2023 ގައި ރައީސް ނަޝީދު ހައްދަވާނީ ކިހިނެއް؟

"އަޅުގަނޑަށް ވަރަށް ބޮޑަށް ދަތިވާނެ މި ފަހަރު (2023 ގެ ރިއާސީ އިންތިޙާބް ގައި) ތިޔަ ބޭފުޅުންގެ ގާތުގައި ވަކި ކެންޑިޑޭޓެއްގެ ނަން ދަންނަވަން. އެއީ އެކަން އޮތް ގޮތް. އަޅުގަނޑަށް އުނދަގޫ ވާނެ."

މިއީ ކުރިއަށް އޮތް ރިއާސީ އިންތިޙާބްގައި ރައީސް އިބްރާހިމް މުހައްމަދު ސޯލިހަށް ތާއީދު ނުކުރައްވާނެ ކަމަށް އިޝާރާތް ކުރައްވައި މީގެ ދެތިން ދުވަސް ކުރިން ރައީސް މުހައްމަދު ނަޝީދު ވިދާޅުވި ވާހަކައެކެވެ. މަންޒަރު ވަރަށް ސާފެވެ. ތަފާތު ސަބަބުތަކާ ހެދި މިވަގުތު މަޑުން ހުންނެވިއަސް ރައީސް ނަޝީދު ހުންނެވީ ރައީސް ސޯލިހަށް ދެވަނަ ދައުރެއް ނުލިބުމަށް އެދިވަޑައިގެންނެވެ. އަދިވެސް ވިދާޅުވަނީ ބަރުލަމާނީ ނިޒާމަށް ސަރުކާރު ހިންގުން ބަދަލު ކުރަން ޖެހޭ ކަމަށެވެ. ބަރުލަމާނީ އަށް ބަދަލު ވިއަސް އަދި ނުވިއަސް ރަޢީސް ނަޝީދުގެ ތާއީދެއް ރައީސް ސޯލިހަކަށް 2023 ގައި ނޯންނާނެކަން މިހާރު ދެން ޔަގީނެވެ. ސުވާލަކީ ނަޝީދު ވަކި ފަޅިއަކަށް ޖެހިވަޑައިގަތުމުން އެމްޑީޕީ ގެ މެމްބަރުންގެ ވޯޓު ދެބައިވެެގެންދާ އިރު ރައީސް ސޯލިހަށް ދެވަނަ ދައުރަކަށް ބޭނުންވާ ވަރަށް ވޯޓު ލިބިވަޑައިގެންފާނެ ތޯއެވެ؟

ރައީސް ސޯލިހު އަބަދުވެސް ވިދާޅުވަނީ އިންތިހާބް ކާމިޔާބު ކުރެއްވޭނީ ކޯލިޝަން އެއްގެ ތެރެއިން ކަމަށެވެ. ރައީސާއެކު މިވަގުތު ކޯލިޝަންގައި ތިއްބެވި ހަތަރު ބޭފުޅުންނަކީ ރައީސް މައުމޫނާއި ޝެއިހް އިމްރާނާއި ނަޝީދު އަދި ގާސިމެވެ. މީގެ ތެރެއިން ނަޝީދުގެ ތާއީދު 2023 ގައި ސޯލިހަށް ލިބިވަޑައިގަންނަވާނެ ކަމަކަށް ނުފެނެ އެވެ، އަދި ގާސިމް ވެސް ވެރިކަމަށް ކުރިމަތި ލައްވާނެކަމަށް އިޝާރާތް ކުރައްވާފައިވާ އިރު ޤާސިމްވެސް، އިންތިހާބްގެ ފުރަތަމަ ބުރުގައި ހަމަ ގައިމުވެސް، ރައީސް ސޯލިހާއެކު ކޯލިޝަން ހައްދަވާނެ ކަމަކަށް ނުފެނެއެވެ. އެހެންކަމުން ކުޑަ ދެޕާޓީ ކަމުގައިވާ އެމްއާރްއެމް އާއި އަދާލަތު ގޮވައިގެން ރައީސް ސޯލިހަށް ދެވަނަ ދައުރެއް ކާމިޔާބް ކުރެއްވުން ވަރަށް ނާދިރެވެ.
.
ރައީސް ނަޝީދު ރައީސް ސޯލިހަށް ތާއީދު ނުކުރައްވައި، ވަކި ކޮޅަކަށް ޖެހެވަޑައިނުގެން ހުންނެވުމަކީ ވެސް ނަޝީދުގެ މިޒާޖަށް ބަލާއިރު ވަރަށް ނާދިރު ކަމެކެވެ. ނަޝީދު ވެސް ކޮންމެެވެސް އެއްކޮޅެއް ނަންގަވާނެ އެވެ. ރައީސް ސޯލިހަށް ތާއީދު ނުކުރައްވާނަމަ ރައީސް ނަޝީދުގެ ތާއީދު ކޮންމެވެސް އެހެން ކޮޅަކަށް ދިއުމަކީ ވުން ވަރަށް ކައިރި ކަމެކެވެ. ޤާސިމް އިބްރާހިމް އާއި، ރައީސް ނަޝީދަކީ ވެސް ސިޔާސީ ގޮތުން ހިޔާލް ތަފާތުވިއަސް ގާތް ދެ ބޭފޫޅުންނެވެ. އަދި ރައީސް ޔާމިނާއި ނަޝީދަކީ ވެސް ގާތް ދެބޭފުޅުންނެވެ. ވީމާ ރައީސް ސޯލިހު ދޫކުރައްވައި ނަޝީދު ގުޅިވަޑައިގެންނެވުން އެންމެ ގާތީ ގާސިމް ނުވަތަ ރައީސް ޔާމީން އާއި އެވެ. ސުވާލަކީ އެ ދެބޭފުޅުންކުރެ ކޮންމެވެސް އެއް ބޭފުޅެއްގެ ރަނިންގް މޭޓަކަށް ނަޝީދުވެވަޑައިގެންފާނެ ބާވައެވެ؟

ޔާމިންގެ ރަނިންގް މޭޓަކަށް ނަޝީދުވުމާމެދު ޕީޕީއެމް މެމްބަރުން ނުރުހިއްޖެ ހާލަތެއްގައި ގާސިމްގެ ރަނިންގް މޭޓެއްގެ ގޮތުގައި ރައީސް ނަޝީދު ފެނުމަކީ ވަރަށް ގާތް ކަމެކެވެ. ރާއްޖޭގެ ސިޔާސީ މައިދާނަކީ އަބަދު ފުރޮޅެމުންދާ ދެފުއްކެހެރި މައިދާނަކަށް ވާއިރު ކޮންމެ ބޭފުޅަކު ކޮންމެ ޕާޓީ އަކުން ފެނުކަމީ ވެސް ހަމަ ވެދާނެ ކަމެކެވެ.

ދެން އޮތް ސުވާލަކީ ރައީސް ނަޝީދު ރަނިންގ މޭޓަކަށް ހަަދައިގެން ޤާސިމަށް ނުވަތަ ރައީސް ޔާމީނަށް އެއްވެސް ފައިދާއެއް ވެދާނެ ތޯއެވެ؟ ޔާމީނަށް ލިބިވަޑައިގެންފާނެ އެއްފައިދާ އަކީ ނަޝީދު ރަނިނގް މޭޓަކަށް ހުންނަވަނިކޮށް ޔާމިންގެ ކެންޑިޑެސީ ބާތިލްކޮށް ޖަލަށް ލާން ރައީސް ސޯލިހު ޖެހިލުންވެ ވަޑައިގަތުމެވެ. އަދި ގާސިމްގެ ރަނިން މޭޓަކަށް ނަޝީދު ވެވަޑައިގެންފިނަމަ ގާސިމަށް ލިބޭ ވޯޓު ހަމަގައިމުވެސް، ނަޝީދާއި ނުލައި ލިބޭނެ ވޯޓަށް ވުރެ، ގިނަ ވާނެ އެވެ. މިއީ ސާފުކޮށް ފެންނާން އޮތް ހަޤީގަތެކެވެ.

ކޮންމެ ކޮޅަކަށް ނަޝީދު ވަޑައިގަތަސް، އެއްވެސް ކެންޑިޑޭޓެއްގެ ރަނިން މޭޓަކަށް ނަޝީދުވެވަޑައިގެންފި ނަމަ، އަދި އެފަދަ ކެންޑިޑޭޓަކަށް ރައީސްކަން ލިބިވަޑައިގެންފިނަމަ، ނަޝީދުގެ މިޒާޖުގެ ސަބަބުން، އެފަދަ ބޭފުޅަކަށް ވެރިކަން ކުރައްވަން ދަތިވާނެ އެވެ. ސަބަބަކީ ނަޝީދުވެސް ބޭނުންފުޅު ވަނީ ވެރިކަން ކަމަށް ވުމުން އެއްއުރައެއްގައި ދެކަނޑި އޮތުމަކީ އުނދަގޫ ކަމަކަށް ވާނެތީ އެވެ.

މަތީގައިވާ ނުކްތާ ތަކަށް ބަލާއިރު ރައީސް ނަޝީދު ރަނިންގް މޭޓެއްގެ ގޮތުގައި ނެރުއްވައިގެން ރައީސް ޔާމީނަށް ފައިދާއަށް ވުރެ ބޮޑަށް ލިބިވަޑަިގެންފާނެ ގެއްލުން މާބޮޑެވެ. އެއާއި ހިލާފަށް ރަނިންގް މޭޓެއްގެ ގޮތުގައި ނަޝީދު ހިމަނުއްވައިގެން ޤާސިމް އިބްރާހިމަށް ލިބިވަޑައިގެންފާނެ ފައިދާ ބޮޑެވެ. އެހެން ކަމުން 2023 ގައި ނަޝީދުގެ ތާއިދު ގާސިމަށް ދެއްވުމަކީ ވުން ވަރަށް ކައިރި ކަމެއްކަމުގައި ފެނެއެވެ.

ދިވެހި ރާއްޖެ އަށް މިހާރު ދިމާވެފައިވާ އެންމެ ބޮޑު ދެމައްސަލަ އަކީ ލާދީނީ ފިކުރު ދިވެހި ރައްޖޭގައި ބާރުގަދަ ވެފައިވާ ވުމާއި، އިންޑިއާ އަށް ދިވެހި ރާއްޖެ އަޅުވެތިވަމުންދާ ދިއުމެވެ. މި ދެމައްސަލަ ވަރަށް ޙުލާސާ ކޮށް ގުޅިފައިވާ ގުޅުން ދައްކުވައި ދެނީ އިސްލާމީ މަރުކަޒަށް އިންޑިއާ މިހަކު ބޮޑުކަމު ދިއުމުން އެ ނުބައި މީހާގެ ބަންދަށް ކޯޓުން އެންމެ އެއް ދުވަހުގެ ބަންދު ޖެހުމެވެ. ރިހާކުރުފުޅި ވަގަށް ނެގިމީހާގެ ބަންދަށް 10 ދުވަސް ޖަހާފައި ދިވެހި ރާއްޖޭގެ އެންމެ ބޮޑު އިސްލާމީ ޝިއާރުގެ ގޮތުގައި ބެލެވޭ އިސްލާމީ މަރުކަޒަށް ބޮޑުކަމު ދިއުމުން މިޖަހަނީ އެންމެ އެއް ދުވަހުގެ ބަންދެވެ. ރިހާކުރު ފުޅި ވަގަށް ނެގި މީހާ ހަމަސް ދުވަހަށް ޖަލަށް ލާފައި އެއްޖިންސުން ގުޅުން ހިންގި މީހާ ތިން މަހަށް ގޭބަންދަށް ލުމަކީ ލާދީނިއްޔަތުގެ ބިރު ދިވެހި ރާއްޖޭގައި ގަދަވެފައިވާ މިންވަރު ހާމަވާ އެއް މިސާލެވެ.

އިންޑިއާ މީހަކަށް ވުމުން އިސްލާމީ މަރުކަޒަށް ކީއްކުރަން ދިވެހީންގެ ބޮލަށް ބޮޑުކަމު ދިޔައަސް ކުށްވެރިއެއް ނުވާނެ އެވެ. 2023 ގެ ރިއާސީ އިންތިހާބަކީ އިންޑިއާގެ ކިބައިންނާއި ލާދީނިއްޔަތުން ދިވެހި ރާއްޖެ ސަލާމަތް ކުރަން ލިބޭ އެންމެ ފަހުގެ ފުރުސަތެވެ. އެ ފުރުސަތުގެ ބޭނުން ނުހިފައިފި ނަމަ ދިވެހި ރާއްޖެ އޮޔާ ގޮސް ދިވެހީން އަތުން ރާއްޖެ ބީވެެގެން ދާނެކަން ކަށަވަރެވެ.

ރައީސް ނަޝީދަކީ އެންމެ ގިނަ މީހުން "ލާދީނީ" ޓެގު އަޅުވާ ފަރާތެވެ. އަދި ނަޝީދަކީ އިންޑިއާ އަށް އެންމެ ބޮޑަށް ތާއީދު ކުރައްވާ އެއް ލީޑަރެވެ. ރާއްޖޭގެ މައި އެއާޕޯރޓް އިންޑިއާއަށް ވިއްކާލެއްވީ ވެސް ރައީސް ނަޝީދުގެ ވެރިކަމުގައެވެ. އެހެން ކަމުން ރައީސް ނަޝީދުގެ ތާއިދާއި އެކު ނިކުމެެގެން އިންޑިއާ އައުޓް ކުރުމަކީ ވާނެކަމެއް ނޫނެވެ، އަދި ނަޝީދުގެ ތާއިދާއި އެކު ލާދީނިއްޔަތުން ދިވެހި ރާއްޖެ ސަލާމަތް ކުރުމަކީ ޖާބިރު ރަނިންގް މޭޓަކަށް ލައިގެން ހަލާލު ޓޫރިޒަމް ތައާރަފް ކުރަން އުޅުން ކަހަލަ ކަމެކެވެ.

މިދިޔަ ހަފްތާތެރޭ އައްޑޫ އަށް ކުރެއްވި ދަތުރުފުޅެއްގައި އޮންލައިން ނޫހަކަށް ދެއްވި ބަސްދީގަތުމެއްގައި ރައީސް ނަޝީދު ވިދާޅުވެފައިވަނީ އެމްޑީޕީ ގެ ރިއާސީ ވައުދު ނާމާ ކަމުގައިވާ "އެޖެންޑާ-19" ދިޔައީ ތޮޅިއަށް ކަމަށެވެ. ނަޝީދު ވިދާޅުވީ 19 ވަނަ ރައްޔިތުންގެ މަޖުލީހުގައި ވަރަށް ގިނަ ކަންކަން ކުރާނެ ކަމަށް އެމްޑީޕީ އިން ވައުދުވި ކަމަށާއި ނަމަވެސް މަޖިލީހަށް އެޕާރޓީން ކުރި އުއްމީދުތައް ހަޤީގަތަކަށް ނުވި ކަމަށެވެ. ރައްޔިތުންނަށް އެވަރުގެ ބޮޑު ވައުދުތަކެއްވެ، އެެޖެންޑާ-19 އޭކިޔައިގެން ލަވަކިޔައި، ނަށައި، ރައްޔިތުންނަށް ވައުދު ވުމަށް ފަހު އެމްޑީޕީ ގެ ކެންޑިޑޭޓް، އިބްރާހިމް މުހައްމަދު ސޯލިހަށް ވެރިކަން ހޯދައިދެއްވުމަށް ފަހު ދެރަހްމަތްތެރިން ދެބަސްވެވަޑައިގަތުމަކީ ރައްޔިތުންގެ މޫނުމަތީގައި އެމް.ދީ.ޕީ އިން ޖަހާ ތަފާލެކެވެ. 2023 ގައި ނަޝީދު ވަޑައިގަންނަވާނީ ކޮން އެޖެންޑާ އަކާއިގެން ތޯއެވެ؟ އަނެއްކާވެސް އެޖެންޑާ 2023 އޭ ވިދާޅުވެ ރައްޔިތުން ކައިރިއަށް ނަޝީދު ވަޑައިގަތުމުން ރައްޔިތުން ވީ އަނެއްކާވެސް ނަޝީދަށް އިތުބާރު ކުރަންތޯ އެވެ؟

ކޮންމެ ގޮތެއް ވިއަސް 2023 ގެ ރިއާސީ އިންތިހާބްގައި ރައީސް ނަޝީދު ސީދާ ބައިވެރިވެ ވަޑައިގެންނެވިއަސް ނުވަތަ ފަހަތު ސީޓުން ކުޅުއްވިއަސް ރިއާސީ އިންތިހާބްގެ ނަތީޖާ ނެރުމުގައި ރައީސް ނަޝީދަކީ ވެސް ވަރަށް މުހިއްމު ދައުރެއް އަދާ ކުރައްވާނެ ބޭފުޅެކެވެ. ނަޝީދަށް ފައިދާއެއް ލިބިވަޑައިގެންނެވިއަސް ނުވަތަ ފައިދާއެއް ނެތަސް ރައީސް ސޯލިހު ދެވަނަ ދައުރަަކަށް ހޮވިވަޑައި ނުގެންފިނަމަ ނަޝީދު ބައްލަވާނީ އެއީ ކާމިޔާބެއް ކަމަށެވެ. އެހާވެސް ދެރަހްމަތްތެރީންގެ ދެކޮޅުވެރިކަން ވަނީ ބޮޑުވެފައެެވެ. ރައީސް ސޯލިހާއި ރައީސް ނަޝީދުގެ ދެކޮޅުވެރިކަމުގެ ފައިދާ ނަންގަވާނީ ޤާސިމްތޯ ނުވަތަ ރައީސް ޔާމިނުތޯ އެއީ 2023 ގެ ބޮޑު ސުވާލެވެ!