ކުރީގެ ފަނޑިޔާރު ރައޫފް، ކެޔޮދޫ ދާއިރާއަށް ވާދަ ކުރައްވަނީ

ކުރިއަށް އޮތް ރައްޔިތުންގެ މަޖިލިސް އިންތިހާބުގައި ހައިކޯޓުގެ ކުރީގެ ފަނޑިޔާރު އަބްދުއްރައޫފް އިބްރާހީމް، ކެޔޮދޫ ދާއިރާއަށް ވާދަ ކުރައްވަން ނިންމައިފި އެވެ.

ރައޫފް، އިންތިހާބަށް ނިކުންނަވަން ނިންމަވާފައި ވަނީ ޕީއެންސީ / ޕީޕީއެމްގެ ޓިކެޓް ގައެވެ. މި މަހުގެ 27 ވަނަ ދުވަހު އޮންނަ އެ ދެ ޕާޓީގެ ޕްރައިމަރީ އަށް ރައޫފް ވަނީ ފޯމް ހުށައަޅުއްވާފައެވެ.

ޝަރީއަތާއި ގާނޫނުގެ ދާއިރާ އިން ޑިޕްލޮމާ އަދި އެލްއެލްބީ އޮނާސް ޑިގްރީ ހާސިލު ކުރައްވާފައިވާ ރައޫފް ވަނީ ހައިކޯޓްގެ ފަނޑިޔާރު ކަން 11 އަހަރު ކުރައްވާފައެވެ. އެޓާނީ ޖެނެރަލްގެ އޮފީހްގެ ލީގަލް އެސިސްޓެންޓް ކަމާއި ސިވިލް ކޯޓްގެ އެސިސްޓެންޓް ރަޖިސްޓްރާ ކަން ވެސް ކުރައްވާފައިވެ އެވެ.

މީގެ އިތުރުން ސަރުކާރުގެ މުހިންމު ދެ ކުންފުންޏެއްގެ ގާނޫނީ ވަކީލުކަން ވެސް ރައޫފް ކުރައްވާފައިވެ އެވެ. އެގޮތުން އެސްޓީއޯގެ ގާނޫނީ ވަކީލެއްގެ ގޮތުގައި ތިން އަހަރު އަދި ސްޓެލްކޯގެ ލީގަލް ކޮންސަލްޓެންޓެއްގެ ގޮތުގައި ދެ އަހަރެއްހާ ދުވަހު މަސައްކަތް ކުރައްވާފައިވެ އެވެ.

1999 ވަނަ އަހަރުން ފެށިގެން ގާނޫނީ ދާއިރާގައި މަސައްކަތް ކުރައްވާ ކުރީގެ ފަނޑިޔާރު ރައޫފް ވަނީ ފަނޑިޔާރުންގެ ޖަމިއްޔާގެ ރައީސް ކަމާއި އެކްސްކޯ މެންބަރުކަން ވެސް ކުރައްވާފައެވެ. ކެޔޮދޫ އަށް ނިސްބަތްވާ ރައޫފަކީ މުހިންމު ބައެއް ގާނޫނުތަކާއި ގަވާއިދުތައް ޑްރާފްޓް ކުރުމުގައި ވެސް ބައިވެރިވެވަޑައިގެންފައިވާ ބޭފުޅެކެވެ. އެގޮތުން ހެއްކާ ބެހޭ ގާނޫނު ޑްރާފްޓް ކުރުމުގެ މަސައްކަތް ފާހަގަކޮށްލެވެ އެވެ.