ފަހިދިރިއުޅުން ފްލެޓް | އާ ބަދަލާއެކު މަސައްކަތަށް ހަލުއިކަން

ހުޅުމާލެ ދެވަނަ ފިޔަވަހީގައި ފަހިދިރިއުޅުން ކުންފުނިން އަޅަމުން ގެންދާ ފްލެޓުގެ މަޝްރޫއުގެ ޓަވަރުތައް އަވަސްކުރަން އާ މެނޭޖުމަންޓުން ގެނައި ބަދަލާއެކު ފްލެޓު ނިމޭ ތާރީހަށް ބޮޑު ބަދަލެއް އަތުވެއްޖެ އެވެ.  

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އުފެއްދި 100 ފަސެންޓް ސަރުކާރު ހިއްސާވާ އެފްޑީސީން އިންޑިއާގެ ދެ ކުންފުންޏަކަށް ދީގެން ހުޅުމާލޭގައި ޖުމްލަ 4،000 ހައުސިން ޔުނިޓްގެ މަސައްކަތް ކުރަމުން ގެންދެ އެވެ. 

މި ފްލެޓުތަކުގެ ތެރޭގައި ހިމެނޭ އިންޑިއާގެ އެމްބީސީސީ ކުންފުންޏާ ހަވާލުކޮށް އެ ގައުމުގެ ރެނާޓަސް އިން މަސައްކަތް ކުރާ ދެ ކޮޓަރީގެ ފްލެޓްތަކެއް ވެސް ހިމެނެ އެވެ. މި ދެ ކޮޓަރީގެ ފްލެޓް ޓަވަރުތަކުގައި ހިމެނެނީ ހިމެނެނީ 120 - 128 ވަރަކަށް އެޕާޓްމަންޓެވެ.

ފަހި ދިރިއުޅުން ކުންފުނިން "އަމާން ދޯދި" ގެ ނަމުގައި އަޅަމުން ގެންދާ މި ފްލެޓުތައް ދައްކާލަން ހުޅުމާލޭގައި މިއަދު ބޭއްވި ރަސްމިއްޔާތު ޝަރަފުވެރިކޮށް ދެއްވީ ހައުސިން މިނިސްޓަރު ޑރ. އަލީ ހައިދަރެވެ. އެ ރަސްމިއްޔާތުގައި އިންފްރާސްޓްރަކްޗަރު މިނިސްޓަރު ޑރ. އަބްދުﷲ މުއްތޮލިބާއި ފިނޭންސް މިނިސްޓްރީގެ ވެރިން ބައިވެރިވަޑައިގަތެވެ. 

މި ރަސްމިއްޔާތުގައި މިނިސްޓަރު ހައިދަރު ވިދާޅުވީ މި ފްލެޓް މަޝްރޫއުގެ ސަބަބުން މާލެ ސަރަހައްދުގައި އުޅޭ ގިނަ ރައްޔިތުން ތަކަކަށް ބޯހިޔާވަހި ކަމުގައި ބޮޑު ތަސައްލީއެއް ލިބިގެންދާނެ ކަމަށެވެ 

"ރައީސް މުއިއްޒުގެ ބޯހިޔާވަހިކަމުގެ ވައުދުގެ ތެރޭގައި ވެސް މި ފަދަ އެތައް ބައިވަރު މަޝްރޫއު ތަކެއް ހިމެނޭ. އަޅުގަނޑުމެން އުންމީދު ކުރަނީ އިރާދުކުރެއްވިއްޔާ ރައީސް މުއިއްޒުގެ ފަސް އަހަރުގެ ދައުރު ނިމެންވާއިރަށް މާލެ ސަރަހައްދުގައި ބޯހިޔާވަހިކަން ލިބިފައި ނުވާ އެއްވެސް އާއިލާއެއް ގޭބިސީއެއް ނެތުން،" މިނިސްޓަރު ހައިދަރު ވިދާޅުވި އެވެ. 

މިނިސްޓަރު ހައިދަރު އިތުރަށް ވިދާޅުވި ގޮތުގައި މި ސަރުކާރުގެ ކުރު މުއްދަތުގައި ބޯހިޔާވަހިކަމުގެ ހައްލަކީ ގުޅިފަޅާއި ގިރާވަރުފަޅު ކަމަށެވެ. އަދި ދުރު ރާސްތާގެ ހައްލަކީ ފުށިދިއްގަރު ދަޅުގައި ތަރައްގީ ކުރާ ޒަމާނީ ސިޓީ، "ނޫމުތީ" ކަމަށެވެ. 

"[ފުށިދިއްގަރު ފަޅުން] ކުރިއަށް އޮތް 20 އަހަރު ދުވަހަށް ބޭނުންވާ ގޯތި ގެދޮރު ހައްލު ކޮށްދޭނަން. އެއީ ރައީސް މުއިއްޒުގެ ވައުދެއް. މިކަމަކީ ތިޔަ ބޭފުޅުންގެ ދަރި ފަސް ކޮޅަށް ވެސް ލިބޭނެ ތަސައްލީ އަކަށް ވާނެ،" ހައިދަރު ވިދާޅުވި އެވެ. 

ފްލެޓު އަޅާ އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ މި ފްލެޓްތައް ދައްކާލުމުގެ މަގުސަދަކީ ފްލެޓު ލިބޭ ފަރާތްތަކަށް އުންމީދެއް ދިނުމުގެ އިތުރުން ފަރުނީޗަރާއި ގޭގައި ގެންގުޅޭ ސާމާނު ބަހައްޓޭނެ ތަންތަން ދައްކާލައި ދިނުން ކަމަށެވެ. 

"ރައްޔިތުންގެ ދިރިއުޅުމުގެ ފެންވަރު ރަނގަޅު ކުރަން ހިންގާ މިފަދަ މަޝްރޫއު ތަކަކީ ރައީސް މުއިއްޒުގެ ސަރުކާރުން އިސްކަން ދޭނެ ކަންކަން. އެހެންކަމުން މިފަދަ ހުރިހާ މަޝްރޫއެއް މެދުކެނޑުމެއް ނެތި ކުރިއަށްދާނެކަން ވަރަށް ފަހުރުވެރިކަމާއެކު ފާހަގަ ކުރަން،" ހަމްދާން ވިދާޅުވި އެވެ. 

ފްލެޓްތައް ދައްކާލުމަށް ފަހު އެމްޑީ ހަމްދާން ވިދާޅުވީ އާ މެނޭޖުމަންޓުން ގެނައި ބަދަލާއެކު ފްލެޓް ޓަވަރުތަކުގެ މަސައްކަތް 24 ގަޑިއިރު ނުހުއްޓި ކުރިއަށް ދާ ގޮތަށް ހަމަޖައްސާފައިވާނެ ކަމަށެވެ. 

"ނިމޭންދާ ޓަވަރުތަކަށް ހުރިހާ ރިސޯސެއް ވާނީ ޑައިވާޓްކޮށްފައި. މަގުސަދަކީ މަޑުމަޑުން ހުރިހާ އެއްޗެއް ނިންމަމުން ދިއުމުގެ ބަދަލުގައި ރާސްތާގައި ހުރިހާ ފްލެޓު ތަކެއް އެއްކޮށް ނިންމާލުން. މިހާރު ގެނެސްފައިވާ ބަދަލާއެކު 512 އެޕާޓްމަންޓް [ދެ ކޮޓަރި އާއި ތިން ކޮޓަރީ] ގެ ފެބްރުއަރީ މަހު ހަވާލު ކުރެވޭނެ. އޭގެ ފަހުން ކޮންމެ ދެ މަހަކުން ފްލެޓެއް ނިންމަމުން ގެންދާނެ. އަމާޒަކީ ޑިސެމްބަރު 2024 ގައި ހުރިހާ ފްލެޓެއް ނިންމައި ހަވާލު ކުރުން،" ހަމްދާން ވިދާޅުވި އެވެ. 

އޭނާ ވިދާޅުވީ ފްލެޓުތަށް އަވަސް ވެފައި ވަނީ ކޮންޓްރެކްޓަރުންގެ ސައިޑުންނާއި އެހެނިހެން ގޮތްގޮތުން ވެސް ހުރި ދަތިތަށް ހައްލު ކޮށްގެންނެވެ. 

"ބައިވަރު މަސައްކަތް މިކުރަނީ ބޮޑެތި ލޯނުތައް ނަގައިގެން. މިސާލަކަށް މިއީ އިންޑިއާ އެގްޒިމް ޕްރޮޖެކްޓަކަށް ވުމުން މެޓީރިއަލްވެސް އަންނަނީ އިންޑިއާއިން. އެތަކެތި ގެނައުމުގައި ލޮޖިސްޓިކް ގިނަ ކަންތައްތަކެއް ހިމެނޭ. އެކަން ކުރަން ސަރުކާރުގެ މުއއްސަސާތަކާ ގުޅިގެން ވޯކް ސްޓްރީމް ލައިން ކުރިން. އެހެންވެ ހުރިހާ ކޮޅަކުން މަސައްކަތް ކުރީމަ އަވަސްވީ،" ހަމްދާން ވިދާޅުވި އެވެ.