މަރާމާތު ނުކުރުމުން ސަލްމާން މިސްކިތުގެ އޭސީ ސިސްޓަމް ބޮޑުބައެއް ހުރީ ހަލާކުވެފައި

މެއިންޓަނެންސް ނުކޮށް ގިނަ އަހަރުތަކެއް ވުމުން ސަލްމާން މިސްކިތުގެ އޭސީ ސިސްޓަމް ބޮޑުބައެއް ހަލާކުވެފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ކުރީ ސަރުކާތުގެ ދުވަސްވަރު ސަލްމާން މިސްކިތް ބެލެހެއްޓުމަށް އެކަށީގެންވާ މަސައްކަތެއް ނުކުރާ ކަމުގެ ތުހުމަތު އޮތެވެ. މިސްކިތުގައި އެންމެ ޒަމާނީ ފެންވަރުގެ އޭސީ ސިސްޓަމެއް ގާއިމު ކޮށްފައި ހުރި ނަމަވެސް ގިނަ ދުވަސްތަކެއް ހޭދަވީއިރު މިސްކިތް ފިނި ކުރެވޭ ގޮތެއް ނުވި އެވެ. މިސްކިތް އަލި ކުރަނީ ވެސް އެކަމަށް ހާއްސަ ސިސްޓަމަަކުންނެވެ.

ބައެއް ދުވަސް ދުވަހު ކަރަންޓްގެ އަލިކަން ނެތި އަނދިރީގައި ވެސް ނަމާދު ކުރަން ޖެހިފައިވެއެވެ.

ޝަހީމް މިއަދު ވިދާޅުވީ ގިނަ އަހަރުތަކެއް މެއިންޓަނެންސް ނުކޮށް ހުރުމުގެ ސަބަބުން ސަލްމާން މިސްކިތުގެ އޭސީ ސިސްޓަމް ބޮޑު ބައެއް ހަލާކުވެފައިވާ ކަމަށެވެ. އެހެން ކަމުން ބޭރުގެ ކޮންސަލްޓެންޓުންގެ އެހީ ގައި ސިސްޓަމްގެ ބައެއް ބައިތައް މަރާމާތު ކޮށްފައިވާ ކަމަށް ވިދާޅުވި އެވެ.

އަދި ވިދާޅުވީ ނަމާދު ކުރާ ފަންގިފިލާތަކަށް މިހާރު ވާނީ ފިނިވާ ގޮތް ހަދާފައި ކަމަށެވެ.

ސަލްމާން މިިސްކިތް ފިނިނުވާ މައްސަލައާ ސައުންޑް ސިސްޓަމަށް ދިމާވެފައިވާ މައްސަލައާ ގުޅޭގޮތުން ކުރީގެ މިނިސްޓަރު ޑރ. އަހްމަދު ޒާހިރު އަލީ ވިދާޅުވީ ސަލްމާނު މިސްކުތުގެ އޭސީތަކަށް މައްސަލަ ދިމާވަނީ މިސްކިތް ހުރި ސަރަހައްދުގެ ގޮތުން ލޮނު އަސަރު ކުރާތީ އޭސީތައް ދަބަރަށް ވަމުން ދާތީ އެވެ. މިސްތުގެ ތާލަފިލިތަކުގެ އަޑާ ބެހޭ ގޮތުން ވެސް މިނިސްޓަރު ވިދާޅުވީ ބަންގީގެ އަޑާއި ނަމާދުގައި ކިޔަވާ އަޑު މަޑުވެފައި ވަނީ ވެސް ލޮނުގެ ސަބަބުން ތާޅަފިލިތަކަށް މައްސަލަ ދިމާ ވެގެން ކަމަށެވެ.

މިސްކިތް ބޭނުން ކުރަން ފެށީ ވެސް އެއް މުންނާރުގެ އަޑާއެކުގައި ކަމަށް ވެސް ވިދާޅުވި އެވެ.

ހެންވޭރު ސަލްމާން މިސްކިތުގައި ނަމާދު ކުރަން ހާއްސަ ކޮށްފައި ވަނީ އެ މިސްކިތުގެ ފުރަތަމަ ބުރި އާއި ދެ ވަނަ ބުރި އެވެ. އެ ދެ ބުރީގައި އެއް ފަހަރާ 4،000 މީހުންނަށް ނަމާދު ކުރެވޭނެ އެވެ. އަދި މިސްކިތުގެ ބޭރުގައި ވަށައިގެން އޮތް ސަރަހައްދުގައި 6،000 މީހުންނަށް އެއް ފަހަރާ ނަމާދު ކުރެވޭނެ އެވެ. މިއީ ރާއްޖޭގައި މިހާތަނަށް މިސްކިތެއްގައި އަންނަ އެންމެ މަތީ ނަމްބަރެވެ.

މުޅި މިސްކިތުގެ އެންމެ ތިރީގައި ވަނީ ފާހާނާތަކާއި ވުލޫކުރަން އިސްކުރު ބަރިތަކެވެ. އެ ދެ ބައި ހުރީ ދެ ޖިންސުގެ މީހުންނަށް ވަކިން ބޭނުން ކުރެވޭ ގޮތަށެވެ. މުޅީން އޭސީކޮށްފައިވާ މިސްކިތުގައި ތިން ލިފްޓާއި ހަތަރު ސިޑި ހިމެނެ އެވެ.

ތިން ވަނަ ބުރީގެ އެއް ބަޔާއި ހަތަރު ވަނަ ބުރި އެއްކޮށްލައިގެން ހަދާފައިވާ އޮޑިޓޯރިއަމެކެވެ. އޮޑިޓޯރިއަމްގައި 350 ގޮނޑި ޖަހާފައިވެ އެވެ. އެއީ ހިތްގައިމު ލޮބީއަކާއެކު ރާއްޖޭގެ އެންމެ ބޮޑު އެއް އޮޑިޓޯރިއަމަށް ވެއެވެ. ސަލްމާނު މިސްކިތުގެ ފަސް ވަނަ ބުރީގައި ހަދާފައި ވަނީ އެކި އިވެންޓްތައް ބޭއްވޭ ކަހަލަ މަލްޓި ޕާޕަސް ހޯލެކެވެ.

ދިވެހި ރުކަށް ވުރެ ވެސް ނަލަޔަށް ކަދުރު ރުއް ވަށައިގެން ހައްދާފައިވާ، ފަސް މުންނާރާއި ތަފާތު ބިޔަ ގުއްބެއް ހިމެނޭ ގޮތަށް ހަދާފައިވާ މިސްކިތުގެ ބޮޑެތި ބިއްލޫރި ދޮރުތަކުން ސާފުކޮށް ރީތިކޮށް ބޭރުގެ ހިތްގައިމު ވިއު ފެންނާން އޮވެ އެވެ. މި ހިތްގައިމު މިސްކިތް ވެސް ހަދާފައި ވަނީ ވަށައި ބުރަކަށް ކަހަލަ ސިފައެއް ގެނުވައި ޑައިމީޓަރަކަށް ވާނެހެން މަންޒަރު ފެންނާނެ ގޮތަށެވެ.

މިސްކިތުގައި ހަރުކޮށްފައިވާ ކީރިތި ގުރުއާންގެ މޫރިތި އާޔަތްތައް، ކަނޑާ ނަގާފައި ވަނީ، އާންމުކޮށް ރާއްޖޭގެ މިސްކިތްތަކުގައި ހުންނަ ގޮތަށް ލަކުޑީގެ ބަދަލުގައި މުޅީން މާބުލްގަ އެވެ. މިސްކިތުގެ ތެރެއަށް މަޑުމަޑު ރަން އައްޔެއް ފޭދި ފަތުރާލާފައި އޮންނަ އިރު ބޭރުން އިރުމަތީ ފަރާތުގެ ހިތްގައިމު މަންޒަރު އެ އަލީގެ ތެރެއަށް ވަދެ ހިމުންވެފައި އޮވެ އެވެ. އާދަޔާ ހިލާފު ރީތި ކަމަކާއެކު މިސްކިތެއްގެ ފުރިހަމަ ހިމޭން ކަމެއް ގެނުވައި ދެ އެވެ. މުޅި މިސްކިތަށް ހާއްސަ ބައިތަކުގައި ދޫލަ އަޅައި، އަޖައިބު ރީތިހާ ބޮކިތައް ހަރުކޮށްފައި ވާއިރު އެކި ދިމާއިން ދޮރުތަކުގެ ދެމެދުގައި ހިމެނޭ ފާރުތައް ނަލަހައްދާފައި ވަނީ އިސްލާމީ ޝަހުސިއްޔަތު ވިދައިގަންނާނެ ރަން ކުލައެއް ޖެހޭ ހާއްސަ މާބުލް އަކުންނެވެ.

މިއީ 24.95 މިލިއަން ޑޮލަރު (ގާތްގަނޑަކަށް 370 މިލިއަން ރުފިޔާ) ހޭދަކޮށް ތުރުކީގެ ޓާމެކްސް ކުންފުންޏާ ހަވާލުކޮށްގެން ސައުދީ ރަސްގެފާނު އަޅައިދިން މިސްކިތެކެވެ.