތުގައި ބޭނުންކުރުމަށްފަހު، އެފަދަ ބޮޑެތި ހިޔާނާތްތައް ފޮރުވަން މަސައްކަތްކުރާ ފަރާތްތަކުން ކަމަށެވެ.
"ފޭކްފޮޓޯތައް މީޑިއާއަށް ނެރެ، މިފަދަ ދޮގު ތުހުމަތުތައް އަނެކުންގެ މައްޗަށް ކުރުމުގެ ބޭނުމަކީ މާޒީގައި އެ ފަރާތްތަކުން ކޮށްފައިވާ ނޭދެވޭ ކަންކަން ރައްޔިތުންގެ ހަނދާނަށް އަޔަނުދީ އެހެން ކަންކަމަށް ރައްޔިތުންގެ ފޯކަސް އަނބުރުވައިލުން،" ހަލީލް ވިދާޅުވި އެވެ.
ސޯޝަލް މީޑިއާގައި އިދިކޮޅު ބައެއް ފަރާތްތަކުން އެ ފޮޓޯ ދައުރުކޮށްފައި ވަނީ އެއީ 80،000 ޑޮލަރު ނުވަތަ 1.5 މިލިއަން ރުފިޔާއަށް ސިންގަޕޫރުން ގަތް ކަރޯކޭ ސިސްޓަމެއް ކަމަށް ބުނެ އެވެ. ނަމަވެސް، އެއީ ވިއެޓްނާމްގެ ވެބްސައިޓަކުން ނަގާފައިވާ ފޮޓޯއެއްކަން ވަނީ ހާމަވެފަ އެވެ.
ކޮމެންޓް
Republic of Maldives