ހިނގަ ހިނގާ ހުރި މަޝްރޫއުތައް ނިންމާނެ ބަޖެޓު ހިމަނާފައެއް ނެތް
ސަރުކާރުގެ ސިޔާސަތަކީ އެއްވެސް ރަށެއް ތަފާތު ނުކުރުންކަން ފާހަގަކުރައްވަމުން ރައީސް ވިދާޅުވީ، އެރަށަށް ބޭނުންވާ ކަންކަން ވެސް އިގްތިސޯދު ދެކޮޅު ޖައްސަން ކުރާ މަސައްކަތުގެ ތެރެއިން ދައުލަތުގެ އާމްދަނީ އިތުރުވާ ވަރަކުން ކޮށްދެއްވާނެ ކަމަށެވެ.
ހިނގަ ހިނގާ ހުރި މަޝްރޫއުތައް ނިންމުމަށް މިއަހަރުގެ ބަޖެޓްގައި ހިމަނާފައި ނުވާތީ، ހުއްޓިފައި ހުރި މަޝްރޫއުތައް ފަށައިގަތުމަށް ދަތިތަކާ ކުރިމަތިވެފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިއަދު ހއ. ވަށަފަރަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަ ދައްކަވަމުން ވިދާޅުވީ، މިއަހަރަށް ލަފާ ކުރާ ދައުލަތުގެ ބަޖެޓް ހެދިއިރު، ހިނގަ ހިނގާ ހުރި މަޝްރޫއުތައް ނިންމާނެ ފައިސާ ހިމަނާފައި ނުވާ ކަމަށެވެ. މިއީ މިފަދަ ގޮތަކަށް ބަޖެޓެއް ހަދާފައިވާ ފުރަތަމަ ފަހަރުކަން ވެސް ރައީސް ފާހަގަކުރެއްވި އެވެ.
ވަށަފަރުގައި ކުރިއަށް ގެންދާ ޓޫރިޒަމް މަޝްރޫއެއްގެ އިތުރުން ފެނާ ނަރުދަމާގެ މަސައްކަތް ވެސް އޮތީ ހުއްޓިފަ އެވެ. އެކަންކަން ފާހަގަކުރައްވަމުން ރައީސް ވިދާޅުވީ އިގްތިސޯދު ހަމައަކަށް އަޅުވަން ކުރާ މަސައްކަތުގެ ތެރެއިން، މިގޮތަށް ހުއްޓިފައިވާ މަސައްކަތްތައް ފައްޓަވައިދެއްވާނެ ކަމަށެވެ. މުޅި ރާއްޖޭގައި މިފަދަ އެތައް މަޝްރޫއެއް ހުއްޓިފައިވާކަން ވެސް ރައީސް ފާހަގަކުރެއްވި އެވެ.
ރައީސް ވިދާޅުވީ، އެހެނަސް ވަށަވަރުގެ ބިން ހިއްކަން ބަޖެޓްކޮށްފައިވާ ކަމަށެވެ. އެހެންކަމުން މިއަހަރު އެރަށުގެ ބިން ހިއްކަން ފައްޓަވާނެ ކަމަށެވެ. އަދި އެރަށަށް ބޭނުންވާ ކުނި މެނޭޖް ކުރާ މަރުކަޒާއި، ސިއްހީ މަރުކަޒުގައި ލެބޯޓްރީ ގާއިމް ކުރުމާއި އަދި ސްކޫލުގައި މަލްޓިޕާޕަސް ހޯލެއް އަޅުއްވައިދެއްވާނެ ކަމަށް ވެސް ވިދާޅުވި އެވެ.
ސަރުކާރުގެ ސިޔާސަތަކީ އެއްވެސް ރަށެއް ތަފާތު ނުކުރުންކަން ފާހަގަކުރައްވަމުން ރައީސް ވިދާޅުވީ، އެރަށަށް ބޭނުންވާ ކަންކަން ވެސް އިގްތިސޯދު ދެކޮޅު ޖައްސަން ކުރާ މަސައްކަތުގެ ތެރެއިން ދައުލަތުގެ އާމްދަނީ އިތުރުވާ ވަރަކުން ކޮށްދެއްވާނެ ކަމަށެވެ.
އަދި، ތަރައްގީގެ މަޝްރޫއުތައް ހިންގަން ރައްޔިތުންގެ މަޖިލީހުގެ މެޖޯރިޓީ ލިބުމަކީ މުހިންމު ކަމެއްކަން ވެސް ރައީސް ފާހަގަކުރެއްވި އެވެ.
ކޮމެންޓް
Republic of Maldives