ރައީސްގެ ރަސްމީ ދަތުރުފުޅުތަކުގެ ހަރަދުތައް ހާމަކުރަނީ

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވާ ރަސްމީ ދަތުރުފުޅުތަކަށް ދައުލަތުގެ ބަޖެޓުން ކުރާ ހަރަދުތައް ހާމަކުރައްވަން ނިންމަވައިފި އެވެ.

ރައީސް އޮފީހުން މިއަދު ބުނީ ރައީސް ކުރައްވާ ރަސްމީ ދަތުރުފުޅުތަކަށް ދައުލަތުގެ ބަޖެޓުން ކުރާ ހަރަދުތައް، ދަތުރުފުޅު ނިންމަވާލާތާ 15 ދުވަސް ތެރޭގައި ހާމަކުރައްވަން ރައީސް ނިންމަވާފައިވާ ކަމަށެވެ.

މިކަމާ ގުޅިގެން ކޮމިއުނިކޭޝަން މިނިސްޓަރު އިބްރާހިމް ހަލީލް ވިދާޅުވީ، މިގޮތަށް ރައީސް ނިންމެވީ، އެމަނިކުފާނުގެ ރަސްމީ ދަތުރުފުޅުތަކުގެ މައުލޫމާތު ހޯދަން އަބަދުވެސް ނޫސްވެރިން މަސައްކަތް ކުރާކަން އެނގިވަޑައިގަންނަވާތީ ކަމަށެވެ.

"ރައީސް ނިންމެވީ ރަސްމީ ކޮންމެ ދަތުރުފުޅެއް ނިމޭތާ 15 ދުވަސް ތެރޭގައި ހަރަދުގެ ތަފްސީލް ހާމަ ކުރުމަށް،" ހަލީލް ވިދާޅުވި އެވެ.

ރައީސް މުއިއްޒު ވެރިކަމާ ހަވާލުވެވަޑައިގެންނެވުމަށްފަހު އެންމެ ފުރަތަމަ ރަސްމީ ދަތުރުފުޅެއްގައި ވަޑައިގެންނެވީ ތުރުކީއަށެވެ. މިދިޔަ މަހުގެ 26 ވަނަ ދުވަހު ރައީސްގެ ދެކަނބަލުން ތުރުކީއަށް ވަޑައިގެންނެވީ އެގައުމުގެ ރައީސް ރައީސް ރަޖަބު ތޮއްޔިބު އުރުދުގާންގެ ދައުވަތަކަށެވެ.

އޭގެ ފަހުން ތުރުކީ އިން އެމަނިކުފާނު ވަނީ ދުބާއީއަށް ވަޑައިގެންފަ އެވެ. ދުބާއީއަށް ވަޑައިގެންނެވީ ކޮޕް-28 ކޮންފަރެންސްގައި ބައިވެރިވެ ވަޑައިގަތުމަށެވެ. މިއީ ރައީސް މުއިއްޒު ބައިވެރިވެ ވަޑައިގެންނެވި ފުރަތަމަ ބައިނަލްއަގުވާމީ ސަމިޓް / ކޮންފަރެންސެވެ.

ރަސްމީ ދަތުރުފުޅުތަކުގެ މައުލޫމާތު ހާމަކުރައްވަން ރައީސް ނިންމެވިއިރު، ނިމިދިޔަ ސަރުކާރުން މިފަދަ މައުލޫމާތުތައް އެއްވެސް ވަރަކަށް ހާމަކޮށްފައެއް ނުވެ އެވެ.