ރަައީސް ސޯލިހް މާދަމާ ގައުމާ މުހާތަބު ކުރައްވަނީ

ޖުމްހޫރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މާދަމާ ގައުމާ މުހާތަބު ކުރައްވާނެ ކަމަށް ރައީސުލްޖުމްހޫރިއްޔާގެ އޮފީހުން ބުނެފި އެވެ. 

ޖުމްހޫރީ ދުވަހަކީ ކުލަގަދަ ކޮށް ފާހަގަ ކުރާ ދުވަހެވެ. އެ ދުވަހަށް ހާއްސަ ޖަލްސާ އެއް ބާއްވައެވެ. އަދި އެ ޖަލްސާ ގައި ޝަރަފުވެރި ކަމުގެ ގައުމީ އިނާމާއި ހިތްވަރު ދިނުމުގެ ގައުމީ އިނާމު ދެއްވައެވެ.

ނަމަވެސް މި ފަހަރުގެ ޖުމްހޫރީ ދުވަސް ކުރިމަތި ވަނީ ހިނގަމުންދާ ސަރުކާރު ނިމި އާ ސަރުކާރެއް ފެށުމުގެ ވަގުތާ އެވެ.

ރައީސުލްޖުމްހޫރިއްޔާގެ އޮފީހުން ބުނީ ޖުމްހޫރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މާދަމާ ގައުމާ މުހާތަބު ކުރައްވާނެ ކަމަށެވެ. އެމަނިކުފާނު ގައުމާ މުހާތަބު ކުރައް ވާނީ ރާއްޖޭގެ ހަބަރު ފަތުރާ ވަސީލަތްތައް މެދުވެރި ކުރައްވައި މާދަމާ ހެނދުނު 10:00 ޖަހާއިރު އެވެ. 

އެ ދުވަހާއި ގުޅިގެން އިތުރު ހަރަކާތެއް / ޖަލްސާ އެއް ބާއްވާނެ ކަމަކަށް ނުބުނެ އެވެ.

މީގެ ހަ ދުވަސް ފަހުން ނޮވެންބަރު 17، 2023 ގައި ރައީސް ސޯލިހްގެ ވެރިކަމުގެ ފަސް އަހަރުގެ ދައުރު ހަމަވެ ރައީސުލްޖުމްހޫރިއްޔާގެ މަގާމުން އެމަނިކުފާނު ވަކިވެވަޑައިގަންނަވާނެ އެވެ. ހަމަ އެ ދުވަހުގެ ހަވީރު 4:45 ގައި އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ރައީސުލްޖުމްހޫރިއްޔާގެ މަގާމުގެ ހުވާ ކުރައްވާ މަގާމާއި ހަވާލުވެވަޑައިގަންނަވާނެ އެވެ.