މި އަހަރުގެ އައިޓީބީ | ގިނަ ދިވެހިން، ރަށް ޕްރޮމޯޓް ކުރަން ކައުންސިލް

އަންގާރަ ދުވަހު ޖަރުމަނު ވިލާތުގައި ފަށާ ދުނިޔޭގެ އެންމެ ބޮޑު ޓޫރިޒަމް ފެއާ، އައިޓީބީ ބާލީން ހުރިހާ ގޮތަކުންވެސް ތަފާތުވެ އެވެ. މި އަހަރުގެ ފެއާގެ އެންމެ ބޮޑު އެއް ތަފާތަކީ މި އަހަރަކީ މިހާތަނަށް އެންމެ ގިނަ ދިވެހި ކުންފުނިތައް ބައިވެރިވާ ފެއާއަށްވުމެވެ. މިއާއެކު މި އަހަރު ފެނިގެން ދާނެ އެންމެ ބޮޑު އަނެއް ބަދަލަކީ ބައެއް ކައުންސިލްތައް ރަށް ޕްރޮމޯޓް ކުރަން ބައިވެރިވުމެވެ. 

ރާއްޖޭގެ ޓޫރިޒަމް ޕްރޮމޯޝަން ބޯޑް، އެމްއެމްޕީއާރުސީން ރާއްޖޭން ބައިވެރިވާ ހުރިހާ ފަރާތްތަކެއްގެ ކަންކަން ބަލަހައްޓަން ތައްޔާރުވެފައިވާއިރު، ފެއާގައި 107 ކުންފުނިން ޖުމްލަ 247 ފަރާތަކުން މަންދޫބުން ބައިވެރިވާނެ އެވެ. މި މަންދޫބުންގެ ތެރޭގައި ރާއްޖޭގައި ތިބި އެންމެ ބޮޑެތި ހުރިހާ ކުންފުނިތަކެއްވެސް ހިމެނެ އެވެ. މީގެ ތެރޭގައި ދިވެހި ގިނަ އަދަދެއްގެ ޓްރެވަލް އެޖެންޓުންނާއި ދިވެހި ޓުއާ އޮޕަރޭޓަރުން ވެސް ހިމެނެ އެވެ. 

ސަރުކާރުން ރާއްޖޭގެ ވަފުދުގެ އިސް ބޭފުޅެއްގެ ގޮތުގައި ބައިވެރިވަޑައިގަންނަވާނީ ޓޫރިޒަމް މިނިސްޓަރު އިބްރާހިމް ފައިސަލް އެވެ. 

މި ފަރާތްތަކުގެ އިތުރުން ރާއްޖޭގެ ލޯކަލް ޓޫރިޒަމް ޕްރޮމޯޓް ކުރާ ޖަމިއްޔާ ނޭޝަނަލް ހޮޓެލް އެންޑް ގެސްޓްހައުސް އެސޯސިއޭޝަން (އެންއެޗްގޭމް) އިން މި އަހަރު ވަކިން ބައިވެރިވެ އެވެ. އަދި ރާއްޖޭގެ އެންމެ ބޮޑު ގެސްޓްހައުސް އާބާދީއެއް އޮތް ކ. މާފުށިން ވެސް ބައިވެރިވެ އެވެ. 

މި އަހަރަށް އެމްއެމްޕީއާރުސީން ފަރުމާކޮށްފައިވާ އައިޓީބީ ސްޓޭންޑް ޑިޒައިންކޮށްފައިވަނީ ރާއްޖޭގެ މާހައުލުގެ ސިފަތައް ފެންނާނެ ގޮތަކަށެވެ. އެގޮތުން މި ފަހަރުގެ ސްޓޭންޑުގައި ރާއްޖޭގެ ރީތި ގޮނޑުދޮށާއި ނޫވިލު ކުލަ ހިމަނާފައިވެ އެވެ. ރާއްޖޭގެ ސްޓޭންޑުގެ ބޮޑު މިނުގައި 504 އަކަމީޓަރު ހުންނާނެ އެވެ.