ރިޔާސީ ބަޔާނުގެ ޖަވާބު: ކޮވިޑުގެ ވާހަކަ ނުދައްކާ އިގްތިސޯދުގެ ވާހަކަ ދެއްކުމުން އެމްޑީޕީން ނުރުހުން

މިމަހުގެ ފަސް ވަނަ ދުވަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހެޅުއްވި ރިޔާސީ ބަޔާނުގައި، އިގްތިސޯދީ އަޑުގަނޑުގަ ވާހަކަ ދެއްކެވިއިރު، 2020 ވަނަ އަހަރު މުޅި ދުނިޔެއަށް ކުރިމަތިވި ކޮވިޑް-19 ގެ ބަލިމަޑު ކަމާއި، ރަޝިއާ-ޔޫކްރޭން ހަނގުރާމައިގެ ވާހަކަ ފާހަގަނުކުރެއްވީތީ މެޖޯރިޓީ ޕާޓީ، އެމްޑީޕީން ނުރުހުން ފާޅުކޮށްފި އެވެ.

އެމްޑީޕީގެ ފަރާތުން މިއަދު ވަނީ ރިޔާސީ ބަޔާނަށް މަޖިލީހުގައި ޖަވާބު ދީފަ އެވެ. ސަރުކާރު މެމްބަރުން ފިޔަވައި އެންމެ ގިނަ މެމްބަރުން ހިމެނޭ ޕާޓީން ރިޔާސީ ބަޔާނަށް ދޭން ޖެހޭ ޖަވާބު މިއަދު އިއްވީ އެމްޑީޕީގެ ޕާލިމެންޓްރީ ގްރޫޕްގެ ލީޑަރު، އަލިފުށި ދާއިރާގެ މެމްބަރު މުހައްމަދު ރަޝީދު (ބިގޭ)

ޖަވާބު ދެއްވަން ފައްޓަވަމުން ބިގޭ ވިދާޅުވީ ރިޔާސީ ބަޔާން ރައީސް އިއްވެވީ ގައުމު އޮތް ހާލަތު ރައްޔިތުންނަށް އޮޅުވާލައްވަމުން ކަމަށެވެ. އިގްތިސޯދީ ހާލަތު ބަޔާންކޮށްދެއްވީ ދިމާވެފައިވާ މުހިންމު ކަންކަމަށް އަލިއަޅުއްވާނުލައި، މުޅިން ވެސް ދޮގު މައުލޫމާތާއި ރައްޔިތުންނަށް ކަންކަން އޮޅޭ ގޮތަށް ކަމަށެވެ.

އޭނާ ވިދާޅުވީ 2020 ވަނަ އަހަރު މުޅި ދުނިޔެއަށް ލައިގަތް ބަލިމަޑުކަމުގެ އަސަރު ރާއްޖެއަށް ވެސް ވަރަށް ބޮޑަ ކޮށްފައިވާ ކަމަށެވެ. އަދި ރަޝިއާ-ޔޫކްރޭން ހަނގުރާމައިގެ ސަބަބުން ތެލުގެ އަގު އުފުލި، އިންޓްރެސްޓް ރޭޓް ބޮޑުވުމުގެ ސަބަބުން ރާއްޖޭގެ އިގްތިސޯދަށް ވެސް ބޮޑު އަސަރެއް ކޮށްފައިވާ ކަމަށެވެ. ނަމަވެސް، ކުރީ ސަރުކާރުން ކުރި މަސައްކަތުން 2021 އަދި 2022 ވަނަ އަހަރު ދުނިޔޭގެ ނިސްބަތުން އެންމެ ބާރަށް ކުރިއަރަމުން ދިޔަ 10 އިގްތިސޯދުގެ ތެރޭގައި ރާއްޖެ ހިމެނިގެން ދިޔަ ކަމަށެވެ. 

"ނަމަވެސް ކޮވިޑްގެ ބަލިމަޑުކަމަކީ ނެތް އެއްޗަކަށް ހަދައި، ގައުމަށް ދިމާވެފައި އޮތް ނާޒުކު ހާލަތު ރައީސުލްޖުމްހޫރިއްޔާ ތިލަކޮށްލެއްވީ ސިޔާސީ ބޯޅަ ޖެއްސެވުމުގެ ނިޔަތުގައި. މިއީ ވަރަށް ޒިންމާދާރުކަން ކުޑަކޮށް އެމަނިކުފާނު ކުރެއްވި ކަމެއް ކަން އަޅުގަނޑު ފާހަގަކުރަން،" ރިޔާސީ ބަޔާނަށް ޖަވާބު ދެއްވަމުން ބިގޭ ވިދާޅުވި އެވެ.

އޭނާ ވިދާޅުވީ ކޮވިޑާއެކު ދައުލަތުގެ އާމްދަނީ 50 ޕަސެންޓް ކުޑަ ނަމަވެސް، އެ ހާލަތުން އަރައިގަންނަން ކުރީ ސަރުކާރުން އެޅި މުހިންމު ފިޔަވަޅުތަކުގެ ތެރޭގައި، އިންކަމް ސަޕޯޓް ދިނުމާއި، މަޝްރޫއުތައް ހުއްޓުމެއް ނެތި ކުރިއަށް ގެންދިއުމާއި އަދި ފަތުރުވެރިކަން ވެސް ނަގާ ކޮޅަށް ޖެހިކަން ބިގޭ ފާހަގަކުރެއްވި އެވެ. އަދި، މަސްވެރިންނަށް ދޭން ޖެހޭ ފައިސާ 10 ދުވަސްތެރޭގައި އޭރު ވެސް ދެމުން ދިޔަ ކަމަށެވެ. ލޯނު ނަގައިގެން ވެސް ރާއްޖޭގެ އިގްތިސޯދު، ކޮވިޑްގެ ކުރީގެ ހާލަތަށް ގެނެވުނީ ރޭވުންތެރިކަމާއެކު ކުރި މަސައްކަތުން ކަމަށްވެސް ވިދާޅުވި އެވެ.

"ދަރަނި ނަގައިގެން އަޅުގަނޑުމެން ކޮށްފައިވާ މަސައްކަތްތަކަކީ ރާއްޖޭގެ އިގްތިސޯދު ބަދަލުކޮށްލާނެ ތަރައްގީގެ ގިނަ މަސައްކަތްތަކެއް. ދަރަނި ނެގީ އަދާކުރެވޭ ކަމުގެ ފުރިހަމަ ޔަގީންކަން އޮތީމަ،" ބިގޭ ވިދާޅުވި އެވެ.

އޭނާ ވިދާޅުވީ 2025 އަދި 2026 ވަނަ އަހަރު ދައުލަތުން އަދާކުރަން ޖެހޭ ދަރަނި އަނބުރާ ދައްކަން ރާވާފައިވާ ގޮތުގެ ޕްލޭނެއް މިއަހަރުގެ ދައުލަތުގެ ބަޖެޓުގައި ވެސް ހިމަނާފައިވާ ކަމަށެވެ. ނަމަވެސް ރައީސް މުއިއްޒުގެ ސަރުކާރުން ދަރަނި ދައްކާނެ ގޮތުގެ އެއްވެސް ޕްލޭނެއް ރިޔާސީ ބަޔާނުގައި ވިދާޅުވެފައި ނުވާ ކަމަށެވެ. އަދި ރައީސް ރިޔާސީ ބަޔާނުގައި ފާހަގަކުރެއްވި، ދަލަތުގެ ހަރަދަށް ޒިންމާވާ ގާނޫނުގައި، ޕަބްލިކް އޯވަޑޮރާ ކުރެވޭ ލިމިޓް ސަސްޕެންޑް ކުރުމަމީ މި ސަރުކާރުގެ ނިންމުމެއް ނޫން ކަމަށާއި، އެއީ ކުރީ ސަރުކާރުގެ ނިންމުމެއް ކަން ވެސް ފާހަގަކުރެއްވި އެވެ.

"ފަތުރުވެރިކަމުގެ ވާހަކައިގަ ރައީސްގެ ބަޔާނުގައި ވިދާޅުވީ މިއަހަރު ފުރަތަމަ ފަހަރަށް ރާއްޖޭގައި 2 މިލިއަން ޓޫރިސްޓުން ރާއްޖެ ޒިޔާރަތް ކުރާނެ ކަމަށް. ދަންނަވަންތޯ، މިއީ ތިން މަސް ދުވަހުގެ މަސައްކަތުގެ ނަތިީޖާއެއް ނޫން. މީ ކޮވިޑްގެ އަޑިގުޑަނުން އަރައިގަތުމަށް ކުރި ރޭވުންތެރި މަސައްކަތުގެ ހެޔޮ ނަތީޖާ،" ބިގޭ ވިދާޅުވި އެވެ.

ކުރީން ރާއްޖޭގައި ހިންގާ ނުވާވަރަށް ކުރީ ސަރުކާރުން ތަރައްގީގެ މަޝްރޫއުތައް ވެސް ހިންގި ކަމަށާއި ނަމަވެސް މިހާރު އެއިން އެއްވެސް މަސައްކަތެއް ކުރިއަށް ނުދާކަން ވެސް އޭނާ ފާހަގަކުރެއްވި އެވެ. ވިދާޅުވީ، އިޖްތިމާއީ މައްސަލަތަކުގެ ވާހަކަ ވެސް ބަޔާނުގައި ހިމަނާފައި ނުވާ ކަމަށާއި، ކުށްކުރާ ގްރޫޕްތަކާއި މަސްތުވާތަކެއްޗާ ދެކޮޅަށް އެއްވެސް ވާހަކައެއް ނުދެއްކެވުމުން ކަންބޮޑުވާ ކަމަށެވެ.

ރިޔާސީ ބަޔާނަށް ޖަވާބު ދެއްވަމުން ބިގޭ ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. ކުރީ ސަރުކާރުން ކޮށްފައިވާ ކަންކަން ފާހަގަނުކޮށް، ރައްޔިތުންނަށް އޮޅޭ ގޮތަށް ދޮގު މައުލޫމާތު ދެއްވާފައިވާ ކަމަށް ތުހުމަތު ކުރެއްވި އެވެ.