ހުރިހާ ކެންޑިޑޭޓުން ވެސް މާލީ ބަޔާން ހުށައަޅައިފި

ރިޔާސީ އިންތިހާބު 2023 ގެ ފުރަތަމަ ބުރުގައި ވާދަކުރެއްވި ކެންޑިޑޭޓުންގެ ތެރެއިން މާލީ ބަޔާން ހުށަހަޅަން ޖެހޭ ހުރިހާ ކެންޑިޑޭޓުން މާލީ ބަޔާން ހުށައަޅާފައިވާ ކަމަށް އިލެކްޝަންސް ކޮމިޝަނުން ބުނެފި އެވެ.

އިލެކްޝަންސް ކޮމިޝަންގެ ނާއިބު ރައީސް / ކޮމިޝަންގެ ތަރުޖަމާން އިސްމާއީލް ހަބީބު ދެންމެ ވިދާޅުވީ ރިޔާސީ އިންތިހާބު 2023 ގެ ފުރަތަމަ ބުރުގައި ވާދަކުރެއްވި ކެންޑިޑޭޓުންގެ ތެރެއިން މާލީ ބަޔާން ހުށަހަޅުއްވަން ޖެހޭ ހުރިހާ ކެންޑިޑޭޓުން ހުށަހަޅަން ޖެހޭ ވަގުތަށް އިލެކްޝަންސް ކޮމިޝަނަށް މާލީ ބަޔާން ހުށަހަޅާފައިވާ ކަމަށެވެ.

މިއަދުގެ ނިޔަަލަށް މާލީ ބަޔާން ހުށައަޅަން ޖެހެނީ އިންތިހާބުގެ ފުރަތަމަ ބުރުގައި ވާދަ ކުރެއްވި ކެންޑިޑޭޓުންގެ ތެރެއިން ދެވަނަ ބުރަށް ވަޑައިގެންނެވި ދެ ކެންޑިޑޭޓުން ފިޔަވާ އެހެން ކެންޑިޑޭޓުންނެވެ. ހަބީބު ވިދާޅުވީ ޑިމޮކްރެޓްސްގެ ކެންޑިޑޭޓް އިލްޔާސް ލަބީބާއި އަމިއްލަ ގޮތުން ވާދަކުރެއްވި ކެންޑިޑޭޓް އުމަރު ނަސީރާއި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމާއި އަމިއްލަ ގޮތުން ވާދަކުރެއްވި އަހްމަދު ފާރިސް މައުމޫނާއި މޯލްޑިވްސް ނެޝަނަލް ޕާޓީގެ ރިޔާސީ ކެންޑިޑޭޓް މުހައްމަދު ނާޒިމާއި އަމިއްލަ ގޮތުން އިންތިހާބުގައި ވާދަކުރެއްވި ހަސަން ޒަމީލްގެ މާލީ ބަޔާން ހުށައަޅާފައިވާ ކަމަށެވެ.

ދެވަނަ ބުރުގައި ވާދަކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. އެ ދެ ބޭފުޅުންގެ މާލީ ބަޔާން ހުށައެޅުމުގެ ސުންގަޑި އަކީ މި މަހުގެ 29 ވަނަ ދުވަހެވެ.