"އިދިކޮޅު އުޅެނީ ގައުމު ބަނގުރޫޓު ކޮށްލައިގެން ވިޔަސް، ވެރިކަން ވައްޓާލަން"

އިދިކޮޅު ފަރާތްތައް މަސައްކަތް ކުރަނީ ރާއްޖެ ބަނގުރޫޓުކޮށްލައިގެން ނަމަވެސް ރައީސް ޑރ. މުހައްމަދު މުއިއްޒުގެ ވެރިކަން ވައްޓާލަން ކަމަށް ކޮންގްރެސް ޕާޓީގެ މަޖިލިސް މެންބަރު، ފޭދޫ ދާއިރާގެ މުހައްމަދު ނިހާދު ވިދާޅު ވެއްޖެ އެވެ.

ނިހާދަކީ އެމްޑީޕީގައި ހުންނެވުމަށް ފަހު މި ވެރިކަމުގެ ތެރޭގައި ކޮންގްރެސްއާ ގުޅި ވަޑައިގެންނެވި ބޭފުޅެކެވެ. 

އޭނާ ވިދާޅުވީ ދިވެހި ރާއްޖެ ބަނގުރޫޓުވެއްޖެ ކަމަށް ބުނެ ފަތުރަނީ ދޮގު ކަމަށާއި ދޮގު ވާހަކަ ފަތުރައިގެން ވެސް އިދިކޮޅުން މިހާރު ބޭނުން ވެގެން އުޅެނީ ވެރިކަން ވައްޓާލެވޭތޯ ކަމަށެވެ. އެކަން ކުރަން ރާއްޖެ ބަނގުރޫޓް ކޮށްލައިގެން ނަމަވެސް އިދިކޮޅަށް ވަރިހަމަ ކަމަށެވެ.

ނހާދު ވިދާޅުވީ އިދިކޮޅުގެ އެ އަމަލުން ސާފު ވެން ދަނީ ގައުމާއި ރައްޔިތުންގެ މައްޗަށް އެއްވެސް ކުލުނެއް، ލޯތްބެއް ނެތުން ކަމަށެވެ. މީގެ އިތުރުން ނިހާދު ވިދާޅުވީ ރައްޔިތުންގެ މެޖޯރިޓީން ގެނައި ވެރިކަމެއް ބަޣާވާތަކުން ވައްޓާލަން އުޅުމާ ދެކޮޅު ހަދަން ޖެހޭނެ ކަމަށެވެ.

"އުޅެނީ އަމިއްލަ ޖީބު ބޮޑު ކުރަން. ވެރިކަމުގެ ލައްޒަތާއި ޖާހަށްޓަކައި. ދެރަ،" މެންބަރު ނިހާދު ވިދާޅުވި އެވެ.