ޝާހިލް ވަކީލުންނަށް އެއްބާރުލުން ނުދޭތީ ޝަރީއަތް ހުއްޓިފައި
"ވަކީލުން އޭނައާ ބައްދަލުކުރަން ޖަލަށް ދިޔައީމަ ވާހަކައެއް ވެސް ނުދައްކާ. އަޅުގަނޑަކަށް ނޭންގެ ދެން ކިހިނެއްވާ ކަމެއް ކަމެއް،" ޝަމީމް ވިދާޅުވި އެވެ.
ހ. ޝީރީންވިލާގައި އަނިޔާވެރިކޮށް މަރާލާފައި އޮއްވާ ފެނުނު ޏ. ފުވައްމުލަކު ޝިއާއު މުހައްމަދު ސައީދުގެ މަރުގެ މައްސަލައިގެ ތުހުމަތުގައި ދައުވާ އުފުލާފައިވާ ނިލަންދޫ، ފިނިފެންމާގެ، ސާހިލް އަލީ އެއްވެސް ވަރަކަށް ދިފާއީ ވަކީލުންނަށް އެއްބާރުލުން ނުދޭ ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެ އެވެ.
އޯގަސްޓު 6، 2022 ގައި ޝިއާއު މަރާލާފައި ވަނީ ސާހިލް ކަމަށް ތުހުމަތުކޮށް އޭނާ ހުރީ ޝަރީއަތް ނިމެންދެން ބަންދުކޮށްފަ އެވެ. ސިއްރު ކޮށްގެން ހިންގާ މި މައްސަލައިގެ ޝަރީއަތް ކުރިއަށް ނުދާތާ ވަރަށް ދުވަސް ވެއްޖެ އެވެ.
ޕީޖީ ޝަމީމް މިއަދު ބޭއްވި ނޫސްވެރިންގެ ބައްދަލުވުމުގައި މި މައްސަލައިގެ ތަފްސީލެއް އެހުމުން ވިދާޅުވީ އޭނާއަށް ދައުލަތުން ހަމަޖައްސައިދިން ވަކީލުންނާ އެއްވެސް ވަރަކަށް ވާހަކަ ނުދައްކާ ކަމަށެވެ. ދައުލަތުގެ ފަރާތުން މިހާރު ތިން ވަކީލުން ހަމަޖައްސައިދީފައިވާ ކަމަށް ވެސް ވިދާޅުވި އެވެ.
"ވަކީލުން އޭނައާ ބައްދަލުކުރަން ޖަލަށް ދިޔައީމަ ވާހަކައެއް ވެސް ނުދައްކާ. އަޅުގަނޑަކަށް ނޭންގެ ދެން ކިހިނެއްވާ ކަމެއް ކަމެއް،" ޝަމީމް ވިދާޅުވި އެވެ.
ޝަމީމް ވިދާޅުވީ ސާހިލް އެއްބާރުލުން ނުދޭތީ އޭނާއަށް ދެން ވަކީލަކު އައްޔަނު ނުކޮށްދޭން އެޓާނީ ޖެނެރަލްގެ އޮފީހުން ނިންމާފައިވާ ކަމަށެވެ. އޭނާއަށް ދައުލަތުން އައްޔަނުކޮށްދޭ ވަކީލުން ތަނާޒުލް ވަނީ އެއްބާރުލުން ނުދޭތީ އެވެ. މީގެ ކުރިން ތަހުގީގުގައި ވެސް އޭނާ އެއްވެސް ވަރަކަށް އަނގައިން ނުބުނާ ކަމަށް މައުލޫމާތު ލިބިފައިވެ އެވެ.
ސާހިލްގެ މައްޗަށް މި މައްސަލައިގައި ފަސް ދައުވާއެއް ދައުލަތުން އުފުލާފައިވެ އެވެ. އޭނާގެ މައްޗަށް ކުރަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އާއި އޮރިޔާން ކާޑު ގެންގުޅުމުގެ ދައުވާގެ އިތުރުން ކެނެބިސް ބޭނުންކުރުމުގެ ކުށުގެ ދައުވާ އެވެ. ދެ ދައުވާގެ ތަފްސީލް ވަނީ ސިއްރުކޮށްފަ އެވެ.
ކޮމެންޓް
Republic of Maldives