އަންޑަވޯޓާ ޓަނަލަކުން މާލެއާ ރަސްމާލެ ގުޅާލާނެ: ރައީސް

އަންޑަވޯޓާ ޓަނަލަކުން މާލެއާ ރަސްމާލެ ގުޅާލައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ އިއުލާނު ކުރައްވައިފި އެވެ.

މާލެ ސިޓީގެ އާ މޭޔަރާއި ތިން ދާއިރާއަކަށް އިންތިހާބުވި ކައުންސިލަރުން ހުވާ ކުރުމަށް މިރޭ ބޭއްވި ޖަލްސާ ގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ އެމަނިކުފާނުގެ ސަރުކާރުން މާލެ ރައްޔިތުންނަށް ވެފައިވާ އެންމެ ބޮޑު ވައުދަކީ މާލެ ސަރަހައްދުގެ ބޯހިޔާވަހިކަމުގެ މައްސަލަ ހައްލު ކުރުން ކަމަށެވެ.

ފޭރާން ހެޔޮ ސިޔާސަތަކުން ގެދޮރުގެ މައްސަލަ ހައްލު ކުރައްވާނެ ކަމަށާ ރަސްމާލެ މަޝްރޫއު ނުހިންގާ އެ މައްސަލަ ހައްލު ނުކުރެވޭނެ ކަމަށް ރައީސް ވިދާޅުވި އެވެ. މާލެ ރައްޔިތުން ބޭނުންވަނީ ގުޅިފައިވާ ރަށްތަކެއްގައި ދިރިއުޅެން ކަމަށް ވިދާޅުވެ އާ މޭޔަރު އާދަމް އާޒިމް ރަސްމާލެ މަޝްރޫއު ހުއްޓާލުމަށް ނުސީދާކޮށް މިރޭ ގޮވާލެއްވުމުން އެކަމަށް ނުސީދާ ރައްދެއް ދެއްވާ ރައީސް ވިދާޅުވީ މި ސަރުކާރުން ކުރާނީ ދެކޮޅު ޖެހޭ މަސައްކަތްތައް ކަމަށެވެ.

މާލެއާ ހުޅުމާލެ އާއި ވިލިމާލެ އާއި ގުޅިފަޅާއި ގިރާވަަޅުފަޅާއި އުތުރުތިލަފަޅު ގުޅޭ ގޮތަށް މާލެ އާއި ރަސްމާލެ ވެސް ގުޅޭނެ ކަމަށް ރައީސް ވިދާޅުވި އެވެ. އެކަން ކުރައްވާނީ އަންޑަވޯޓާ ޓަނަލެއް މެދުވެރިކޮށް ކަމަށް ރައީސް ވިދާޅުވި އެވެ. ރައީސް ވިދާޅުވީ ޓަނަލް ހަދާނީ ކަނޑު އަޑީގެ ރީތި މަންޒަރުތައް ފެންނަ ގޮތަށް ކަމަށެވެ. އަދި އެ މަސައްކަތް ވެގެން ދާނީ ރާއްޖޭގެ ޓޫރިޒަމްގެ ބޮޑު މަޝްރޫއު އަކަށް ކަމަށް ވިދާޅުވި އެވެ. އަދި އެއާއެކު ރާއްޖެ އަންނަ ޓޫރިސްޓުންގެ އަދަދު އެތައް ގުނައެއް އިތުރު ވެގެންދާނެ ކަމަށް ރައީސް ވިދާޅުވި އެވެ.

"އަޅުގަނޑުމެން ކުރާނީ ދެކޮޅު ޖެހޭ މަސައްކަތް،" ރަސްމާލެ މަޝްރޫއުއާ ދެކޮޅަށް ވާހަކަ ދައްކަވާ ބޭފުޅުންނަށް ރައްދު ދެއްވާ ރައީސް ވިދާޅުވި އެވެ.

ރައީސް މިރޭ ވިދާޅުވީ އެ މަޝްރޫއު ހިންގުމަށް ގާބިލް ކުންފުނިތަކާއި ވާހަކަ ދައްކާ މަޝްވަރާ ކުރަމުންދާ ކަމަށެވެ.