"ފީފާއިން ފޮނުވާ ފައިސާ ބައްސާމް ބޭނުންކުރި ކަމުގެ ހެކި އެބަހުރި"
ތުހުމަތަކީ އެފްއޭއެމްއަށް ފީފާއިން ފޮނުވާ ފައިސާ ރާއްޖޭގެ ގާނޫނުތަކާ ގަވާއިދުތަކާ ހިލާފަށް އެކި ކަންކަމަށް ބޭނުން ކުރާ ކަމަށް
ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ މައްޗަށް ފުލުހުން ހިންގާ ތަހުގީގުގައި އެންމެ ބޮޑު ތުހުމަތެއް އޮތީ އެތަނުގެ ރައީސް ބައްސާމް އަދީލް ޖަލީލްގެ މައްޗަށް ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެ އެވެ.
ޝަމީމް މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވީ މި މައްސަލައިގައި އަދިވެސް ހެކިތައް ހޯދަމުންދާ ކަމަށާއި، ހަފްތާއެއް ތެރޭގައި ދައުވާ ކުރަން ފޮނުވާނެ ކަމަށް ބެލެވޭ ކަމަށެވެ.
"އަޅުގަނޑުމެންގެ ތުހުމަތަކީ ނުވަތަ ފުލުހުންގެ ތުހުމަތަކީ އެފްއޭއެމްއަށް ފީފާއިން ފޮނުވާ ފައިސާ ރާއްޖޭގެ ގާނޫނުތަކާ ގަވާއިދުތަކާ ހިލާފަށް އެކި ކަންކަމަށް ބޭނުން ކުރަނީއޭ،" ޝަމީމް ވިދާޅުވި އެވެ.
މި މައްސަލައާ ގުޅޭ ގޮތުން ވާހަކަދައްކަވަމުން ޝަމީމް ވިދާޅުވީ އެގޮތަށް ފޮނުވާ ފައިސާ ބޭނުން ކުރާނެ އުސޫލުތަކެއް ހުންނަ ކަމަށެވެ. އެ އުސޫލުތަކާ ހިލާފަށް ބައްސާމްގެ އިތުރުން އެފްއޭއެމްގެ އެހެން ވެރިޔަކަށް ތުހުމަތު ކުރެވޭ ކަމަށެވެ.
ތަހުގީގަށް ހެކި ހޯދުމާ ގުޅޭ ގޮތުން ވާހަކަދައްކަވަމުން ޝަމީމް ވިދާޅުވީ ފައިނޭންޝަން ކްރައިމް ހިންގާއިރު އާންމު ގޮތެއްގައި ފައިސާ ބޭނުން ކުރަނީ ކޭޝް ކާޑު ބޭނުންކޮށްގެން ކަމަށެވެ. އެހެންކަމުން ފައިސާ ބޭނުންކޮށްފައިވާ ގޮތްތައް ވަރަށް ސާފުކޮށް ފެންނަން އެބަހުރި ކަމަށެވެ.
"މިސާލަކަށް މި މައްސަލައިގަ ވެސް ބޭބޭފުޅުން ދަތުރުކޮށްފަ ހުރި ގޮތާ، ޝޮޕިން މޯލަށް ދަތުރުކުރައްވާ އޫބާއަށް ފައިސާ ދައްކަވަނީ ވެސް ކާޑުން. އެހެންވީމަ އަޅުގަނޑުމެންނަށް އެނގޭ ކޮންތަނަކަށްކަން ދިޔައީވެސް،" ޝަމީމް ވިދާޅުވި އެވެ.
ޝަމީމް ވިދާޅުވީ މި ހެކިތައް ފުލުހުން ހޯދަމުންދާ ކަމަށެވެ. އެކަމަކު ކުޑަ ވަގުތު ކޮޅެއް ނަގާނެ ކަމަށެވެ. އަދި، އެފްއޭއެމް އިން ލިޔެކިޔުން ގެންގުޅެފައި ހުރި ގޮތުން ވެސް މައުލޫމާތު އެއްކުރަން ދަތިކަން ވެސް ފާހަގަކުރެއްވި އެވެ.
"އެފްއޭއެމްގެ ކަންކަމުގަ އަޅުގަނޑަށް މައުލޫމާތު ލިބެނީ އަޅުގަނޑުމެން ބަލަން ޖެހޭ ކަންކަން އެބަހުރި ކަމަށް. އެވާ ގޮތަކީ ބައެއް ކަހަލަ ލިޔުންތައް ބަލަހައްޓާފަ ހުރީކީ އާންމު ގޮތެއްގަ އިންސާނުން ލިޔުން ބަލަހައްޓާ ގޮތަކަށް ނޫން. އެހެންވީމަ ބައެއް ކަހަލަ ދަތިތައް ހުންނާނެ އެ އެއްޗެހި ހޯދާ ނިއުޅަން،" ޝަމީމް އިތުރަށް ވިދާޅުވި އެވެ.
އެފްއޭއެމްގެ ވެރިން ހިޔާނާތްތެރިވެފައިވާކަމުގެ ތުހުމަތަށް ފުލުހުން ތަހުގީގު ހިންގަން ފެށީ މިދިޔަ މަހު އެވެ. ފުލުހުން ވަނީ އެފްއޭއެމްއަށް ވަދެ ގިނަ ލިޔެކިޔުންތަކެއް ވެސް ނަގާފަ އެވެ.
ކޮމެންޓް
Republic of Maldives