ސިޓީ ރަސްމާލެ: ފުށިދިއްގަރުފަޅު ހިއްކަން ފަށައި ތާރީހު ވެލި މުށް އޮއްސާލައިފި

ރައީސް ޑރ. މުހައްމަދު މުއިއްޒު ވެރިކަމާ ހަވާލުވެ ވަޑައިގެން ގައުމާ މުހާތަބު ކުރައްވާ ވިދާޅުވަމުން ގެންދެވި އެވެ: "އިރާދަކުރެއްވިއްޔާ، ބިންވެރިކަމާއި ގެދޮރުވެރިކަމުގެ ރަންޒަމާނެއް ދިވެހީންނަށް ގެނެސްދޭނީ، މި ފެށުނު ރިޔާސީ އާ ދައުރުގައި. އުތުރުތިލަފަޅުން ފެށިގެން ފުށިދިއްގަރު ފަޅާ ހަމައަށް، އެންމެ ޒަމާނީ އިމާރާތްތަކާއި ބަގީޗާތަކުގެ ހާރެއް އަތުރާލާނީ ތިޔަބޭފުޅުންގެ މި އާ ސަރުކާރުން. އެކަމުގެ ކަރުދާހީ ގިނަ މަސައްކަތެއް ހުރީ ލިޔެ، ހުރިހާ ކަމެއް ނިމިފައި. އިރާދަކުރެއްވިއްޔާ ވަރަށް އަވަހަށް، ޒަމާނީ އާ ސަހަރުތަކެއްގެ ޒީނަތްތެރި މަލަތައް، ދިވެހި ފަޅުފަޅުން އުފުލިލާނެ" 

ރައީސް މުއިއްޒުގެ އެންމެ ބޮޑު ވައުދަކީ ބޯހިޔާވަހިކަމުގެ މައްސަލަ އެކަށް ހައްލުކޮށް ދެއްވުމެވެ. އެންމެ ބޮޑު ފޯކަސް އެ މަސައްކަތަށް ބޭއްވުމެވެ. މާލޭގެ ދެކުނުން 16 ކިލޯމީޓަރު ދުރުގައިވާ ފުށިދިއްގަރުފަޅު ހިއްކައި އެތާނގައި ދިވެހިންގެ އާ ޒަމާނުގެ ސިޓީ/ "ރަސްމާލެ" ޑިވެލޮޕް ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް އަދި އެ މަނިކުފާނުގެ "ޑްރީމް ޕްރޮޖެކްޓެ" ކެވެ. 

އެ މަނިކުފާނުގެ ސަރުކާރު އުފެދުމާ ހަމައިން އެންމެ ސަމާލުކަން އޮތް ބޮޑު ޕްރޮޖެކްޓަކީ ވެސް ފުށިދިއްގަރުފަޅެވެ. ސަރުކާރަށް އިއްޔެ ވަނީ އެ މަސް ފުރުނު ތާރީހު ޖަހާފަ އެވެ. ފުށިދިއްގަރު ފަޅު، "ރަސްމާލެ" އަކީ 20 އަހަރުގެ ޕްލޭނެއް ހިމެނޭ ސިޓީއެކެވެ. "ރަސްމާލެ" އަކީ ވެރިރަށް މާލެއާ ބްރިޖަކުން ގުޅާލެވޭ ވަރަށް ވުރެ ދުރުގައި ހަދާ ސިޓީއެކެވެ. އެކަަމު އެ ސިޓީ ތަރައްގީ ކުރާނީ މާލެ ނައިސް ވާނެ މިންވަރަށް ތަރައްގީކޮށްގެނެވެ.

ފުށިދިއްގަރު ފަޅުން ބިން ހިއްކުމުގެ ތާރީހީ މަސައްކަތް ފަށައި ތާރީހުގެ ތެރެއަށް މިއަދު އެވަނީ ރައީސް މުއިއްޒުގެ ސަރުކާރު ވަދެފަ އެވެ. ފުށިދިއްގަރު ފަޅަކީ ރައީސް މުއިއްޒުގެ ބޯހިޔާވަހިކަމުގެ "ޓޯޓަލް ސޮލިއުޝަން"ގެ ސިޔާސަތުގެ ދަށުން އެންމެ އިސްކަމެއް ދީގެން ތަރައްގީ ކުރަން ނިންމާފައިވާ ސިޓީ އެވެ. މި ވެރިކަމުގެ ފުރަތަމަ 100 ދުވަހު އެ ފަޅު ހިއްކުމުގެ މަސައްކަތް ފަށަން އޮތީ ހިމަނައިފަ އެވެ.

ފުށިދިއްގަރު ފަޅުގެ ސިޓީ، "ރަސްމާލެ" މަޝްރޫއަކީ ރާއްޖޭގެ އިގްތިސޯދުގެ މޫނުމަތި ބަދަލުކޮށްލާނެ ބިޔަ ބޮޑު މަޝްރޫއަކަށެވެ. މި މަޝްރޫއުގެ ސަަބަބުން ރާއްޖޭގެ ހައުސިން ސިނާއަތަށް އިންގިލާބީ އަދި ތާރީހީ ބޮޑު ކުރި އެރުމެއް ލިބޭނެ އެވެ.

މިއަދު މަޝްރޫއު ފެށި އިރު ބިޔަ މި މަޝްރޫއުގެ މަސައްކަތް ހަވާލުކޮށްފައި ވަނީ އަވަށްޓެރި ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ) އާ އެވެ. މަސައްކަތް ފެށި އިރު ފުށިދިއްގަރު ފަޅުގެ ލޭންޑް ޔޫސް ޕްލޭން ހަދައި އެތަނުގެ އީއައިއޭގެ މަސައްކަތް ވެސް ކޮށްފައި ވެއެވެ. 

މި މަސައްކަތް ފެށި އިރު އަންނަ އަހަރަށް ހުށަހަޅާ ބަޖެޓުގައި ރައީސް މުއިއްޒުގެ ސަރުކާރުން ފުށިދިއްގަރުފަޅު މަޝްރޫއަށް 400 މިލިއަން ރުފިޔާ ހިމެނި އެވެ. ނަމަވެސް ދައުލަތުގެ ބަޖެޓުން އެ މަޝްރޫއުއަށް ފުރުސަތު އެމްޑީޕީގެ މެޖޯރިޓީ އޮންނަ މަޖިލީހުން ނުދިނުމުން ފުށިދިއްގަރުފަޅު ހިއްކަން މިފެށީ އާބަންކޯ އާއި ސީއެމްސީ ކުންފުންޏާ ދެމެދު މިދިއަ ހަފުތާގައި އެއްބަސްވުމެއްގައި ސޮއި އަޅައިގެނެވެ. 

އޭގެ ކުރިޔަށް ކ. ގުޅީގެ އިހްތިސޯސުގެ ތެރޭ ކުރިން އޮތް ފުށިދިއްގަރުފަޅު އެ ރަށުގެ އިހްތިސޯސުން ވެސް ވަނީ މިދިއަ ހަފުތާގެ ތެރޭގައި އުނިކޮށްފަ އެވެ.  ނަމަވެސް އެކަން ހިނގި އިރު މަޝްރޫއަށް ބަޖެޓްގައި ޖެހި 400 މިލިއަން ރުފިޔާ އެމްޑީޕީގެ މެޖޯރިޓީ އޮތް މަޖިލީހުން ބައިބަޔަށް އަޅާލި އެވެ. އެ ގޮތުން އެމްޑީޕީ ސަރުކާރުން ފެށި ގިރާވަރު، ގުޅިފަޅު އަދި ހުޅުމާލެއިން ގޯދި ދޭ ސަރަހައްދުގައި ވަސީލަތްތައް ގާއިމުކުރަން 200 މިލިއަން ރުފިޔާ ބަދަލު ކުރީ އެވެ. އަދި އަނެއް 200 މިލިއަން ރުފިޔާ ވަނީ އެކި މަޝްރޫއުތަކަށް ބަހާލައިފަ އެވެ.

ލަންކާގެ ސީއެމްސީ ކުންފުންޏަކީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ފެށި ހުޅުމާލޭ ހުޅަނގު ފަޅާއި ދިޔަނެރު ފަޅު އަދި ތިލަފުށިން އިތުރު ބައެއް ހިއްކުން ހިމެނޭ މަޝްރޫއުގެ ވެސް ކުރިޔަށް ގެންދާ ކޮންޓްރެކްޓަރެވެ. 

ފުށިއްދިގަރުފަޅު މަޝްރޫއު ހިމެނޭހެން، މިދިޔަ ސަރުކާރުން ފަށާފައިވާ ގިރާވަރު އަދި ގުޅިފަޅު މަޝްރޫއު ހިމަނައިގެން 65،000 ރައްޔިތުންނަށް ބޯހިޔާވަހިކަން ދޭން ރައީސް މުއިއްޒު ވަނީ ވައުދުވެވަޑައިގެންފަ އެވެ. ފުށިދިއްގަރު ފަޅުން އުފައްދާ ސިޓީ، "ރަސްމާލެ" ގައި 1600 އަކަފޫޓްގެ 11،000 ގޯއްޗާއި 1400 އަކަފޫޓްގެ 20،000 ފްލެޓް އަޅަ އެވެ. 

މީގެ ކުރީން މިފަދަ ބިޔަ މަޝްރޫއަކީ މީގެ 26 އަހަރު ކުރިން އޮކްޓޯބަރު 16، 1997 ގައި ހުޅުލޭ ފަޅުން ބިން ހިއްކަން ފަށައި  ބޮޑު ހުޅުމާލޭގެ އުފެދުމުގެ މަޝްރޫ އެވެ.