ނޫ މުތީ މަޝްރޫއު | ފުށިދިއްގަރު ފަޅު ގުޅީ އިހްތިސޯސުން ނަގައިފި

ފުށިދިއްގަރު ފަޅު ހިއްކައިގެން ޑިވެލޮޕް ކުރާ އާ ޒަމާނުގެ ސިޓީ، "ނޫ މުތީ" މަޝްރޫއު ފަށަން، އެ ފަޅުގެ އިހުތިސޯސު އޮތް، މާލެ އަތޮޅު ގުޅީގެ ދަށުން ވަކި ކޮށްފި އެވެ. 

މާލެ އަތޮޅު ގުޅީގެ އިދާރީ ދާއިރާގެ އިހްތިސޯސަށް ބަދަލު ގެނެސް، އެރަށުގެ އިހްތިސޯސުގެ ތެރެއިން ފުށިދިއްގަރުފަޅު ވަކިކޮށްފައި ވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ރައީސުލް ޖުމްހޫރިއްޔާއަށް ލިބި ވަޑައިގަންނަވާ ބާރުގެ ދަށުން ރައީސް ޑރ. މުހައްމަދު މުއިއްޒެވެ. 

ފުށިދިއްގަރު ފަޅަކީ ހުޅުމާލޭގެ ތިން ހުޅުމާލޭގެ ބޮޑު ސަރަހައްދެކެވެ. ފުށިދިއްގަރު ފަޅުން ޑިވެލޮޕް ކުރާ ސިޓީ، "ނޫމުތީ" ގައި 1600 އަކަފޫޓްގެ 11،000 ގޯއްޗާއި 1400 އަކަފޫޓްގެ 20،000 ފްލެޓް އަޅަ އެވެ. 

ސަރުކާރުގެ ހައުސިން މިނިސްޓަރު ޑރ. އަލީ ހައިދަރު ވިދާޅުވެފައިވާ ގޮތުގައި ފުށިދިއްގަރު ފަޅުގައި ޑިވެލޮޕް ކުރާ އާ ޒަމާނުގެ ސިޓީ، ނޫމުތީގެ ލޭންޑް ޔޫސް ޕްލޭން ހަދައި އެތަނުގެ އީއައިއޭ ހެދުމުގެ މަސައްކަތް ކުރިއަށް ދެއެވެ. 

ވެރިރަށް މާލޭގެ ދެކުނުން 16 ކިލޯމީޓަރު ދުރުގައިވާ ފަޅު ހިއްކައި އާ ސިޓީއެއް ޑިވެލޮޕް ކުރުމަކީ ރައީސް މުއިއްޒުގެ ރިޔާސީ ވައުދެކެވެ. އަންނަ ހަރުގެ ބަޖެޓް އެކުލަވައިލި އިރު އެ މަޝްރޫއަށް 400 މިލިއަން ރުފިޔާ ޖެހި އެވެ. އެކަމަކު އެމްޑީޕީގެ މެޖޯރިޓީ އޮތް މަޖިލީހުން ވަނީ ބަޖެޓު ދިރާސާކުރާ މަރުހަލާގައި އެ 400 މިލިއަން އުނިކޮށް، އެމްޑީޕީ ސަރުކާރުން ފެށި ގިރާވަރު، ގުޅިފަޅު އަދި ހުޅުމާލެއިން ގޯދި ދޭ ސަރަހައްދުގައި ވަސީލަތްތައް ގާއިމުކުރަން 200 މިލިއަން ރުފިޔާ ބަދަލުކޮށްފަ އެވެ. އަދި އަނެއް 200 މިލިއަން ރުފިޔާ ވަނީ އެކި މަޝްރޫއުތަކަށް ބަހާލައިފަ އެވެ.

ނޫމަތީ ތަރައްގީ ކުރާ ފުށިދިއްގަރުފަޅު ހިއްކަން ރާއްޖޭގައި މިހާރު ވެސް މަޝްރޫއުތައް ހިންގާ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓަރަކްޝަން ކުންފުންޏާ ހަވާލުކުރަން ނިންމާފައިވާ ކަމަށް ވެއެވެ. ސަރުކާރަކުން އަދި ނުއެއް ބުނެ އެވެ.

ފުށިދިއްފަރު ފަޅު މަޝްރޫއު - ފުށިދިއްގަރު ބަޖެޓް އަތުލުން ވާނީ ވަރަށް ގޯސް ފެށުމަކަށް