އައްޑޫ ބްރިޖްގެ މަސައްކަތް ފަށަން ތައްޔާރު ވަނީ
"އިރާދަކުރެއްވިއްޔާ ވަރަށް އަވަހަށް އައްޑޫ ގައި އެ ބްރިޖް އެޅުމުގެ މަސައްކަތަށް ބޭނުންވާ ފަންނީ އަދި ތަފްސީލީ ފީސިލިބިލިޓީއާ ޑިޒައިން މަސައްކަތް އަޅުގަނޑުމެން ބަޔަކާ ހަވާލު ކުރާނަން"
އައްޑޫ ސިޓީގައި ބްރިޖެއް އެޅުމަށް އެ ސިޓީގެ ރައްޔިތުން ކުރަމުންދާ އުންމީދުތައް ހަގީގަތަކަށް ހައްދަވައިދެއްވާނެ ކަމަށާ އެ މަސައްކަތް ވަރަށް އަވަހަށް ފައްޓަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރައީސް ޔާމީންގެ 2018ގެ މެނިފެސްޓޯގައި މީދޫ އާއި ހިތަދޫއާ ދެމެދު ބްރިޖް އެޅުމަށް ނިންމާ އެކަން ހިމަނާފައި އޮތެވެ. 2013 ވަނަ އަހަރުން ފެށިގެން އެ ސިޓީގެ ރައްޔިތުން ދަނީ އެކަމަށް އުންމީދު ކުރަމުންނެވެ. ރައީސް ޔާމީނަށް އިންތިހާބަށް ކުރިމަތި ލެއްވޭ ގޮތް ނުވުމުން ރައީސް މުއިއްޒު ކެންޑިޑޭޓަކަށް ވެވަޑައިގެން ވެސް އެ ވައުދު ވަނީ ތަކުރާރު ކުރައްވާފައެވެ.
ކެމްޕެއިނަށް އައްޑޫއަށް ވަޑައިގެންނެވި ދެ ފަހަރު ވެސް ކެމްޕެއިން ޖަލްސާއަށް އެ ސިޓީގައި ތަން އިންތިޒާމު ކުރީ މީދޫ-ހިތަދޫ ބްރިޖު ސިފަކުރެވޭނެ ގޮތަށެވެ. ރައީސް މިރޭ ވިދާޅުވީ އެ މަސައްކަތް ފެށުމަށް ފަންނީ އަދި ތަފްސީލީ ފީސިލިބިލިޓީއާ ޑިޒައިން މަސައްކަތް ވަރަށް އަވަހަށް ބަޔަކާ ހަވާލު ކުރާނެ ކަމަށެވެ.
"އިރާދަކުރެއްވިއްޔާ ވަރަށް އަވަހަށް އައްޑޫ ގައި އެ ބްރިޖް އެޅުމުގެ މަސައްކަތަށް ބޭނުންވާ ފަންނީ އަދި ތަފްސީލީ ފީސިލިބިލިޓީއާ ޑިޒައިން މަސައްކަތް އަޅުގަނޑުމެން ބަޔަކާ ހަވާލު ކުރާނަން. އޭރުން އެ ބްރިޖްގެ އަގު ކުރުމަށްޓަކާ ކޮންޓްރެކްޓަރެއް ހޯދާ އެ މަސައްކަތް ހަވާލު ކުރުމަށްޓަކާ ނިންމަން ޖެހޭ ހުރިހާ ލިޔެކިޔުމެއް ތައްޔާރު ކުރުމަށް މަގު ފަހިވާނެ،"
ރައީސް ވިދާޅުވީ ވެވަޑައިގެންފައިވާ ހުރިހާ ވައުދެއް ތަރުތީބު ކުރެވިފައިވާ ގޮތަށް ތަންފީޒު ކުރައްވާނެ ކަމަށެވެ.
ކޮމެންޓް
Republic of Maldives