"ފަހި ފަތުރުވެރިކަމަށް އަންހެނުން" ޕްރޮގުރާމް ފަށައިފި

"ފަހި ފަތުރުވެރި ކަމަށް އަންހެނުން" ގެ ނަމުގައި ޓޫރިޒަމް ދާއިރާއަށް އަންހެނުން އިތުރު ކުރުމުގެ ޕްރޮގްރާމެއް އިފްތިތާހް ކޮށްފިއެެވެ.

މި ޕްރޮގްރާމް މިއަދު އިފްތިތާހްކޮށްދެއްވީ އިކޮނޮމިކް މިނިސްޓަރު މުހައްމަދު ސައީދެވެ. މި ޕްރޮގްރާމަކީ ސަރުކާރުން "ހަފްތާގައި 14" އިގައި ހިމެނޭ ޕްރޮގްރާމެކެވެ.

ޓޫރިޒަމް މިނިސްޓަރު އިބްރާހިމް ފައިސަލް މިއަދު ވިދާޅުވީ ރާއްޖޭގެ ޓޫރިޒަމަށް 50 އަހަރުވެފައިވާއިރު އެއީ ވަޒީފާގެ ބާޒާރުގައި އެންމެ ގިނަ ފުރުސަތު ސީދާ ގޮތުންނާއި ނުސީދާ ގޮތުން އޮތް ސިނާއަތު ކަމަށާއި ގައުމުގެ އުފެއްދުންތެރިކަމުގެ ނިސްބަތަަށް ބަލާނަމަ 2022 ވަނަ އަހަރު ނިމުނުއިރު، ޓޫރިޒަމާ ހުރި ދާއިރާތަކުން 40 ޕަސެންޓް ޖީޑީޕީއެއް ހިއްސާ ކޮށްފައިވާ ކަމަށެވެ.

މިނިސްޓަރު ވިދާޅުވީ އާ ޕްރޮގްރާމަކީ އަންހެނުން ޓޫރިޒަމް ދާއިރާއަށް ނެރެން ރިސޯޓާއި ގެސްޓްހައުސް އާއި ހޮޓާތަކާއި ޑައިވްސް ސެންޓަރުތަކުގައި މަސައްކަތް ކުރާ މާހައުލުގައި ދަރިވަރުން ތިން މަސް ދުވަސް ހޭދަކޮށް އަމަލީ ތަޖުރިބާ ލިބިގެން ދާނެ  ޕްރޮގްރާމެއް ކަމަށެވެ. އަދި މި ޕްރޮގްރާމުން ދާއިރާއަށް އިތުރު އަންހެނުން ނުކުތުމާއެކު ގިނަ އަންހެނުން ނުކުތުމަށް  ހިތްވަރު ލިބިގެން ދާނެ ކަމަށެވެ.