ކެލާ ފަޅުގައި ރިސޯޓެއް ތަރައްގީ ކުރާނެ: ރައީސް
ރައީސް ވިދާޅުވީ އިންތިހާބުގެ ކެމްޕެއިން ގައި ކެލައަށް ވަޑައިގަތުމުން ވެސް ރައްޔިތުންގެ އެންމެ ބޮޑު އުންމީދަކީ އެ ރަށުގެ ފަޅުތެރޭގައި ރިސޯޓެއް ތަރައްގީ ކުރުން ކަން ރައްޔިތުންގެ ފަރާތުން އެނގިވަޑައިގެންނެވި ކަމަށެވެ.
ތިލަދުންމަތީ އުތުރުބުރީ ކެލާ ފަޅުގައި ރިސޯޓެއް ތަރައްގީ ކޮށް ދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އުތުރުގެ ތިން އަތޮޅުގެ ބައެއް ރަށްތަކަށް އިއްޔެ ފެއްޓެވި ދަތުރުފުޅު ގައި މިއަދު ކެލައަށް ވަޑައިގެން ވާހަކަފުޅު ދައްކަވަމުންނެވެ. ރައީސް މުއިއްޒު ވިދާޅުވީ ރިޔާސީ އިންތިހާބުގެ ކެމްޕެއިން ގައި ކެލައަށް ވަޑައިގަތުމުން ވެސް ރައްޔިތުންގެ އެންމެ ބޮޑު އުންމީދަކީ އެ ރަށުގެ ފަޅުތެރޭގައި ރިސޯޓެއް ތަރައްގީ ކުރުން ކަން ރައްޔިތުންގެ ފަރާތުން އެނގިވަޑައިގެންނެވި ކަމަށެވެ.
އެކަން ކޮށް ދެއްވާނެ ކަމަށް ރިޔާސީ އިންތިހާބު ވެސް ވައުދުވެވަޑައިގެންފައިވާނެ ކަން ފާހަގަ ކުރައްވާ ރައީސް މިއަދު ވަނީ ކެލާ ފަޅުގައި ރިސޯޓެއް ތަރައްގީ ކޮށް ދެއްވާނެ ކަމުގެ ޔަގީންކަން ދެއްވާފައެވެ. މީގެ އިތުރުން ކެލާގައި ދަނޑުވެރިކަން ފުޅާ ކުރުމަށް ހާއްސަ އިސްކަމެއް ދެއްވައިގެން މަސައްކަތްތަކެއް ކޮށް ދެއްވާނެ ކަމުގެ ޔަގީންކަން ވެސް ދެއްވި އެވެ. އަދި ބޯހިޔާވަހިކަމުގެ މައްސަލަ ހައްލުކޮށް ދެއްވުމަށް މަޝްރޫއުއެއް ހިންގަވާނެ ކަމަށް ވިދާޅުވި އެވެ.
މިއަދުގެ ރަސްމިއްޔާތުގައި ވާހަކަ ދައްކަަވަމުން ކެލާ ކައުންސިލްގެ ރައީސް ވެސް ވަނީ ކެލާ ފަޅުގައި ރިސޯޓެއް ތަރައްގީ ވެގެން ދިއުމަކީ ރައްޔިތުންގެ އެންމެ ބޮޑު އުންމީދު ކަމުގައި ވިދާޅުވެ ފައެވެ. ކެލައަށް މިވަގުތު އޮތް އެންމެ ބޮޑު މައްސަލަ އަކީ ވަޒީފާގެ ފުރުސަތު ނެތުމުން ރަށް ދޫކޮށްދާ މީހުންގެ އަދަދު ގިނަ ވުން ކަމުގައި ކައުންސިލްގެ ރައީސް ވިދާޅުވި އެވެ.
ފަޅުގައި ޓޫރިސްޓު ރިސޯޓެއް ތަރައްގީ ކުރެވި ކެލާ ތުޑި ސަރަހައްދު ގައި މިހާރު ފަށާފައިވާ ޓޫރިޒަމް މަޝްރޫއު ނިމުމުން އެ މައްސަލަ އަށް ދާއިމީ ހައްލެއް ލިބިގެން ދާނެ ކަމަށް ވެސް ވިދާޅުވި އެވެ.
ކޮމެންޓް
Republic of Maldives