ދިޔަމިގިލީގައި 10،000 ރުފިޔާ ލިބޭ ފުޓްސަލް މުބާރާތެއް ފަށަނީ

ތ. ދިޔަމިގިލި ކައުންސިލުން ރަށަށް ހުޅުވާލައިގެން ފުޓްސަލް މުބާރާތެއް ބާއްވަން ނިންމައިފި އެވެ.

ދިޔަމިގިލީގައި ކުރިން އުފައްދާފައިވާ ޓީމް ތަކާއި މުބާރާތަށް ރަށުގެ ޒުވާނުން އުފެއްދި ޓީމްތަކުން ބައިވެރިވެފައިވާ މި މުބާރާތް އޮންނާނީ މި މަހުގެ 24 އިން ފަށައިގެން ނުވަ ދުވަހަށެވެ.

މި މުބާރާތުގެ ޗެމްޕިއަންކަން ހޯދާ ޓީމަކަށް 10،000ރ. ލިބޭ އިރު ދެވަނައަށް ދާ ޓީމަށް ތައްޓާއި މެޑެލް، އަދި އެހެނިހެން ވަނަ ތަކަށް ހަނދާއި ލިޔުމާއި މެޑެއްޔާ ޓްރޮފީ ދޭނެ އެވެ.

ދިޔަމިގިލީގެ ކައުންސިލަރު އަހްމަދު ޒަހީން ވިދާޅުވީ ހަ ޓީމެއް ބައިވެރިވާ މި މުބާރާތުގެ އެންމެ ފަހުގެ ތައްޔާރީތައް ވަމުން އަންނަ ކަމަށެވެ. އެގޮތުން ދަނޑު ރީތި ކުރުމާއި ސަރަހައްދު ސާފު ކުރުމުގެ މަސައްކަތްތައް ވެސް ނިމުމަކާ ގާތަށް ގޮސްފައިވާ ކަމަށެވެ.

އޭނާ ވިދާޅުވީ މުބާރާތުގެ ވަނަވަނައަށް ދާ ޓީމްތަކަށް، އިނާމް ހުށަހެޅުމުގެ ފުރުސަތު ކައުންސިލުން މިހާރު ހުޅުވާލާފައިވާ ކަމަށާއި ރަށުގެ ވިޔަފާރިވެރީންނާއި އާންމު ގިނަ ބަޔަކު އެކަމަށް އިޖާބަ ދޭނެ މަށެވެ.

"ޗެމްޕިއަން ޓީމަށް ކައުންސިލުން ފައިސާގެ އިނާމް މި ދެނީ. ނަމަވެސް ރަށުގެ އަމިއްލަ ވިޔަފާރިވެރިންނަށް އިނާމް ހުށަހެޅުމުގެ ފުރުސަތު ވަނީ ހުޅުވާލާފައި،" ޒަހީން ވިދާޅުވި އެވެ.

އާބާދީގައި ހާހެއްހާ މީހުން އުޅޭ ދިޔަމިގިއްޔަކީ ކުޅިވަރަށް ލޯބިކުރާ ޒުވާނުންތަކެއް އުޅޭ ރަށެކެވެ.