ވޯލްޑް ބޭންކް ބުނީ ރާއްޖޭގެ ދަރަނި ކުޑަކުރުމުގެ ރޭވުންތައް ފޭލިވެއްޖޭ

ރާއްޖޭން މާލީ ޑެފިސިޓް ކުޑަ ކުރުމުގެ ޕްލޭންތަކެއް އަބަދު ވެސް އޮވެ އެވެ؛ މި ވާހަކަ މިދިޔަ ފަސް އަހަރު ވެސް ގަދަޔަށް ދެއްކި އެވެ. އެކަމަކު އެކަން ހާސިލް ނުވެ ވަނީ ފެއިލްވެފަ އެވެ. އެކަން ހާމަކުރީ ވޯލްޑް ބޭންކުންނެވެ. 

ވޯލްޑް ބޭންކުން އެންމެފަހުން ނެރުނު މޯލްޑިވްސް ޑިވެލޮޕްމަންޓް އަޕްޑޭޓްގައި ބުނެފި އެވެ. މިދިޔަ މަހު އާންމުކުރި، "ބެޓެން ޑައުން ދަ ހެޗަސް" ރިޕޯޓްގައިވާ ގޮތުން ރާއްޖޭން މާލީ ޑެފިސިޓް ކުޑަކުރުމުގެ ޕްލޭންތައް އޮތްއިރު، މިހާތަނަށް ރާއްޖެއިން ކަނޑައެޅި އަމާޒުތައް ހާސިލް ނުކުރެވިފައި ވާއިރު، މެދު ރާސްތާގައި ރާއްޖޭގެ ދަރަނި ޖީޑީޕީގެ ނިސްބަތުން 115 ޕަސެންޓަށް ވުރެ މަތީގައި ހުންނާނެ ކަމަށް ބުނެފައިވެ އެވެ. 

ރާއްޖެއަށް އަބަދުވެސް އެހީތެރިކަން ފޯރުކޮށްދޭ އެންމެ ބޮޑު ޑިވްލޮޕްމަންޓް ޕާޓަރު ކަމަށްވާ ވޯލްޑް ބޭންކް އިން ބުނީ އަހަރުގެ ކުރީކޮޅު ސަރުކާރުން މުދަލާއި ހިދުމަތުގެ އަގުން ނެގޭ ޓެކްސް (ޖީއެސްޓީ) ރޭޓް ބޮޑު ކޮށްފައި ވިޔަސް، ހަރަދު ކުޑަކުރުމުގެ ފިޔަވަޅުތައް، ހާއްސަކޮށް ސަބްސިޑީ އަށް ގެންނަން މި އަހަރަށް ރޭވި އިސްލާހުތައް ލަސްވެފައި ވާތީ، ހާއްސަކޮށް ހަރަދު ކުޑަކުރުމަށް ވިސްނައިގެން އަވަސް އަދި ހަރުދަނާ ފިޔަވަޅު ތަކެއް އަޅަން ޖެހޭ ކަމަށެވެ. 

އެ ބޭންކުން ބުނީ ރާއްޖޭގެ ރިއަލް ޖީޑީޕީ 2023 ވަނަ އަހަރު 6.5 ޕަސެންޓުގައި އަދި 2024 އިން 2025 އަށް އެވްރެޖްކޮށް 5.4 ޕަސެންޓް ގައި ކުރިއަރާނެ ކަމަށް ލަފާކުރެވުނު ނަމަވެސް، އިތުރުވަމުންދާ ހަރަދުތަކާއި ދަރަނި ބޮޑުވުމާއި ބޭރުގެ ލޮޅުންތަކުގެ ސަބަބުން ރާއްޖޭގެ އިގްތިސާދަށް ބޮޑެތި ގޮންޖެހުން ތަކެއް ކުރިމަތިވެފައިވާ ކަމަށެވެ.