މޭޔަރު ކަމަށް ކުރިމަތިލައްވާ އާޒިމަށް މާރިޔާގެ ތާއީދު ދީފި

މާލޭ ސިޓީގެ މޭޔަރު ކަމަށް ކުރިމަތިލައްވާ އެމްޓީސީސީގެ ކުރީގެ ސީއީއޯ އާދަމް އާޒިމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީގެ ތާއީދު ދެއްވައިފި އެވެ. 

މާރިޔާ އެކްސްގައި ވިދާޅުވީ އޭނާ ގަބޫލު ކުރައްވާ ގޮތުގައި އާޒިމް މާލެ ސިޓީ މޭޔަރުގެ މަގާމަށް ވާދަ ކުރައްވަނީ، އެމްޑީޕީގެ ކެންޑިޑޭޓަކު އެ މަގާމުގަ ހުރުމަށް އެދިވަޑައިގަންނަވާތީ އެވެ.

"އަޅުގަނޑު ގަބޫލު ކުރާ ގޮތުގައި އޭނާއަކީ އެ މަގާމަށް އެންމެ އެކަށީގެންވާ ބޭފުޅާ އަދި އަޅުގަނޑުގެ ފުރިހަމަ ތާއީދު އެބޭފުޅާއަށް ލިބޭނެ. އެބޭފުޅާއަކީ ހެޔޮ ވިސްނުމެއް ގެންގުޅޭ ކަން ކުރެއްވޭނެ ބޭފުޅެއް. އެމަނިކުފާނުގެ ކެމްޕޭނުގައި މަސައްކަތް ކުރުމަށް އަޅުގަނޑު ތައްޔާރު، އެމަނިކުފާނަށް ކާމިޔާބީއަށް އެދެން!" މާރިޔާ ވިދާޅުވި އެވެ. 

މާލޭ މޭޔަރު ކަމަށް ވާދަ ކުރެއްވުމަށް މިހާތަނަށް ޝައުގުވެރިކަން ފާޅުކު ރައްވާފައިވާ ބޭފުޅުންގެ ތެރޭގައި ކުރީގެ ޔޫތް މިނިސްޓަރު އަހްމަދު މަހްލޫފާއި ކުރީގެ ބަންޑާރަ ނައިބު އާއިޝަތު އާޒިމާ ޝަކޫރާއި ކުރީގެ ކޮމިޝަނަރު އޮފް ޕޮލިސް ޙުސައިން ވަހީދު ހިމެނެ އެވެ. އަދި ދަ ޑިމޮކްރެޓްސް ޕާޓީގެ ފަރާތުން ވެސް ވަނީ މާލެ މޭޔަރު ކަމަށް ކެންޑިޑޭޓަކު ނެރެން ނިންމާފަ އެވެ.

ޑިމޮކްރެޓްސްގެ ފަރާތުން މުހައްމަދު ސައިފް ފާތިހް ވާދަ ކުރައްވާ ގޮތަށް އެ ޕާޓީން ކަނޑައަޅާފައިވާއިރު އޭނާއަކީ މާލޭ ސިޓީ ކައުންސިލްގެ ގަލޮޅު އުތުރު ދާއިރާގެ ކައުންސިލަރެވެ.