ފްލެޓު ލިބުނު މީހުން އެނގިއްޖެ، ލިބުނީ 76-73 ޕޮއިންޓުން މައްޗަށް

މި ސަރުކާރުން ހިންގާ "ގެދޮރުވެރިޔާ" ސްކީމްގެ ދަށުން ފުރަތަމަ ބުރުގައި ފްލެޓް ލިބޭ މީހުންގެ ދާއިމީ ލިސްޓު ނެރެފި އެވެ. 

މި ސަރުކާރުން ހިންގި ބޯހިޔާވަހިކަމުގެ ސްކީމްގައި ހިމެނޭ ގޮތަށް ހުޅުމާލޭގައި ފަހި ދިރިއުޅުން ކުންފުނިން އަޅާ "އަމާން އުދަރެސް" ފްލެޓަށް ކުރިމަތިލާން އިއުލާނު ކުރުމުން 13،000 މީހުންނަށް ފްލެޓު ލިބޭނެ ކަމަށް ސަރުކާރުން ބުނެފައިވެ އެވެ. ފްލެޓަށް 20،000 މީހުން ކުރިމަތިލިއިރު މީގެތެރޭން ފްލެޓު ލިބޭނެ ކަމަށް 13،000 އަށްވުރެ ގިނަ މީހުން ނެގިއިރު އަޅަމުން ގެންދިޔައީ 4،000 ފްލެޓެވެ. މި ފްލެޓުގެ ތެރޭން މި އަހަރު ނިމޭނީ ހަތަރު އިމާރާތެކެވެ. 

ހައުސިން / ޕްލޭނިން މިނިސްޓްރީން މިއަދު ވަނީ ފްލެޓު ލިބޭ މީހުންގެ ދާއިމީ ލިސްޓް އާއްމުކޮށްފަ އެވެ.

އެ މިނިސްޓްރީން ގެޒެޓުގައި ޖެހި އިއުލާނެއްގައިވާ ގޮތުން މި ފްލެޓުތަކުގެ ތެރޭގައި ތިން ކޮޓަރީގެ ފުލެޓްގެ ދާއިމީ ލިސްޓްގައި ހިމެނޭ ހިމެނެނީ 76 އިން ފެށިގެން މަތިން މާކްސް ލިބިފައިވާ ފަރާތްތަކެވެ. އަދި ދެ ކޮޓަރީގެ ފުލެޓްގެ ދާއިމީ ލިސްޓްގައި ހިމެނޭ 73 އިން ފެށިގެން މަތިން މާކްސް ލިބިފައިވާ ފަރާތް ތަކެވެ.

އެ މިނިސްޓްރީން ބުނީ 4000 ފުލެޓް ގެ ތެރެއިން ފުލެޓް ލިބުމަށް ހޮވިފައިވާ ފަރާތްތަކަށް، އެފަރާތަކަށް ލިބޭ ފުލެޓް ކަނޑައަޅުމަށްޓަކައި ގުރުއަތުލުން އޮންނާނެ އެވެ. ގުރުއަތުލާން އަންނަން ޖެހޭ ގަޑި އަންގާނީ ޕޯޓަލް މެދުވެރިކޮށް އެމީހަކަށް ވަކިންނެވެ.

ހައުސިން މިނިސްޓްރީން ބުނީ މި 4000 ފުލެޓް ލިބޭ ފަރާތްތަކުގެ ތެރޭގައި ނުހިމެނޭ، ނަމަވެސް ޝަރުތުހަމަވާ ކަމަށް ދާއިމީ ލިސްޓްގައި ކަނޑައަޅާފައިވާ ފަރާތްތަކަށް، ސަރުކާރުންކުރި އަށް ގެންދިއުމަށް ހަމަޖެހިފައިވާ ހައުސިން މަސްރޫއުތަކުގެ ތެރެއިން ފުލެޓެއް ދިނުމަށް ހަމަޖެހިފައިވާކަމުގެ ލިޔުން ޕޯޓަލް މެދުވެރިކޮށް ދޭނެ ކަމަށެވެ. އދި ދެމަފިރިން ވަކިން ހުށަހަޅައިގެން ފުލެޓް ލިބުމަށް ހޮވިފައިވާނަމަ ފުލެޓް ދިނުމަށް ހަމަޖެހިފައިވަނީ ދެމަފިރިންނަށް އެއް ފްލެޓެވެ. ނުވަތަ ފުލެޓް ދިނުމަށް ހަމަޖެހިފައިވަނީ ދެ މަފިރިންގެ ތެރެއިން ކަނޑައަޅާ ފަރާތަކަށް އެއް ފްލެޓެކެވެ.

މި ފްލެޓުގެ ވާހަކަ - ފްލެޓް ލިބުނުކަން ނުވަތަ ނުލިބޭކަން އެނގޭނީ ޕޯޓަލުން