ރައީސްގެ ދެކަނބަލުން މުލިއާގެއަށް ބަދަލު ވެވަޑައިގެންފި

ރައީސުލްޖުމްހޫރިއްޔާގެ ރަސްމީ ގެކޮޅު -- މުލިއާގެއަށް ރައީސުލްޖުމްހޫރިއްޔާގެ ދެކަނބަލުން ދިރިއުޅުއްވުން ބަދަލު ކުރައްވައިފި އެވެ.

ރައީސުލްޖުމްހޫރިއްޔާއަށް ހާއްސަ ރަސްމީ ގެކޮޅަކީ މުލިއާގެ އެވެ. މުލިއާގެ އިން ކުރީގެ ރައީސް އިބްރާހިމް މުހައްމަދު ސޯލިހްގެ ދެކަނބަލުން ނުކުމެވަޑައިގަތުމާ އެކު ގެކޮޅު މަރާމާތު ކުރުމުގެ މަސައްކަތް ވަނީ ފަށާފަ އެވެ. ރައީސް ސޯލިހްގެ ދެކަނބަލުން ވަނީ ދައުރު ހަމަވުމުގެ ހަފްތާ އެއްގެ ކުރީން މުލިއާގެ އިން ނިކުމެވަޑައިގެންފަ އެވެ.

މުލިއާގެ މަރާމާތު ކުރެއްވުމުގެ މަސައްކަތް ކުރިއަށް ދާތީ، ހުވާ ކުރެއްވުމަށްފަހު ރައީސް މުއިއްޒުގެ ދެ ކަނބަލުން އުޅުއްވީ އެމަނިކުފާނުގެ އަމިއްލަ ގެކޮޅު ކަމަށްވާ މ. ދިމްޔާތުގަ އެވެ. މަރާމާތުކޮށް ނިމުމުން ރައީސްގެ ދެކަނބަލުން މުލިއާގެއަށް ބަދަލުވެވަޑައިގެންފައި ވަނީ މީގެ ދެ ދުވަހެއް ކުރީންނެވެ.

އުމުރުން 18 އަހަރު ނުވާތީ ރައީސްގެ ބޭފުޅުން އުޅުއްވާނީ އެމަނިކުފާނާއެކު މުލިއާގޭގަ އެވެ. ރައީސްގެ ތިން ބޭފުޅުން ތިއްބަ އެވެ. އެއީ އަންހެން ބޭފުޅަކާއި ފިރިހެން ދެ ބޭފުޅުންނެވެ.

މީގެ 104 އަހަރު ކުރިން އައްސުލްތާން މުހައްމަދު ޝަމްސުއްދީންގެ ވެރިކަމުގައި ބިނާކޮށްފައިވާ މުލީއާގެއަކީ އެކި ވެރިކަންތަކުގައި ރައީސުން ދިރިއުޅުއްވި ގެކޮޅެވެ. 

އެތަން އެކި ދުވަސްވަރު މަތިން މަރާމާތު ކުރަނީ ތަރިކަ ރައްކާތެރި ކުރުމުގެ ގޮތުންނެވެ. މި މަރާމާތުގެ ތެރެއިން މުލިއާގޭގެ ސްޓްރަކްޗާއަށް އެއްވެސް ބަދަލެއް ގެނެސްފައެއް ނުވެ އެވެ.