އެމްޑީޕީގެ ނިންމުމާ ދެކޮޅަށް ޖާބިރާ ޖަމްޝީދު ޖަލްސާގައި

ރިޔާސީ ބަޔާން އިއްވުމުގެ ޖަލްސާ މަޖިލީހުގެ މެޖޯރިޓީ ޕާޓީ -- އެމްޑީޕީން ބޮއިކޮޓް ކޮށްފައި ވަނިކޮށް އެ ޕާޓީގެ ދެ މެންބަރަކު ޖަލްސާ ގައި ބައިވެރިވެވަޑައިގެންފި އެވެ.

އެމްޑީޕީގެ ޕީޖީ ގުރޫޕް ބައްދަލްވެ ރޭ ވަނީ މިއަދުގެ ޖަލްސާ ބޮއިކޮޓް ކުރަން ނިންމާފައެވެ. ރުހުން ނުދިން ވަޒީރުން އަލުން މަގާމުތަކަށް އައްޔަނު ކުރުމާއި ރުހުން ދިނުމުގެ މައްސަލަ ފުރަތަމަ އެޖެންޑާ ކުރި ދުވަހު ސަރުކާރުގެ ވެރީން މަޖިލީސް ކައިރިއަށް އެއްވެ މުޒާހަރާ ކުރުމާއި މިއަދަކީ ރަސްމީ ބަންދު ދުވަހެއްގެ ގޮތުގައި ހަމަޖައްސަން ސަރުކާރުން ދެކޮޅު ހެދުން ފަދަ ކަންކަން ފާހަގަކޮށް މިއަދުގެ ޖަލްސާ ބޮއިކޮޓް ކުރާކަން މަޖިލީހުގެ އިދާރާއަށް ވެސް އެމްޑީޕީން އޮތީ އަންގާފައެވެ.

ނަމަވެސް މިއަދުގެ ޖަލްސާގައި އެމްޑީޕީގެ ތިން މެންބަރަކު ބައިވެރިވެވަޑައިގަތެވެ. އެއީ މަޖިލީހުގެ ރައީސްގެ ހައިސިއްޔަތުން ހިތަދޫ އުތުރު ދާއިރާގެ މެންބަރު މުހައްމަދު އަސްލަމާއި ކުޅުދުއްފުށި ދެކުނު ދާއިރާގެ މެމްބަރު ޖަމްޝީދު މުހައްމަދާއި ކާށިދޫ ދާއިރާގެ މެމްބަރު އަބްދުﷲ ޖާބިރެވެ.

ޖަމްޝީދަކީ އިކޮނޮމިކް މިނިސްޓަރު މުހައްމަދު ސައީދަަށް ރުހުން ނުދޭން އެމްޑީޕީން ތްރީލައިން ވިޕް އަޅާފައި ވަނިކޮށް އެ ނިންމުމާއި ދެކޮޅަަށް ވެސް ވޯޓް ދެއްވާފައިވާ މެންބަރެކެވެ. ޖަމްޝީދުގެ އިތުރުން އިހަވަންދޫ ދާއިރާގެ މެމްބަރު މުހައްމަދު ޝިފާއު އާއި ފުވައްމުލަކު ދެކުނު ދާއިރާގެ މެމްބަރު މުހައްމަދު މުމްތާޒާއި ބިލެތްދޫ ދާއިރާގެ މެމްބަރު އަހްމަދު ހަލީމް ވެސް ސައީދަށް ރުހުން އޮތް ކަމަަށް ވޯޓް ދެއްވި އެވެ. އެ މެންބަރުންގެ މައްސަލަ ބަލާ ފިޔަވަޅު އަޅާނެ ކަމަށް އެމްޑީޕީން ވަނީ ބުނެފައެވެ.

މި މެންބަރުންގެ ތެރެއިން ހަލީމް ނޫން ބޭފުޅަކު 20 ވަނަ މަޖިލީހަށް ވާދައެއް ނުކުރައްވަ އެވެ. އެމްޑީޕީގެ ޕްރައިމަރީ ގައި ޖުމްލަ 500 ވޯޓާ އެކު އެންމެ ގިނަ ވޯޓް ހޯއްދަވައިގެން އެމްޑީޕީގެ ޓިކެޓް ހޯއްދެވީ ހަލީމެވެ.

މެންބަރު ޖާބިރަކީ މި ހިނގާ މަޖިލީހަށް އަމިއްލަ ގޮތުން އިންތިހާބުވީ މެންބަރެކެވެ. އެމްޑީޕީއާ ގުޅިވަޑައިގަތީ ރިޔާސީ އިންތިހާބުގެ ދުވަސްވަރު އެވެ.

ނަމަވެސް އަންނަ މަޖިލީހަށް ވާދަކުރަން ކާށިދޫ ދާއިރާ އިން އެމްޑީޕީގެ ޓިކެޓް ޖާބިރު ވަނީ ހޯއްދަވާފައެވެ. ޖާބިރު ވެސް ޓިކެޓް ހޯއްދެވީ ވާދަވެރި ޕްރައިމަރީ އަކުންނެވެ.

މަޖިލީހުގެ މިއަދުގެ ޖަލްސާ ގައި އެމްޑީޕީގެ ނިންމުމާ ދެކޮޅަށް ޖަމްޝީދާއި ޖާބިރު ބައިވެރިވެވަޑައިގަތުމުން އެ މެންބަރުންނާ މެދު އަމަލު ކުރާނެ ގޮތެއް އެމްޑީޕީ ޕީޖީން އަދި ނުބުނެ އެވެ.