މުލިއާގެއަށް ގެއްލުމެއް ނުދޭނެ، މަރާމާތު ކުރަން ދުވަސް ނަގާނެ

ރައީސުލްޖުމްހޫރިއްޔާގެ ރަސްމީ ގެކޮޅު ކަމަށްވާ މުލިއާގެ ރަނގަޅު ފެންވަރެއްގައި މަރާމާތު ކުރުމަށް ދުވަސް ކޮޅެއް ނަގާނެ ކަމަށް ސަރުކާރުން ބުނެފި އެވެ.

މީގެ 104 އަހަރު ކުރިން އައްސުލްތާން މުހައްމަދު ޝަމްސުއްދީންގެ ވެރިކަމުގައި ބިނާކޮށްފައިވާ މުލީއާގެއަކީ އެކި ވެރިކަންތަކުގައި ރައީސުން ދިރިއުޅުއްވި ގެކޮޅެވެ. ތަރިކަ ރައްކާތެރި ކުރުމުގެ ގޮތުން އެތަނުގައި މިހާރު ދަނީ މަރާމާތުގެ މަސައްކަތް ކުރަމުންނެވެ.

ނަމަވެސް، މި މަރާމާތުގެ ތެރެއިން މުލިއާގޭގެ މައިގެއަށް ބަދަލު ގެންނަނީ ކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.

އެކަމާ ގުޅިގެން ދިވެހި ލެންގުއޭޖް، ކަލްޗާ އެންޑް ހެރިޓޭޖް މިނިސްޓަރު އާދަމް ނަސީރު އިބްރާހިމް "މި" ނޫހަށް ވިދާޅުވީ އެއްވެސް ހާލަތެއްގައި އާސާރީ އެ ބިނާއަށް ގެއްލުންވާފަދަ މަސައްކަތެއް ނުކުރާނެ ކަމަށެވެ.

"އެއީ އެތަން ރައްކާތެރިކޮށް ދެމެހެއްޓުމަށް ދެވޭ ފަރުވާއެއް. އެއީ ހަމަ ހުކުރު މިސްކިތްފަދަ ތަންތަނުގައި މަސައްކަތް ކުރާ ފަދައިން،" މިނިސްޓަރު އާދަމް ވިދާޅުވި އެވެ.

މިނިސްޓަރު ވިދާޅުވީ އެތަނުގައި އެކަށީގެންވާ ރަގަޅު މަސައްކަތެއް ކުރަން ޖެހިފައިވާ ކަމަށެވެ. އެހެންކަމުން މަސައްކަތް އެއްކޮށް ނިންމާލަން އަދި ދުވަސްކޮޅެއް ނަގާނެ އެވެ. 

މުލިއާގެ މަރާމާތު ކުރަމުން ދާތީ ރައީސް ޑރ. މުހައްމަދު މުއިއްޒު ވަގުތީ ގޮތުން އުޅުއްވަނީ އަމިއްލަ ގެކޮޅު، މ. ދިމްޔާތުގަ އެވެ. އެތަން މަރާމާތުކޮށް ނިމުމުން ރައީސްގެ ދެކަނބަލުން މުލިއާގެއަށް ވަޑައިގަންނަވާނެ އެވެ.