ކަންބަޅި؛ މޮޅު ރީތި ފިލްމެއް، ވަރަށް އިބްރަތްތެރި
އިއްލެ އަކީ އޭނާ ކުރާ ކޮންމެ މަސައްކަތެއް ގައި މެކްސިމަމް ދައްކަން ބޭނުންވާ މީހެއްކަން "ނީނާ" އާއި "ބަވަތި" ބެލި ކޮންމެ މީހަކަށް ޔަގީން ވާނެ އެވެ. "ކަންބަޅި" އަކީ ވެސް އެފަދަ ފިލްމެކެވެ.
ފިލްމު ފެށިގެން އަންނަނީ ހިތްގައިމު ރީތި ލަވައަކުންނެވެ. އެއީ އުފާވެރި އާއިލާ އެކެވެ. މަންމަގެ ނުގަބޫލު ގައި ކުރެވުނު ކައިވެންޏަކަށް ވިޔަސް ދެމަފިރީންގެ މެދުގައި ވަނީ ގަދަފަދަ ލޯބްތެކެވެ. އެ ލޯބި އިތުރަށް ބަދަހިކޮށް ވަރުގަދަ ކޮށް ދިނީ ދެމަފިރީންނަށް ލިބުނު ލޯބިލޯބި ދަރިފުޅެވެ. އަލައިނާ އެވެ. އެކަމަކު މަދު ދުވަސްކޮޅެއްގެ ތެރޭގައި ފިރިމީހާގެ ކުއްލި މަރާ އެކު އާލިއާގެ އުފާވެރި ދިރިއުޅުމަށް ހުރަސް އެޅެ އެވެ. ނަމަވެސް ދަރިފުޅަށްޓަކާ އާލިއާ ހިތްވަރު ކުރެ އެވެ. ކޮއްކޮ، އާލިންއާ އޭނާގެ ފިރިމީހާ އިންމަގެ އެހީތެރި ކަމުގައި ދިރިއުޅުން ކޮޅަށް ޖަހަން މަސައްކަތް ކުރެ އެވެ.
މިއީ މިހާރު އޮލިމްޕަހު ގައި އޮތް ފިލްމު "ކަންބަޅި" ފެށިގެން އަންނަ ގޮތެވެ. ފެށިގެން އަންނަނީ ލޯބި، ހިތާމަ، ހިތްވަރުންނެވެ.
އެކަމަކު ދެން އަންނަ ކޮންމެ މަންޒަރަކީ ދެން ވާނީ ކިހިނެތްތޯ ސުވާލު ކޮށްލަ ކޮށްލާ އިންނަން ޖެހޭ ފަދަ މަންޒަރެކެވެ. އެހާ ވެސް ސަސްޕެންސް ބޮޑެވެ. ޒުވާން / އެހާމެ ކުޅަދާނަ ޑައިރެކްޓަރު އިލްޔާސް ވަހީދު (އިއްލެ) ގެ ފިލްމު ތަކުގެ ހާއްސަ ކަމަކީ އެއީ އެވެ. އިއްލެގެ ކޮންމެ ފިލްމެއް ގެނެސް ދެނީ އެއް މަންޒަރަަށް ވުރެ އަނެއް މަންޒަރު ޝައުގުވެރި ކުރުވާ ގޮތަށެވެ. މުޅި ފިލްމު ޝައުގުވެރި ކަމާ އެކު ބަލާލެވޭނެ ގޮތަށެވެ. ފިލްމުގައި ދައްކުވައި ދޭ ހާދިސާ ވަށައި ޖައްސައި ލަނީ ހީވެސް ނުކުރާހާ ތަފާތު ގޮތަކަށް / އެހާމެ މޮޅަށެވެ.
"ކަންބަޅި" އަކީ ވެސް އެެފަދަ ފިލްމެކެވެ.
"ކަންބަޅި" އަކީ ތަފާތު ރަހަތަކުން މުއްސަދި ކޮށްދީފައި އޮތް މޮޅު / ރީތި ފިލްމެކެވެ. ފިލްމާ ބެހޭ ގޮތުން ފުރަތަމަ ވެސް ބުނަން ޖެހެނީ އެހެނެވެ. އެ ފިލްމު ލޯބީގެ ފިލްމަކަށް ފުދެ އެެވެ. އެއްބަނޑު އެއްބަފާ ދެ އަންހެނުންގެ މެދުގައި އޮންނަން ޖެހޭ ގާތް ކަމާއި ބަދަހި ކަން ދައްކުވައި ދޭ ފިލްމެކެވެ.
މިއީ ބިރުވެރި ފިލްމެކޭ ވެސް ބުނެވިދާނެ އެވެ. ބައެއް މަންޒަރުތަކުން ބިރުން ފިތްކަނޑައިގެންދާހާ އެވެ. އަނެއް ކޮޅުން މިއީ ދިވެހި މުޖްތަމައު އަށް ވަރަށް ބޭނުންތެރި އެހާމެ އިބްރަތްތެރި ފިލްމެކޭ ވެސް ބުނާން ޖެހެ އެވެ. އަހަރެން ދަންނަ އިއްލެ މިކަހަލަ ފިލްމެއް ހަދާފާނެކޭ ކުރީން ހިތަކަށް ނާރަ އެވެ. އެކަމަކު މި ފިލްމު ބަލާފައި ކޮންމެ ޖޯންރާއެއްގެ ފިލްމެއް ވެސް އިއްލެ، އެހާ މޮޅަށް ހަދާނެ ކަން ގަބޫލު ކުރެވިއްޖެ އެވެ.
ފިލްމުގައި މައިގަނޑު ކޮށް ދައްކަނީ ސިހުރުގެ ސަބަބުން ދިމާވާ ކަންތައްތަކެކެވެ. މި ފިލްމަކީ މިހާރާ ގުޅޭ ދިވެހީންނަށް މުހިންމު މެސެޖުތަކެއް ލިބޭ ފިލްމެކޭ ބުނީ މި ސަބަބާ ހުރެ އެވެ.
ތަށި އެނބުރުމާއި ސިހުރު ފަންޑިތައިގެ ބާރުން ކަންކަން ކުރުމަކީ އަދިވެސް އަހަރެމެންގެ ތެރޭގައި އޮތް ކަމެކެވެ. ފިލްމު ގައި ދައްކަނީ ޒުވާން އެކުވެރީންތަކެއް މަޖަލަށް އެކަންކަން ތަޖުރިބާ ކުރުމުން ދެން ދިމާވާ ކަންތައްތަކެވެ.
އެކަމުގައި އަނިޔާވެރި ކަމާ އެކު އެ ހަތަރު ޒުވާނުން މަރުވެ އެވެ. އެކަމާ އެއްވެސް ގުޅުމެއް ނެތަސް އާލިއާގެ ދިރިއުޅުން ވެސް ސިހުރުގެ ސަބަބުން ފުނޑުފުނޑުވެގެން ދެ އެވެ. މި ހުރިހާ ކަމެއް ގުޅުވާލުމުން އިއްލެގެ "ކަންބަޅި" ވެގެން ދަނީ ޝައުގުވެރި / މޮޅު ފިލްމަކަށެވެ.
އިއްލެ އަކީ އޭނާ ކުރާ ކޮންމެ މަސައްކަތެއް ގައި މެކްސިމަމް ދައްކަން ބޭނުންވާ މީހެއްކަން "ނީނާ" އާއި "ބަވަތި" ބެލި ކޮންމެ މީހަކަށް ޔަގީން ވާނެ އެވެ. އެ ހާލަތަކާއި ގުޅޭ ގޮތަކަށް މޭކަޕް ކުރަން ޖެހޭނެ އެވެ. ކޮންމެ މަންޒަރަކުން ފިލްމަށް ފުރިހަމަ ކަން ގެނެސްދޭނެތީ ކޮންމެ މަންޒަރެއް ނަގަން ޖެހޭނީ އެ މަންޒަރެއް ނަގަން އެންމެ މުނާސަބު ތަނެއް ގައެވެ.
މިއީ މި ފަހުން ދިވެހި ފިލްމުތަކުން އެހާ އާންމުކޮށް ފެންނަ ކަންކަމެއް ނޫނެވެ. ހަރަދު ބޮޑުވާތީ ނުކުރަނީ ކަމަށް ވެސް ވެދާނެ އެވެ. އެކަމަކު އިއްލެގެ ކުރީގެ ފިލްމުތަކެކޭ އެއްގޮތަށް މި ފިލްމުގައި ވެސް ރުތުބާގެ ވަރަށް މޭކަޕް ކުރުމުގެ ހުނަރު ފެނިގެން ދެ އެވެ. މަންޒަރުތައް ފުރިހަަމަ ކުރުމަށް ވަރަށް ގިނަ މަސައްކަތްތައް ކޮށްފައިވެ އެވެ.
ފިލްމުގައި ހިމެނެނީ ވަރަށް ރީތި ދެ ލަވަ އެވެ. ލަވައިން ފިލްމަށް ގެނެސްދިން ފުރިހަމަ ކަން ބޮޑެވެ. "ނީނާ" އާއި "ބަވަތި" ގައި ވެސް އިއްލެ އެ އުކުޅު ބޭނުން ކޮށްފައިވެ އެވެ.
ފިލްމެއް ރީތި ވުމުގައި އެކްޓަރުން / އެކްޓްރެސް އިން ދައުރަށް ވުރެ ބޮޑު ދައުރެއް ނޯންނާނެ އެވެ. ފިލްމު ގައި ފެންނަ ކިތަންމެ ކުޑަ ރޯލެއް ވެސް އޭގެ އެންމެ ފުރިހަމަ ގޮތުގައި ގެނެސް ދިނުމަށް އިއްލެ މަސައްކަތް ކޮށްފައި ވަނީ ތައުރީފު ހައްގު މިންވަރަކަށެވެ.
މި ފިލްމުގައި އުމުރުން އެންމެ ހަ އަހަރުގެ ކުއްޖަކު މުހިންމު ރޯލަކުން ފެނެ އެވެ. އެއީ ސަރާ ބިންތު މުހައްމަދު ފާރިގް އެވެ. ފިލްމުގެ ނަމުން އައިލަނާ އެވެ. ސަރާގެ އެކްޓިން ވަރަށް މޮޅެވެ. އާލިންގެ ރޯލުން ފެނިގެންދާ ވާޝިޔާ އާއި އިންމަގެ ރޯލުން ފެނިގެންދާ ޝަރަފް އަދި އާލިއާ ގެ ރޯލުން ފެނިގެންދާ ނުޒޫގެ އެކްޓިން އަށް ދޭން ޖެހެނީ 100 އެވެ.
އަރީޝްގެ ރޯލުން ފެންނަ ރަވީގެ ކެރެކްޓާ މާ ބޮޑު ނޫން ނަމަވެސް އެއީ ފިލްމުގައި ވަރަށް މުހިންމު ރޯލެކެވެ. އިފްނާޒް އާއި ތާތި އާދަމް އާއި އިޝްފާންގެ އިތުރުން އަލީފް އާއި ޗަންނަ އަދި ހާފިޒް އާއި ފާތުން ވެސް ކުޅެފައި ވަނީ އެހާމެ މުހިންމު ރޯލްތަކެވެ.
އިޝްފާން އާއި އަލީފް އަދި ޗަންނަ އާ ހާފިޒަކީ ވަރަށް ގާތް އެކުވެރީންނެވެ. އެ މީހުންނަށް ދިމާވާ ހާދިސާތައް ދައްކުވައި ދީފައި ވަނީ މޮޅަށެވެ. ހާއްސަކޮށް އަލީފެވެ. ހާފިޒަކީ ހެއްވާ މަޖާ ވީޑިއޯތަކުން މީހުންގެ ބޮޑު މަގުބޫލު ކަމެއް ހޯދާފައިވާ މީހެކެވެ. މި ފިލްމު ގައި ވެސް ހާފިޒުގެ ބައެއް ޑައިލޮގް ތަކުން މުޅި އޯޑިއަންސް ހެއްވާލި ފަހަރެއް ދިޔަ އެވެ. މިއީ ވެސް އިއްލެގެ ފިލްމު ތަކުގައި ތަފާތެވެ. ހީލާނެ ފުުރުސަތެއް ކޮންމެ ފިލްމަކުން ހޯދައިދެ އެވެ.
ހާފިޒުގެ ފުރަތަމަ ޑައިލޮގް ކޮޅުން ހެއްވާލި ނަމަވެސް ކަންކަން ބަދަލުވެ ބޮޑު ބިރުވެރިކަމެއްގެ ތެރެއިން މަރާ ކުރިމަތިލާން ޖެހެނީ ހީވެސް ނުކުރާ ފަދަ ގޮތަކަށެވެ.
"ކަންބަޅި" އާ ގުޅޭގޮތުން މިކަހަލަ ކިތަންމެ ވާހަކައެއް ދެއްކި ދާނެ އެވެ. މިހާރު ވެސް ރިވިއު އަކަށް ފުދޭ ވަރަށް ވުރެ މާ އިތުރަށް ފިލްމުގެ ވާހަކަ ކިޔައި ދެވިއްޖެ އެވެ. އަޅުގަނޑު ހިތުން މިއީ ކޮންމެހެން ބަލާލަން ޖެހޭ ފިލްމެކެވެ.
ވަރަށް ޝައުގުވެރި ކަމާ އެކު ބަލާލެވޭނެ ފިލްމެކެވެ. ކުރިއަށް އޮތީ ވީކެންޑެވެ. އެންމެ ގާތް އެކުވެރިންނާއި އާއިލާއާ އެކު ވެސް ބަލާލަން ދާން ރަނގަޅު ފިލްމެކެވެ. އެކުވެރި އިއްލެގެ މި ފަހަރުގެ ޕްރޮޖެކްޓަށް ވެސް އަޅުގަނޑު ދޭނީ އޭ ޕްލަސް އެކެވެ. ސަތޭކަ އަކުން ސަތޭކަ އެކެވެ. އައްސަރަހިބަހަކާއި ސާބަހެކެވެ. މި ސާބަހުގައި އިއްލެއާ އެކު ފިލްމު ޑައިރެކްޓް ކުރުމުގައި ބައިވެރިވި ޒުވާން އެކްޓަރު އިފްނާޒްއާ އައި ފިލްމްސްގެ އެއް "ލޯ" ކަމުގައިވި އަހްމަދު އާސިމް (ސިއްބެ) ގެ ނަން ހިމަނަން ޖެހެ އެވެ. "ކަންބަޅި" ޓީމަށް ހާސް ފަށުން ސާބަހެކެވެ.
ބެލުންތެރީންނަށް އޮތީ މި ފުރުސަތުގެ ބޭނުން ހިފާ ފިލްމު ބަލައިލާން އަވަހަށް ދިއުމަށް ދޭން އޮތް ދައުވަތެވެ.
ކޮމެންޓް
Republic of Maldives