ޓޫރިޒަމަށް ހާއްސަ ކައުންސިލެއް އުފައްދައިފި

ރާއްޖޭގެ ފަތުރުވެރިކަން އިތުރަށް ފުޅާ ކުރުމުގެ ގޮތުން ހާއްސަ ކައުންސިލެއް އުފައްދައިފި އެވެ.

މި ކައުންސިލް އުފައްދަން ނިންމީ، އާ ސަރުކާރުގެ ވަޒީރުންގެ މަޖިލީހުން މިއަދު ބޭއްވި ރަސްމީ ފުރަތަމަ ބައްދަލުވުމުގަ އެވެ. "ވިޒިޓާ އިކޮނޮމީ ކައުންސިލް" ގެ ނަމުގައި އަލަށް އުފެއްދި މި ކައުންސިލްގެ ރިޔާސަތު ބަލަހައްޓަވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.

ރައީސް އޮފީހުގެ އަންޑާ ސެކްރެޓްރީ ފޯ ޕަބްލިކް ޕޮލިސީ، މުހައްމަދު ފިރުޒުލް މިއަދު ވިދާޅުވީ މިއަދުގެ ވަޒީރުންގެ މަޖިލީހުގައި މި ކައުންސިލްގެ އިތުރުން ކުރިން ވެސް އޮތް ސޯޝަލް ކައުންސިލް އަދި އިކޮނޮމިކް ކައުންސިލް އުފައްދަން ނިންމާފައިވާ ކަމަށެވެ.

ފިރުޒުލް ވިދާޅުވީ އަލަށް އުފެއްދި ވިޒިޓާ އިކޮނޮމީ ކައުންސިލް މަސައްކަތް ކުރާނީ މިހާރު ފަތުރުވެރިކަމުގެ ދާއިރާގެ މެންޑޭޓުގައި ހިމެނޭ ކަންކަން އިތުރަށް ފުޅާ ކުރުމަށް ކަމަށެވެ. އެގޮތުން، ރާއްޖެ އަކީ ހަމައެކަނި ޗުއްޓީ ހޭދަކުރަން އަންނަ މަންޒިލެއްގެ ބަދަލުގައި، އެހެނިހެން ބޭނުންތަނަށް ރާއްޖެއަށް ފަތުރުވެރިން ގެނައުމުނެ މަސައްކަތް ރައީސް ޑރ. މުއިއްޒުގެ ހިންގެވުމާއެކު ކުރިއަށްދާނެ ކަމަށެވެ.

"މިއަދު ތިބޭފުޅުންނަށް އެނގިވަޑައިގަންނަވާނެ ފަތުރުވެރިކަން ހަމައެކަނި ބިނާވެފަ އޮތީ ލެއިޝާ ފަތުރުވެރިކަމުގެ މައްޗަށް. މީގެ އިތުރުން ސިއްހަތާ ބެހޭ ފަތުރުވެރިކަން، ތައުލީމާ ބެހޭ ފަތުރުވެރިކަން، ދަތުރުފަތުރުގެ ފަތުރުވެރިކަން، މިހެން ގޮސް އެކި ބާވަތްތަކުގެ ފަތުރުވެރިކަން އިތުރަށް ފުޅާކުރަން މި ކައުންސިލުން މަސައްކަތްތަކެއް ކުރަމުންދާނެ،" ކައުންސިލްގެ މަސައްކަތްތައް ތިލަ ކޮށްދެއްވުމުގެ ގޮތުން ފިރުޒުލް ވިދާޅުވި އެވެ.