މަޖިލީހަށް ވާދަ ކުރައްވަން އަލީ ޒާހިރު ނިންމަވައިފި

ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބު ގައި ވާދަކުރައްވަން ކުރީގެ ޗީފް އޮފް ސްޓާފް އަލީ ޒާހިރު ނިންމަވައިފި އެވެ.

އަދާލަތު ޕާޓީގެ ނާއިބު ރައީސް ކަން ވެސް ދެ ދައުރު ކުރެއްވި އަލީ ޒާހިރު ވިދާޅުވި ގޮތުގައި 20 ވަނަ މަޖިލީސް އިންތިހާބު ގައި އޭނާ ވާދަ ކުރައްވަން ނިންމަވާފައި ވަނީ ވ. ފެލިދޫ ދާއިރާ އަށެވެ.

ދާއިރާގެ ރައްޔިތުންގެ ތާއީދަށް ވަނީ އެދިވަޑައިގެންފައެވެ.

އެންމެ އާބާދީ މަދު އަތޮޅު ކަމަށްވާ ވ އަތޮޅުގެ އާބާދީ އަކީ 2691 އެވެ. އެ އަތޮޅަށް ދެ ގޮނޑި ހާއްސަ ކޮށްފައިވެއެވެ. އެހެން ކަމުން އެންމެ މަދު ވޯޓުން މަޖިލީހަށް ހޮވިވަޑަައިގަންނަވާނީ ވ އަތޮޅުގެ ދެ ގޮނޑިއަަށް ހޮވިވަޑައިގަންނަވާ މެންބަރުންނެވެ.

އަލީ ޒާހިރުގެ އިއުލާނު ގައި އޭނާ މަޖިލީހަށް ނިކުންނަވާނީ ކޮން ދާއިރާއެއްގެ ޓިކެޓް ގައި ކަމެއް ނުބުނެ އެވެ. ރައީސް ސޯލިހްގެ ސަރުކާރު ގައި ޗީފް އޮފް ސްޓާފްގެ މަގާމުގައި ވެސް ހުންނެވީ އަދާލަތު ޕާޓީގެ ސްލޮޓެއް ގައެއް ނޫނެވެ. މިދިޔަ ދުވަސްތަކުގައި އަދާލަތުގެ ހަރަކާތްތަކުން ވެސް އިސްކޮށް އުޅުއްވާތީ ނުފެނެ އެވެ.

ޝަރުއީ ނިޒާމަށް ނުފޫޒު ފޯރުވުމާއި ރައީސް ސޯލިހްގެ އެންގެވުމަށް މަޖިލީހުގެ މެންބަރުންނަށް ގުޅުއްވާ ނުފޫޒު ފޯރުވި ކަމުގެ ތުހުމަތު އަލީ ޒާހިރުގެ މައްޗަށް ވަރަށް ބޮޑަށް އޮތެވެ. ނަމަވެސް އެ ތުހުމަތުތައް އޭނާ ދޮގު ކުރައްވައެވެ.

މި ހިނގާ 19 ވަނަ މަޖިލީހުގެ އިންތިހާބު ގައި ފެލިދޫ ދާއިރާގެ މެންބަރަކީ މިހާރު ސަރުކާރު ހިންގާ ޕީއެންސީ އަށް ނިސްބަތްވާ ފެލިދޫ ދާއިރާގެ މެންބަރު ފަޒުލް ރަޝީދެވެ. ނަމަވެސް މިހާރު ފެލިދޫ ދާއިރާގެ ގޮނޑި ވަނީ ހުސްވެފަައެވެ. އެއީ އާބަންކޯގެ އެމްޑީގެ މަގާމަށް ވަޑައިގަތުމަށް ފަޒުލް އިސްތިއުފާ ދެއްްވުމުންނެވެ.