އަލިފުށީ މަގު ހެދުމުގެ މައުލޫމާތު ކައުންސިލާ ހިއްސާކޮށްފި

ރ. އަލިފުށީ މަގު ހެދުމުގެ މަޝްރޫއާ ގުޅޭ މައުލޫމާތު، އެ ރަށުގެ ކައުންސިލާ ހިއްސާ ކޮށްފި އެވެ.

އަލިފުށީ ކައުންސިލްގައި ހިމެނޭ މެންބަރުން މިއަދު ވަނީ ރޯޑް ޑިވަލޮޕްމެންޓް ކޯޕަރޭޝަން (އާރްޑީސީ) އައު މެނޭޖިން ޑިރެކްޓަރު އަލީ ޒުހައިރާ ބައްދަލު ކުރައްވާފަ އެވެ.

އާރުޑީސީން ބުނީ މި ބައްދަލު ކުރެއްވުމުގައި އަލިފުށީ މަގު ހެދުމުގެ މަޝްރޫއު ކުރިއަށް ގެންދިޔުމަށް ރޭވިފައިވާ ގޮތުގެ ތަފުސީލު މެންބަރުންނާ ހިއްސާ ކުރެއްވި ކަމަށެވެ.

މީގެ އިތުރުން ކައުންސިލުގެ ފަރާތުން ބޭނުންވާ ކަންކަމާއި ގުޅޭ ގޮތުން ވެސް މި ބައްދަލުކުރެއްވުމުގައި މަޝްވަރާ ކުރެވުނު ކަމަށެވެ. 

އަލިފުށީ މަގުތަކުގައި ތާރުއެޅުމުގެ މަސައްކަތް ޕްލޭނިން މިނިސްޓްރީން އާރުޑީސީއާ ހަވާލުކުރީ މިއަހަރުގެ އޭޕްރީލް، 16 އިގަ އެވެ. ޖުމުލަ އަގުގެ ގޮތުގައި 90.9 މިލިއަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫއުގެ ދަށުން 3.8 ކިލޯމީޓަރުގެ މަގު ތާރުއަޅައިގެން ހެދުމަށް ހަމަޖެހިފައި ވެއެވެ. މީގެ އިތުރުން މަގުތަކުގައި ފެންހިންދާ ނިޒާމް ގާއިމްކޮށް، މަގުތަކުގައި މަގުބައްތި ޖަހާނެ އެވެ.