ރާއްޖޭގެ މަންޓާ ބޭރަށް | ދަތުރު ފުޅާކޮށް އިންޑިއާގެ ބެންގަލޫރަށް

ރާއްޖޭގެ އަމިއްލަ އެއާލައިން، މަންޓާ އެއާއިން އިންޑިއާގެ ބެންގަލޫރަށް އަންނަ އަހަރުގެ ކުރީކޮޅު ދަތުރުރައް ފަށާނެ ކަމަށް ބުނެފި އެވެ. 

އިންޑިއާގެ ނޫހަކަށް މަންޓާ އެއާގެ ޑެޕިއުޓީ ޗީފް އެގްޒެކެޓިވް އޮފިސަރު އަހުމަދު މައުމޫން (މާނު) ދެއްވި އިންޓަވިއުއެއްގައި ވިދާޅުވެފައިވާ ގޮތުގައި އެ ކުންފުނިން ބެންގަލޫރު އޮޕަރޭޝަން ފަށަން ނިންމާފައި ވަނީ އަންނަ އަހަރުގެ ޖެނުއަރީ މަހުގެ 24 ވަނަ ދުވަހު އެވެ. 

އަދި މަންޓާގެ ފްލައިޓުތަށް އަޅަން ފަށާނީ އެ މަހުގެ 26 ވަނަ ދުވަހު އެވެ. މި ދަތުރުތަށް އޮންނާނީ މަންޓާ އެއާގެ މައި ހަބް ކަމަށްވާ ދާލު އެއާޕޯޓުންނެވެ. 

މައުމޫން ވިދާޅުވެފައިވާ ގޮތުގައި ބެންގަލޫރަށް ދަތުރު ފެށުމުގެ އެއް ބޭނުމަކީ ކޮވިޑުގެ ބަލާއާފަތަށް ފަހު ދަތުރުފަތުރަށް އައި ބަދަލުތަކާއެކު އިންޑިއާފަދަ ކައިރި މަންޒިލްތަކުން ރަނގަޅު ނަތީޖާއެއް ފެންނަން އޮތުމެވެ. އެގޮތުން އެ މުއްދަތުގައި އެ ގައުމުން 240،000 ޓޫރިސްޓުން އައިކަން މާނު ފާހަގަ ކުރައްވަ އެވެ.

އޭނާ ވިދާޅުވެފައިވާ ގޮތުގައި އަންނަ އަހަރު ތެރޭގައި މަންޓާއިން އިންޑިއާގެ ޓްރިވެންޑްރަމް އާއި ކޮޗިން އަށް ދަތުރު ފެށުމުގެ ޕްލޭން ތަކެއް ވެސް އެބައޮތެވެ. އަދި އެކަށީގެންވާ ބޮޑު މަންތިންދާ ބޯޓެއް ގެނެސް ނިއުދިއްލީ އާއި މުންބާއީ އަށް ދަތުރުތަށް ފުޅާ ކުރުމުގެ ޕްލޭނެއް އޮތްކަން ވެސް މާނު ފާހަގަ ކުރެއްވި އެވެ، 

"ދާލު އެއާޕޯޓް އެކްސެޕެންޑް ކުރަން ކުރަމުންދާ މަސައްކަތް 2025 ގައި ނިމުމުން އެއާބަސް އޭ321 ގައި ހިދުމަތް ދެވޭނެ،" މާނު ވިދާޅުވި އެވެ. 

މަންޓާ އެއާއިން އެ ކުންފުނީގެ އިންޓަނޭޝަނަލް ދަތުރުތަށް ފަށަން އުޅޭކަން މީގެ ކުރިން ވަނީ އިއުލާނެއް ކޮށްފަ އެވެ. 

މަންޓާ އެއާގެ މާކެޓިން އެންޑް ކޮމިއުނިކޭޝަން މެނޭޖަރު މުބީން ޖަލީލު "މި" ނޫހަށް މިއަދު ވިދާޅުވީ އެ ދަތުރުތަށް ފަށަން ރާވާފައިވަނީ ދާލު އެއާޕޯޓުން ކަމަށާ އެކަމަށްޓަކައި ރޭގައި މާކެޓިން އިވެންޓެއް ވެސް ބެންގަލޫރުގައި ބާއްވާފައިވާ ކަމަށެވެ. 

"މަސައްކަތް ކުރަމުން މި ގެންދަނީ އަންނަ އަހަރުގެ ޖެނުއަރީ ފަހުކޮޅު ދަތުރުތަށް ފެށޭ ތޯ؟ އެކަމަށް ޕާޓްނަރުނާއެކު މި ދަނީ ތައްޔާރު ވަމުން،" މުބީން ވިދާޅުވި އެވެ.