ރާއްޖެ އަކީ ހާއްސަ މަގާމެއް ލިބިފައިވާ ގައުމެއް: މޯދީ

އިންޑިއާގެ "ނެއިބާ ހުޑް ފަސްޓް" ޕޮލިސީ ގައި ރާއްޖެ އަކީ ހާއްސަ މަގާމެއް ލިބިފައިވާ ގައުމެއް ކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެ އެވެ.

ބޮޑުވަޒީރު މޯދީ މިހެން ވިދާޅުވީ ދިވެހީންގެ ޖުމްހޫރީ ދުވަހުގެ ތަހުނިޔާ ފޮނުއްވާ އާންމު ކުރެއްވި ބަޔާނެއް ގައެވެ. ބޮޑުވަޒީރު ވިދާޅުވި ގޮތުގައި އިންޑިއާ-ރާއްޖެއާ ދެމެދު އުފެދިފައިވާ ގާތް ގުޅުމަކީ ތާރީހާއި ސަގާފަތުގެ މައްޗަށް ބިނާވެފައިވާ ގުޅުމެކެވެ.

އަދި އިންޑިއާގެ "ނެއިބާ ހުޑް ފަސްޓް" ޕޮލިސީ ގައި ރާއްޖެ އަކީ ހާއްސަ މަގާމެއް ލިބިފައިވާ ގައުމެއް ކަމަށާ މި ސަރަހައްދުގެ ސަލާމަތާއި ކުރިއެރުމުގެ ތަސައްވުރު "ސެކިއުރިޓީ އެންޑް ގްރޯތް ފޯ އޯލް އިން ދަ ރީޖަން" ގާއިމު ކޮށްދިނުމުގައި އިސް ދައުރެއް އަދާކުރާ ގައުމެއް ކަމުގައި ވިދާޅުވި އެވެ.

ދެ ގައުމުގެ ރައްޔިތުންގެ އިޖްތިމާއީ އަދި އިގްތިސާދީ ކުރިއެރުމަށްޓަކައި ރާއްޖެއާ ގުޅިގެން މަަސައްކަތް ކުރުމަށް އިންޑިއާ އިން މަސައްކަތް ކުރާނެ ކަމުގެ ޔަގީން ވެސް މޯދީގެ މެސެޖުގައި ދެއްވާފައިވެއެވެ. އަދި ކުރިއަށް އޮތް އަހަރުތަކުގައި މަލްޓި ޕާޓްނާޝިޕް އިތުރު ހަރުފަތަކަށް ކުރިއަރާނެ ކަމަށް ގަބޫލުފުޅު ކުރައްވާ ކަމަށް ވެސް ވިދާޅުވި އެވެ.