މަޖިލީހުގެ ރައީސް ކަމަށް އަސްލަމާއި އާޒިމް

ހުސްވެފައިވާ ރައްޔިތުންގެ މަޖިލީހުގެ ރައީސްގެ މަގާމަށް ދެ ބޭފުޅަކު ކުރިމަތި ލައްވައިފި އެވެ.

މަޖިލީހުގެ ރައީސްގެ މަގާމުން ރައީސް ނަޝީދު މިއަދު ވަނީ އިސްތިއުފާ ދެއްވާފައެވެ. އެހެން ކަމުން ރައްޔިތުންގެ މަޖިލީހުގެ ރައީސްގެ މަގާމަށް ބޭފުޅަކަށް އިންތިހާބު ކުރުމަށް މިރޭ މަޖިލީހުގެ އިތުރު ޖަލްސާ އެއް ވަނީ ފަށާފައެވެ.

ރައީސް ކަމަށް ކުރިމަތިލެއްވީ އެމްޑީޕީގެ ޕީޖީ ގުރޫޕްގެ ލީޑަރު މުހައްމަދު އަސްލަމާއި ދަ ޑިމޮކްރެޓްސްގެ މެދު ހެންވޭރު ދާއިރާގެ މެންބަރު އަލީ އާޒިމެވެ.

މަޖިލީހުގެ ރައީސް ކަމަށް ވަޑައިގަންނަވާނީ މެޖޯރިޓީ އޮތް އެމްޑީޕީން ބޭނުންވާ ބޭފުޅެކެވެ.

މެޖޯރިޓީ އޮތް އެމްޑީޕީ ގައި 55 މެންބަރުން އެބަ ތިއްބެވި އެވެ. މައިނޯރިޓީ ޕާޓީ އަކީ އެމްޑީޕީން ވަކިވެވަޑައިގެން މެންބަރުން އުފެއްދެވި ދަ ޑިމޮކްރެޓްސް އަށެވެ. އެ ޕާޓީގައި 13 މެންބަރުން ތިއްބައެވެ. ޕީޕީއެމްގައި ފަސް މެންބަރުން އަދި ޕީއެންސީ ގައި ތިން މެންބަރުން އަދި އެމްއެންޕީ ގައި ތިން މެންބަރުންނެވެ. ޖުމްހޫރީ ޕާޓީއާ އެމްޑީއޭ ގައި ކޮންމެ ޕާޓީ އެއްގައި ދެ މެންބަރުން ހިމެނެ އެވެ. ވަކި ޕާޓީ އަކަށް ނިސްބަތް ނުވާ ދެ މެންބަރަކު ވެސް ހިމެނެ އެވެ.

މަޖިލީހުގެ ރައީސަކަށް ބޭފުޅަކު އިންތިހާބު ކުރާނީ މެންބަރުންގެ ސިއްރު ވޯޓަކުންނެވެ.